Yesus Nengedoꞌ Demulun Kefalaꞌ Seraduꞌ Roma deiꞌ Kapernaum
7
1 Sefengeh Yesus nefebala nelun mulaꞌ dih, Ieh semuet bang bawang Kapernaum. 2 Yeneh eceh kefalaꞌ seraduꞌ Roma luk inan demulun nanneh mawa tu. Mét idih lélé maté demulun dih. 3 Kereb nedingerneh Yesus idih bang bawang Kapernaum, icukneh tudaꞌ-tudaꞌ lun rayeh Yahudi eméꞌ mutuh ni Yesus felé eméꞌ ngedoꞌ demulun kefalaꞌ seraduꞌ dih. 4 Kereb waꞌ lun rayeh Yahudi ineh nefafuꞌ ni Yesus, ideh mutuh tu-tu felé Yesus nangan kefalaꞌ seraduꞌ ineh. “Ruen-Muh nangan moꞌ kefalaꞌ seraduꞌ ineh, kedeh ni Yesus, ngecehkuh Ieh ngerurum neteu. 5 Ieh mawa nan fufu teu idih nenangan mudut Rumaꞌ Tebupun kuan teu.” 6 Sefengeh idih Yesus inéꞌ febayaꞌ dingandeh. Kereb ideh mageh muneng nan rumaꞌ kefalaꞌ seraduꞌ ineh, kefalaꞌ seraduꞌ dih nengecuk lun dinganneh eméꞌ ngecing balaneh ni Yesus, kudeng inih balaneh, “Amaꞌ, saganneh Iko na eméꞌ rumaꞌkuh, ngecehkuh uih na meleb mefafuꞌ ne-Muh tungéꞌ rumaꞌkuh, 7 ngecehkuh idih, uih na miek eméꞌ matun ne-Muh. Feburiꞌ moꞌ Iko eceh bala, demulunkuh inih miek doꞌ. 8 Ngecehkuh, uih inih tareh lun rayeh fa lunkuh, idih fa benehkuh inan teh seraduꞌ. Kereb uih febala nan eceh seraduꞌ luk fa benehkuh: Eméꞌ ideiꞌ iko! Ieh eméꞌ ideiꞌ. Idih uih febala nan eceh lun teh: Tungéꞌ iko!, Ieh eméꞌ matun negkuh, kudeng ineh teh kuan demulunkuh: Ruenmuh inih! Idih ieh ngeneuꞌ neneh.” 9 Sefengeh Yesus neninger buriꞌ ineh, Ieh mawa tu ku kefalaꞌ seraduꞌ ineh, idih Yesus nelumi nelun mulaꞌ luk nemayaꞌ Neneh ineh, idih nefebala nedeh, “Na enu lun nefafuꞌ-Kuh kudeng enu lemulun inih, sagan fanaꞌ arang lun Israél!” 10 Kereb ideh luk icuk ineh nefafuꞌ ni Yesus dih nuliꞌ inéꞌ rumaꞌ kefalaꞌ seraduꞌ ineh, sirendeh, nedoꞌneh demulun luk mét dih.
Yesus Nengulun Eceh Anak Adiꞌ Delei deiꞌ Nain
11 Sefengeh ineh, Yesus inéꞌ deiꞌ bawang Nain. Waꞌ murid-Neh idih mulaꞌ lun beken nemayaꞌ Neneh. 12 Kereb Yesus muneng nan bawang ineh, Ieh nenier lun mirir butung lun naté remuat rat bang bawang ineh. Lun luk naté ineh anak adiꞌ delei, anak buleng eceh decur tinulaꞌ, idih mulaꞌ lun bawang mayaꞌ decur tinulaꞌ ineh. 13 Kereb Tuhan Yesus nenier decur ineh, Ieh meiꞌ tutu idih nefebala neneh, “Eleg iko nangiꞌ inaꞌ!” 14 Idih Yesus inéꞌ muneng nan butung dih, idih nengimet neneh, idih lun luk nenguit butung ineh ucuꞌ. Yesus nefebala, “Asi, tumui ikoa!” 15 Kereb ineh teh anak adiꞌ delei luk naté dih fetecu netumui. Ieh netudo idih fetecu febala. Idih Yesus nemeré neneh nan tinanneh. 16 Felaba awa lun mulaꞌ kereb ineh, ideh nengeditaꞌ idih nengubur ngadan Allah. Ideh nefebala, “Eceh nabi rayeh fengeh necing arang teu idih Allah nengikak neteu.” 17 Nefiarneh bala ku Yesus efut tanaꞌ Yudéa idih emung bawang luk muneng yeneh teh.
Itun Yohanés luk Ngerereb Ku Idé Yesus
18 Kereb waꞌ murid Yohanés nemadaꞌ enun luk nangun ineuꞌ Yesus, Yohanés nenawar dueh lun rat arang muridneh, 19 idih nengecuk nedeh inéꞌ fafuꞌ ni Tuhan Yesus felé ngitun Neneh, “Iko luk ruen kei nginét dih? Inan lun beken ruen kei nginét beruh teh?” 20 Kereb lun luk icuk Yohanés luk ngerereb necing iring Yesus, ideh nefebala ni Yesus, “Yohanés nengecuk nekei dueh ngitun ne-Muh, ‘Iko luk ruen kei nginét kudeng janiꞌ Allah dih? Inan lun beken ruen kei nginét beruh teh?’ ” 21 Kereb ineh Yesus nengedoꞌ lun mulaꞌ rat nan luk mét idih derehdeh. Yesus nemasut waꞌ roh dat ineh idih nengedoꞌ lun mebuser felé miek nier. 22 Sefengeh ineh, Yesus nengor bala didueh, “Lemubed medueh idih madaꞌ ni Yohanés ku enun luk fengeh ineuꞌ-Kuh sinier idih dininger medueh. Lun mebuser miek nier, lun meliai miek nalan, lun luk mét susud nedoꞌ, lun luk mebenggel miek ninger, lun naté ineuꞌ ngulun beruh idih kuan lun luk masiꞌ ruen ngecing Ago Doꞌ rat nan Tuhanb. 23 Samal kuan lemulun luk lutep menu idih mayaꞌ Negkuh.” 24 Sefengeh lun luk icuk Yohanés ineh nuliꞌ, Yesus nefebala nelun mulaꞌ ineh ku Yohanés, buriꞌ-Neh, “Eméꞌ nier enun muyuh nan fayeh? Eméꞌ nier guyuꞌ don uduh luk yufin bui? Na ieh kineh. 25 Kudeng idih feh, eméꞌ nier enun muyuh ideiꞌ? Fian nier lemulun luk fakai doꞌ? Na ieh kudeng ineh, ngecehkuh lemulun luk fakai doꞌ idih lun doꞌ, ieh tudo bang istana racaꞌ. 26 Eméꞌ nier enun muyuh? Nier nabi? Metu, Uih febala nemuyuh ieh ineh melun ratnan nabi. 27 Yohanés inehngeh luk nayud bang Buku Ago inih, ‘Ieh inih lun luk icuk-Kuh,’ keburiꞌ Allah, ‘Uih nengecuk neneh eméꞌ atun rat ne-Muh felé ieh nepuꞌ dalan kuan-Muhc.’ 28 Uih madaꞌ nemuyuh, lun tanaꞌ inih na luk idih lun melun rayeh ratnan Yohanés luk ngerereb. Yehmoꞌ, lun luk melun isut bang Kuyut Allah, ieh melun rayeh ratnan Yohanés.d 29 Emung lun mulaꞌ, idih lun ngemung fufuk teh, luk ninger bala Yesus, ideh ineh luk menu idih mayaꞌ bala Allah, idih fengeh rireb i Yohanése. 30 Yehmoꞌ, lun Farisi idih waꞌ guruꞌ ukum Torat, na menu idih na fian mayaꞌ Bala Allah, na ideh fian rereben Yohanés. 31 Idih Yesus nefebala teh, “Kudeng idé dih lemulun nekinih inih? 32 Ideh mafad kudeng waꞌ anak luk tudo deiꞌ pasar luk feritulu, ‘Kei ngiup suling kuan muyuh, yehmoꞌ na muyuh ngarang. Kei menani tido adaꞌ, yehmoꞌ na muyuh nangiꞌ’. 33 Kudeng ineh teh kereb ecing Yohanés luk Ngerereb, ieh mawaꞌ idih na ngirup anggur, buriꞌ muyuh ‘Ieh sinuet sitan’. 34 Idih Anak Lemulun mecing, Ieh kuman idih ngirup, keburiꞌ muyuh teh, ‘Nier Lemulun ineh! Manga-Ieh, mabuk-Ieh, rurum lun luk ngemung fufuk idih lun mesalaꞌ.’ 35 Sagan fanaꞌ kudeng ineh, ileh Allah megalaꞌ bang ulun emung lemulun luk mayaꞌ Neneh.”
Yesus deiꞌ Rumaꞌ Simon
36 Eceh lun Farisi, ngadanneh Simon, ieh nemutuh ni Yesus inéꞌ kuman deiꞌ rumaꞌneh. Yesus inéꞌ yeneh idih tudo kuman. 37 Bang bawang ineh teh inan decur luk mesalaꞌ. Kereb decur ineh neninger ku Yesus idih deiꞌ rumaꞌ lun Farisi ineh, decur ineh inéꞌ deiꞌ. Ieh nenguit sereiꞌ luk finudut rat nan batuh. Bang sereiꞌ ineh inan umau luk doꞌ buen. f 38 Decur ineh netufed fa keted, muneng iring kukud Yesus, idih nenangiꞌ, nengabaꞌ kukud Yesus dingan apaꞌ matehneh. Sefengeh idih, ieh nemid kukud Yesus dingan epukneh. Setecuneh, ieh nemuen kukud Yesus idih nengumau kukudneh dingan umau luk doꞌ buen ineh. 39 Kereb lun Farisi luk nenawar ni Yesus kuman ineh nenier emung ineh, ieh nefebala bang niatneh, “Kudeng feh ieh inih nabi, keliꞌ-Neh idé decur luk nengimet Neneh ineh, idih teh keliꞌ-Neh ku decur ineh mulun bang salaꞌ.” 40 Sefengeh ineh Yesus nefebala ni Simon, “Simon, inan luk ruen-Kuh madaꞌ nemuh.” Or i Simon, “Febala moꞌ, Guruꞌ.” 41 Yesus nemeré inud, “Inan dueh burur lun luk kuan utang nan lun luk miek meré rigit kebiten. Sebuleng lun kuan utang rigit limeh ngeratu dinar idih luk sebulengneh teh limeh ngefuluꞌ rigit dinar. 42 Didueh na miek ngelubed rigit ineh feh, ku idih utang didueh ineuꞌ ngiuꞌ lun luk nemeré rigit kinabit ineh. Simon, idé didueh luk melun mawa nan lemulun luk ngiuꞌ utang ineh?” 43 Or i Simon, “Uih feyeh, lun luk melun mulaꞌ utang ineh.” Yesus nefebala, “Metu balamu ineh.” 44 Sefengeh idih Yesus nelumi nier decur ineh idih nefebala ni Simon, “Nier iko decur inih, Uih eméꞌ rumaꞌmuh na iko meré apaꞌ fimeruꞌ kukud-Kuh, yehmoꞌ decur inih meruꞌ kukud-Kuh dingan apaꞌ matehneh idih mid dingan epukneh.g 45 Iko na ngafuꞌ Negkuh deiꞌ rumaꞌmuh dingan awang niat, yehmoꞌ decur inih na ucuꞌ muen kukud-Kuh rat ecing-Kuh tungéꞌ. h 46 Kereb Uih semuet bang rumaꞌmuh, iko na nutug umau lun uluh-Kuh, yehmoꞌ decur inih nutug umau doꞌ buen lun kukud-Kuhi. 47 Ngecehkuh ineh Uih febala nemuh, awaneh luk rayeh ineh ngegalaꞌ ku salaꞌneh luk mulaꞌ fengeh ineuꞌ ngiuꞌ. Kudeng lemulun sisut salaꞌneh neuꞌ ngiuꞌ, sisut teh awaneh.” 48 Sefengeh idih Yesus nefebala nan decur ineh, “Salaꞌmuh fengeh ineuꞌ ngiuꞌj.” 49 Waꞌ lemulun luk tudo idih kuman dingan Yesus, nefebala bang niatdeh, “Idé Delei sinih, miek ngiuꞌ salaꞌ?” 50 Yehmoꞌ, Yesus nefebala nan decur ineh, “Ngecehkuh iko menu Negkuh iko nefuit rat nan ukum salaꞌ. Muliꞌ iko dingan awang!”