Murid Yesus Nengalap Runguh Gandum Kereb Eco Lun Yahudi Ucuꞌ Ngekem
6
1 Kereb eco Sabat, Yesus nenalan lemaba eceh latiꞌ gandum, idih murid-Neh luk nenalan febayaꞌ Neneh, nengalap runguh gandum. Ideh nengegka neneh ngalap ilungneh idih nekuman neneh. a 2 Yehmoꞌ, tudaꞌ-tudaꞌ burur lun Farisi luk nenier nedeh nengitun, “Ngudeh muyuh ngeneuꞌ luk bipeng ruen ngekem kereb eco Sabat?” 3 Yesus nengor baladeh, “Na muyuh nemacaꞌ enun luk ineuꞌ Daud kereb ieh meleu dingan emung lemulun luk nemayaꞌ neneh? b 4 Daud nesemuet bang Rumaꞌ Allah idih nengalap rutiꞌ luk biré kuan Allah. Idih ieh nekuman neneh idih nemeré rutiꞌ ineh nelun luk dinganneh. Setutuneh rutiꞌ ineh na miek kenen sebeken imam.” c 5 Yesus nemengeh bala-Neh nedeh, “Uih inih Anak Lemulun luk kuan lalud ngeletep enun luk miek ruen, idih enun luk na miek ruen bang eco Sabat.”Yesus Nengedoꞌ Seburur Lun luk Naté Ticuꞌ Selifa Kereb Eco Sabat
6 Kereb seeco Sabat, Yesus nesemuet bang Rumaꞌ Tebupun Yahudi idih nemadaꞌ nedeh yeneh. Bang rumaꞌ ineh inan selemulun luk naté ticuꞌ fatinuehneh. 7 Guruꞌ-guruꞌ Ukum Torat idih lun Farisi nenier idé keliꞌ Yesus ngedoꞌ lemulun bang eco Sabat, felé inan salaꞌ-Neh luk ruendeh ngepen Neneh. 8 Yehmoꞌ, Yesus sibuleng nekeliꞌ terawédeh, idih Yesus nefebala nelun luk naté ticuꞌ ineh, “Tungéꞌ iko, tufed fa atun nih!” Idih ieh netufed yeneh. 9 Idih Yesus nefebala nedeh, “Uih ngitun nemuyuh, mayaꞌ Ukum Agama teu, enun luk miek ruen bang eco Sabat? Ngeneuꞌ luk doꞌ, ngeneuꞌ luk dat, nangan lemulun felé ieh mulun, ngaté neneh?” 10 Sefengeh ineh Yesus nenier emung-emungdeh idih nefebala nelun luk mét ineh, “Ruen natang ticuꞌmuh!” Lun luk mét dih nenatang ticuꞌneh, kereb ineh teh ticuꞌneh nedoꞌ. 11 Yehmoꞌ, guruꞌ-guruꞌ Ukum Torat idih lun Farisi ineh museh tutu Neneh, idih nengimun fegayam ku enun luk miek ruendeh ni Yesus.
Yesus Nengeletep Fuluꞌ Dueh Rasul-Neh
12 Sefengeh ineh Yesus neremuat idih mudik inéꞌ lun fegkung sikel sembayang idih kedangan-kedangan ineh Ieh sembayang inan Allah. 13 Kereb eco fengeh macang Yesus nenawar emung lemulun luk mayaꞌ Neneh, idih Ieh nemiliꞌ rat arangdeh fuluꞌ dueh burur, luk titen-Neh rasul-rasul. Ideh ineh: 14 Simon luk titen-Neh Pétrus idih Andréas kinanakneh, Yakobus, Yohanés, Filipus, Bartoloméus, 15 Matius, Thomas, Yakobus anak Alféus, Simon lun Zélot, 16 Yudas anak Yakobus, idih Yudas Iskariot luk muci eco nekisuꞌ niatneh idih neteketed rat ni Yesus.
Yesus Nemadaꞌ idih Nengedoꞌ Mulaꞌ Lemulun luk Mét
17 Yesus neremuru febayaꞌ nedeh waꞌ Rasul rat lun fegkung dih, idih ideh neucuꞌ su luk mereked. Yeneh fengeh nefemung lun mulaꞌ luk labaꞌ inih mayaꞌ Neneh, idih melun mulaꞌ teh necing rat Yudéa, bawang Yerusalém, Tirus idih Sidon luk muneng tengeb laut. 18 Ideh necing fian ninger bala Yesus idih ruen ngedoꞌ rat nan étdeh. Waꞌ lemulun luk sinuet waꞌ roh dat fanaꞌ ineuꞌ-Neh ngedoꞌ. 19 Emung lemulun fian ngimet Neneh, ngecehkuh inan lalud luk neremuat rat nan burur-Neh, luk nengedoꞌ emungdeh.
Awang idih Dereh
20 Yesus nenier nedeh luk mayaꞌ Neneh, idih Yesus nefebala nedeh,
“Samal kuan muyuh luk masiꞌ, ngecehkuh muyuh ineh lun luk mulun kiyuten Allah.
21 Samal kuan muyuh luk meleu nekinih, ngecehkuh muyuh miek ruen ngebor.
Samal kuan muyuh luk nangiꞌ nekinih, ngecehkuh muyuh miek meriruh.
22 Samal kuan muyuh kudeng feh lemulun araꞌ, ngecuk buro, ngedat idih ngesalaꞌ nemuyuh, ngecehkuh muyuh mayaꞌ Anak Lemulun. d
23 Nabi-nabi kumaꞌ mon fanaꞌ kudeng ineh teh. Kudeng feh muyuh ruen kudeng ineh, mawang moꞌ niat muyuh! Ngecehkuh rayeh tapar kuan muyuh deiꞌ Surga. e
24 Tawan muyuh dih! Muyuh lun luk doꞌ luk mulun bang refut-refut mayaꞌ ulun tanaꞌ inih, ngecehkuh ngawang niat muyuh nekinih moꞌ.
25 Tawan muyuh dih! Muyuh luk mebor nekinih nih, ngecehkuh muci eco muyuh meleu.
Tawan muyuh dih! Muyuh luk meriruh nekinih inih, ngecehkuh muci eco muyuh nangiꞌ idih temido. 26 Tawan kuan muyuh! Kereb emung-emung lemulun ngubur nemuyuh, ngecehkuh kudeng ineh teh luk ineuꞌ tefun lemulun ineh kuan nabi-nabi luk na metu.”
Mawa Inan Bunuꞌ
27 Yehmoꞌ, kuan muyuh luk mayaꞌ Negkuh nekinih inih, Uih feriteteng “Mawa muyuh nan lun luk ngedat nemuyuh, idih meré doꞌ kuan lemulun luk megeteh niat nemuyuh. 28 Mutuh Allah ngeferuan nedeh luk ngediman nemuyuh, idih sembayang kuan idé luk ngedat nemuyuh. 29 Kudeng feh lun mafag fingit muyuh, simén moꞌ ieh mafag fingit muyuh selifa teh. Kudeng feh lun ngaro bakad doꞌ muyuh, berén moꞌ muyuh bakad beken dingan ineh. 30 Kudeng feh lun mutuh eceh enun moꞌ rat nemuyuh, berén moꞌ ieh nedeh, kudeng binawehmuh narodeh, eleg mutuh idih lemubed. 31 Kudeng afeh luk fian muyuh ruen lun kuan muyuh, kudeng ineh teh ruen muyuh kuandeh. f 32 Na luk idih doꞌ muyuh kudeng feh muyuh mawa nan lemulun luk mawa nemuyuh moꞌ. Ngecehkuh lemulun luk mesalaꞌ miek teh kudeng ineh. 33 Na luk idih doꞌ muyuh kudeng feh muyuh doꞌ nan lemulun luk doꞌ nemuyuh moꞌ. Lun mesalaꞌ fanaꞌ miek teh kudeng ineh. 34 Kudeng ineh teh, na luk idih doꞌ muyuh kudeng feh muyuh meré eceh luk kebiten kuan lun luk miek nguaꞌ kabit dih. Lun mesalaꞌ fanaꞌ miek teh ngeneuꞌ luk kudeng ineh. 35 Semetuneh, na ieh kudeng ineh. Setutuneh muyuh mawa nan lemulun luk dat nemuyuh idih doꞌ nedeh. Meré feh muyuh luk ruen lun ngabit ieh moꞌ eleg nginulat ruen ngelubed. Kudeng ineh feh luk ruen muyuh, rayeh tapar muyuh idih muyuh eméꞌ ku anak-anak Allah luk Felabaditaꞌ. Ngecehkuh Allah mekatu niat nan lemulun luk na keliꞌ merefet. 36 Doꞌ muyuh mekatu niat kudeng Taman teu bang Surga luk mekatu niat.”
Ngadat Lemulun
37 “Eleg muyuh ngadat nelun beken, felé Allah na ngadat nemuyuh teh. Eleg ngukum lun beken felé muyuh fanaꞌ na kumin Allah. Meré doꞌ muyuh nan lun beken, felé Allah meré doꞌ kuan muyuh. 38 Meré feh muyuh nelun beken, Allah fanaꞌ meré teh nemuyuh, idih Allah meré luk kuan muyuh melun mulaꞌ kudeng bara luk ineuꞌ nguad fenuꞌ-fenuꞌ mecing mutat. Ngecehkuh uad luk ineuꞌ muyuh kuan lun beken ruen Allah nguad kudeng ineh teh kuan muyuh.”
39 Idih Yesus nemadaꞌ kuandeh eceh luk finginud, “Kudeng lun mebuser nguyut eceh lun mebuser teh keliꞌ rungen didueh fad-fad mepeh bang abang. g
40 Na luk idih murid luk melun rayeh ratnan guruꞌneh. Yehmoꞌ, murid luk nefengeh sikulaꞌneh, ieh miek mafad ilehneh kudeng guruꞌneh. h
41 Ngudeh muyuh miek nier arep isut bang mateh kinanakmuh, setatak kayuh rayeh bang mateh muyuh na mesier muyuh? 42 Kudeng afeh muyuh miek febala nan kinanak muyuh, tungéꞌ kinanak, talaꞌkuh arep isut luk bang mateh mineh, bang mateh muyuh sibuleng inan setatak rayeh kayuh na nekeliꞌ muyuh. U muyuh luk sisi doꞌ dih! Talan muyuh atun tatak kayuh luk bang mateh muyuh ineh. Idih teh muyuh miek nier megalaꞌ idih ngeruwat arep isut rat bang mateh kinanak muyuh dih.”
Lawa idih Buaꞌneh
43 “Lawa buaꞌ luk doꞌ tubuꞌ, buaꞌneh fanaꞌ doꞌ. Kudeng ineh teh lawa buaꞌ luk dat tubuꞌ, buaꞌneh fanaꞌ dat. 44 Anid lawa buaꞌ ruen ngiti rat nan buaꞌneh. Afet tapaꞌ na kebuaꞌ buaꞌ ara idih buaꞌ anggur. i 45 Ilungneh, lemulun luk doꞌ, ngeruat bala luk doꞌ ngecehkuh niatneh fenuꞌ ku luk doꞌ. Lun luk dat, balaneh fanaꞌ dat ngecehkuh niatneh fenuꞌ ku luk dat. Ngecehkuh, enun luk belén ineh luk remuat rat bang niatj.”
Fudut Rumaꞌ luk Meraben, Fudut Rumaꞌ luk Na Meraben
46 “Ngudeh muyuh nawar Negkuh, Tuhan, Tuhan, yehmoꞌ na muyuh mayaꞌ enun luk bila-Kuh nemuyuh? 47 Mafad kudeng idé dih lemulun luk eméꞌ Negkuh, ninger idih mayaꞌ bala-Kuh, bedén-Kuh nemuyuhk, 48 ieh kudeng lun luk kereb nefed rumaꞌ ngukat lubang diri dalem-dalem lun tanaꞌ luk metueh. Kereb apaꞌ temubuꞌ ngeduyung rumaꞌ ineh rumaꞌ ineh na meguyuꞌ na mebuput ngecehkuh tifed lun tanaꞌ luk metueh. 49 Lemulun luk ninger bala-Kuh, yehmoꞌ na mayaꞌ idih, ineh mafad kudeng lemulun luk nefed rumaꞌ, nenefed dirineh lun tanaꞌ luk melayaꞌ. Kereb apaꞌ temubuꞌ nenuyung rumaꞌ ineh, rumaꞌ ineh melukaꞌ, manud, idih mabud metapa.”