Yesus Nemiliꞌ Lun luk Fun-fun Mayaꞌ Badaꞌ Yesus
5
1 Bang seeceh kereb Yesus netufed iring tengeb takung Genesaréta, lun mulaꞌ fesingaro inéꞌ matun ni Yesus fian ninger bala Allah luk bedén-Neh. b 2 Yesus nenier inan dueh alud iring tengeb takung ineh. Lun luk kekemendeh nakap lawid fengeh netemurun rat bang alud ineh, ideh nemeruꞌ rabatdeh. 3 Yesus numak bang eceh alud ineh, yeineh alud i Simon. Yesus nengecuk ni Simon menul alud nidih mado sisut rat nan iring tengeb. Sefengeh idih Yesus netudo bang alud ineh idih Ieh nemadaꞌ nelun mulaꞌ. 4 Sefengeh Yesus nemadaꞌ, Ieh nefebala ni Simon, “Kebirenmuh alud inih eméꞌ su luk medalem idih iko mefet rabatmuh felé iko ngalap lawid.” 5 Bala Simon, “Guruꞌ, kedangan-kedangan kei nengerabat, sebuleng fanaꞌ na teh lawid luk ilap kei. Ngecehkuh Guruꞌ ngecuk, ruen kei mefet rabat inih teh.” c 6 Sefengeh ideh nemefet rabat kudeng ecuk Yesus dih, ideh nengalap lawid felaba ulaꞌ, idih rabatdeh lélé nedarak. d 7 Idih i Simon nengayep nenawar nelun dingandeh luk bang alud beken inéꞌ ngeruyung nedeh. Idih waꞌ rurum necing, ideh fad-fad nengemung bang dueh alud ineh fenuꞌ ku lawid lélé neturem. 8 Kereb i Simon Pétrus nenier emung luk nangun ineh, ieh netekeradung fa kiung Yesus, keburiꞌneh, “Tuhan, tecin-Muh moꞌ uih, ngecehkuh uih lemulun luk mesalaꞌ.” 9 Simon nefebala kudeng ineh ngecehkuh ideh felaba awa nier ku ulaꞌ lawid luk ilapdeh, 10 kudeng ineh teh rurum-rurum i Simon yeineh Yakobus dinganak Yohanés, anak Zebedeus. Yesus nefebala ni Simon, “Eleg metot, rat nekinih iko ngerabat lemulun.” 11 Sefengeh ineh Simon idih rurum-rurumneh nenginat alud-alud inéꞌ tanaꞌ lun, nenacan emung-emung ineh, idih nemayaꞌ ni Yesus. Yesus Nengedoꞌ Lun luk Mét Susud
12 Kereb Yesus bang eceh bawang, inan eceh delei, bururneh fenuꞌ ku luk mét susud, felaba buraꞌ. Kereb ieh nenier Yesus, ieh inéꞌ matun ni Yesus idih netekeradung fa kiung-Neh. Ieh nemutuh ni Yesus, keburiꞌneh, “Amaꞌ, kudeng Iko fian, Iko miek ngedoꞌ negkuh.” 13 Idih Yesus nengimet neneh, idih nefebala, “Uih fian ngedoꞌ nemuh, doꞌneh iko.” Kereb ineh teh ieh fetecu nedoꞌ rat nan ét susudneh. 14 Yesus nefebala neneh, “Eleg madaꞌ nelun beken idé moꞌ, yehmoꞌ eméꞌ iko madaꞌ bururmu siren lun Imam idih iko meré luk ku lua kuan Tuhan, mayaꞌ kudeng luk icuk Musa, tanuꞌ ngecehkuh iko fengeh nedoꞌ.” e 15 Yehmoꞌ, eméꞌ mulaꞌ lun keliꞌ ku ago Yesus mecing yafeh-yafeh. Kuidih, mulaꞌ lun necing fian ninger bala Yesus idih mutuh ruen ngedoꞌ rat nan luk métdeh. 16 Agan fanaꞌ kudeng ineh, Yesus meliat inéꞌ sembayang nan su luk maliꞌ.
Yesus Nengedoꞌ Lun Meliai
17 Bang seeco kereb Yesus nemadaꞌ lun mulaꞌ, inan tudaꞌ-tudaꞌ lun Farisi idih guruꞌ Ukum Torat tudo ninger dingandeh. Ideh necing rat Yerusalém, rat bawang-bawang deiꞌ Galiléa idih Yudéa. Lalud Tuhan idih bang Yesus nengedoꞌ lemulun-lemulun luk mét. 18 Kereb ineh inan tudaꞌ burur lun necing mirir eceh lemulun meliai luk netelubid lun ugam. Ideh fian tu nguit lun mét ineh eméꞌ bang rumaꞌ felé miek ngerereng neneh fa kiung Yesus. 19 Yehmoꞌ, lemulun felaba ulaꞌ yedih, ku idih ideh na miek nenguit neneh semuet. Ideh nengiding neneh inéꞌ lun afo rumaꞌ. Idih ideh nengusag, nengelubang afo, idih nengurur neneh dingan ugamneh tulu fa kiung Yesus arang lun mulaꞌ ineh. 20 Kereb Yesus nenier kudeng afeh rayeh enudeh, Yesus nefebala nan lemulun luk mét ineh, “Kinanak-Kuh, salaꞌmuh fengeh ineuꞌ ngiuꞌ.” 21 Guruꞌ-guruꞌ Ukum Torat idih lun Farisi luk neninger bala Yesus fegei fayek, “Idé lei sinih luk mekuꞌ tu ngoyo Allah? Idé luk miek ngiuꞌ salaꞌ lemulun, sebeken ratnan Allah?” 22 Yehmoꞌ, keliꞌ Yesus ayekdeh, idih Yesus nefebala nedeh, “Ngudeh muyuh fekitun kudeng ineh bang niat muyuh? 23 Muyuh keliꞌ melun melé febala, ‘Salaꞌmuh fengeh ineuꞌ ngiuꞌ’, ratnan febala, ‘Tufed iko idih nalan’. 24 Yehmoꞌ, felé muyuh keliꞌ lun tanaꞌ inih Anak Lemulun melalud ngiuꞌ salaꞌ.” Idih Yesus nefebala nan lemulun luk meliai dih, “Tumui iko, ngiding luk inanmuh rudap ineh idih iko muliꞌ eméꞌ rumaꞌ.” 25 Lemulun luk mét liai dih fetecu netumui fa kiung lun mulaꞌ, idih nengiding luk inanneh rudap, idih ieh nuliꞌ dingan nengubur Allah. 26 Emung ideh luk idih yeneh mawa, idih nengubur Allah. Dingan war metot ideh nefebala, “Eco sinih teu nenier eceh luk nangun idih nan teu felaba awa.”
Yesus Nenawar ni Léwi
27 Sefengeh ineh Yesus neremuat, Ieh nenier eceh lemulun luk kekemenneh ngemung rigit fufuk kuan Kaisar Roma, ngadanneh Léwi, luk tudo bang rumaꞌ fufuk. Yesus nefebala neneh, “Mayaꞌ Negkuh!” 28 Léwi netufed nenacan emung luk ruenneh, idih ieh nemayaꞌ ni Yesus. 29 Sefengeh ineh Léwi nengeneuꞌ eceh irau bang rumaꞌneh kuan Yesus. Mulaꞌ lemulun luk nengemung rigit fufuk idih lun beken teh kuman fad-fad. 30 Nenier emung ineh, setudaꞌ lun Farisi, idih guruꞌ-guruꞌ Ukum Torat na mawang niat. Idih ideh nefebala nedeh waꞌ murid Yesus, “Ngudeh muyuh kuman dingan lun luk ngemung fufuk idih lemulun-lemulun luk mesalaꞌ?” f 31 Neninger baladeh ineh, Yesus nengor baladeh, “Lemulun luk mulun doꞌ na ieh gelasan nan dokter, lemulun luk mét moꞌ. 32 Uih mecing beken eméꞌ nawar lemulun luk mayaꞌ terawéneh ieh metu, yehmoꞌ Uih nawar lemulun luk mesalaꞌ, felé ideh uren rat nan salaꞌg.”
Sembayang idih Na Kuman Mayaꞌ Ukum Yahudi
33 Kereb ineh teh tudaꞌ-tudaꞌ lun Farisi nefebala ni Yesus, “Murid Yohanés idih murid lun Farisi megeiꞌ sembayang idih na kuman enun-enun, yehmoꞌ murid-Muh kuman.” 34 Yesus nengor baladeh dingan luk finginud, “Kereb inan irau aweh, delei luk ngaweh ineh idih arangdeh, na muyuh miek mepeng sakaineh kuman. 35 Yehmoꞌ, mecing feh kerebneh delei luk nengaweh ineh ilap rat arangdeh, kereb inehngeh ideh na kuman.” 36 Idih Yesus nemadaꞌ nedeh eceh luk finginud teh, “Na lun mupul bakad mon dingan seketeb kibung rat nan bakad luk meberuh, ngecehkuh ieh narak bakad luk meberuh ineh. Idih teh kibung bupul luk meberuh ineh na meleb dingan bakad luk mon. 37 Kudeng ineh teh na lemulun ngutang anggur beruh bang rua luk mon, ngecehkuh anggur beruh ineh miek milaꞌ rua ineh. 38 Anggur luk meberuh doꞌ ruen ngutang bang rua luk meberuh! 39 Kudeng ineh teh na lun fian ngirup anggur meberuh sefengeh nengirup anggur mon, keliꞌ rungen ideh febala, ‘Anggur mon melun mén ratnan anggur meberuh’.”