Yesus Tinutun Iblis nan Fayeh
4
1 Sefengeh Yesus rireb Yohanés, Yesus nenacan apaꞌ Yordan. Kereb ineh Ieh fenuꞌ ku Roh Meligan. Roh Meligan nenguyut Neneh inéꞌ nan fayeh bada luk metudal, na miek lemulun mulun yedih. 2 Yeneh Yesus tinutun Iblis afat ngefuluꞌ eco. Kinio ineh Ieh na nekuman enun-enun. Sefengeh afat ngefuluꞌ eco, Ieh meleufeh. 3 Iblis nefebala ni Yesus, “Ngecehkuh Iko Anak Allah, doꞌ Iko ngisuꞌ batuh inih mangun ku rutiꞌ.” 4 Yesus nengor balaneh, “Fengeh inayud bang Buku Ago, na ieh rat nan rutiꞌ moꞌ lemulun miek mulun.” a 5 Idih Iblis nenguit ni Yesus inéꞌ su luk meditaꞌ, sekecep mateh moꞌ Iblis nemadaꞌ Neneh emung bawang lun tanaꞌ inih. 6 “Emung kuyut idih binaweh bang emung bawang ineh berénkuh ne-Muh,” keneh Iblis ni Yesus, “Ngecehkuh emung ineh fengeh biré negkuh idih uih miek meré ineh ni idé moꞌ luk finiankuh. 7 Emung ineh berénkuh kuan-Muh kudeng moꞌ Iko tekeradung idih ngemo ku uih tuhan allah-Muh.” 8 Yesus nengor balaneh, “Bang Buku Ago fengeh inayud, tekeradung muyuh fa kiung Tuhan Allah muyuh idih mayaꞌ finian-Neh moꞌ.” b 9 Fengeh ineh, Sitan nenguit ni Yesus inéꞌ Yerusalém, idih ieh nengerereng Neneh lun buduk Rumaꞌ Allah, idih nefebala Neneh, “Ngecehkuh Iko Anak Allah, doꞌ Iko upa rat yenih eméꞌ liang. 10 Ngecehkuh bang Buku Ago fengeh inayud, Allah ngecuk waꞌ malaikat matar ne-Muh doꞌ-doꞌ, c 11 idih waꞌ malaikat temareh ticuꞌdeh felé Iko na mepeh mecing nan tanaꞌ.” 12 Yesus nengor bala Sitan dih, “Fengeh inayud bang Buku Ago, eleg iko nutun Tuhan Allahmuh!” d 13 Sefengeh Iblis nenutun ni Yesus dingan mulaꞌ tutun, ieh nenacan Neneh idih nginét kereb luk doꞌ.Yesus Lemubed Eméꞌ Galiléa
14 Sefengeh ineh Yesus nelemubed inéꞌ Galiléa; Ieh nefenuꞌ ku Roh Meligan. Meburungneh bala ku Yesus efut bawang ineh. 15 Ieh nemadaꞌ bang Rumaꞌ-rumaꞌ Tebupun yeneh idih emung lemulun nengubur Neneh.
Yesus Icuk Buro rat Nazarét
16 Yesus inéꞌ Nazarét, bawang luk inan-Neh nerayeh. Kereb eco Sabat, eco lun Yahudi ucuꞌ ngekem felé ideh tebupun, Ieh inéꞌ bang Rumaꞌ Tebupun kudeng luk fekalai ruen-Neh. Idih Ieh netufed fian macaꞌ Buku Ago. 17 Felayan Rumaꞌ Tebupun ineh nemeré ni Yesus buku nabi Yesaya. Ieh nengelasad buku ineh idih nemacaꞌ ayud sinih,
18 “Roh Tuhan idih Negkuh,e
ngecehkuh Allah fengeh nengeletep Negkuh
madaꞌ Ago luk Doꞌ rat nan Allah kuan waꞌ lun masiꞌ.
Allah nengecuk Negkuh eméꞌ
19 madaꞌ bala ku Allah nguliꞌ
waꞌ demulun,
idih ngedoꞌ mateh lun nebuser;
idih muit lemulun luk medereh
idih madaꞌ ku ecing kereb Tuhan ngulun fufu-Neh.” f
20 Sefengeh ineh Yesus nengelulun Buku Ago ineh, idih nengelubed neneh nan felayan Rumaꞌ Tebupun ineh, idih netudo. Emung lemulun bang Rumaꞌ Tebupun ineh nenier Neneh. 21 gIdih Yesus nengimun febala nedeh, “Bang eco sinih, nangunneh luk ineuꞌ-Kuh macaꞌ bang Buku Ago ina dih kereb muyuh neninger neneh.” 22 Emung lun felaba awa idih nengemo ku bala-Neh luk felaba doꞌ, idih ideh nefebala, “Na Ieh inih anak Yusuf dih?” 23 Idih Yesus nefebala nedeh, “Keliꞌ rungen muyuh febala Negkuh kudeng inih, ‘Dokter ruen-Muh ngubat moꞌ burur-Muh sibuleng. Ruen-Muh kudeng ineh teh bang bawang-Muh inih, mafad kudeng luk findinger kei ineuꞌ-Muh deiꞌ Kapernaum!’ ” h 24 Yesus nefebala nedeh teh, “Bedén-Kuh tu-tu nemuyuh, na inan seburur nabi fanaꞌ ruen lun ngafuꞌ dingan doꞌ bang bawangneh sibuleng. i 25 Fedingerenngeh, bala-Kuh inih metu, kereb nabi Elia, nerikan teluh setangal lak kinioneh, leu rayeh efut bawang. Kereb ineh mulaꞌ decur tinulaꞌ deiꞌ Israél. j 26 Sagan fanaꞌ kudeng ineh, Allah na nengecuk ni Elia inéꞌ nan waꞌ tinulaꞌ ineh, yehmoꞌ Elia inéꞌ nan seburur decur tinulaꞌ deiꞌ Sarfat, tanaꞌ Sidon. k 27 Kudeng ineh teh kereb nabi Elisa mulaꞌ lemulun deiꞌ Israél mét susud, na seburur fanaꞌ rat arangdeh luk ineuꞌ ngedoꞌ, sebeken rat nan lun Siria ineh, ngadanneh Naaman.” l 28 Emung lemulun bang Rumaꞌ Tebupun ineh felaba useh kereb ideh neninger luk bila-Neh ineh. 29 Ideh netufed idih nengecuk Neneh buro, idih nenguit Neneh inéꞌ inan eceh fifiꞌ fegkung luk inan bawangdeh. Ideh fian mitung Neneh bang ungeb. 30 Yehmoꞌ, Yesus nelemaba arang lun mulaꞌ ineh idih fetecu neburo.
Yesus Nengedoꞌ Lun luk Sinuet Roh Dat
31 Idih Yesus inéꞌ bawang Kapernaum ideiꞌ Galiléa. Yeneh Ieh nemadaꞌ nelun mulaꞌ anid-anid eco Sabat. 32 Ideh felaba awa ku badaꞌ-Neh, ngecehkuh megalih tu bala-Neh. m 33 Bang Rumaꞌ Tebupun ineh teh inan seburur lemulun sinuet sitan. Lemulun ineh arod-arod, 34 “U Yesus lun Nazarét. Enun luk fian ruen-Muh nekei? Iko fian ngukum nekei? Keliꞌkuh idé Iko ineh: Iko ineh Lun meligan luk icuk Allah!” 35 “Firud! Remuat iko rat bang lemulun inih!” keneh bala Yesus ni sitan dih. Idih sitan ineh nemefet lemulun ineh fa kiung emungdeh, idih neremuat rat bang lemulun ineh dingan na ngét neneh. 36 Emung lun mawa, idih nefebala nan seburur dingan seburur beken, “Buraꞌ feh gali bala ni-Neh. Dingan eleb-teteb idih lalud Ieh nengecuk waꞌ roh dat ineh neremuat, idih ideh neremuat.” 37 Idih bala ku Yesus meburung efut emung bawang ineh.
Yesus Nengedoꞌ Lun Mulaꞌ
38 Idih Yesus neremuat rat bang Rumaꞌ Tebupun ineh idih inéꞌ rumaꞌ i Simon. Iban decur i Simon kereb ineh medadem. Lemulun luk idih bang rumaꞌ ineh mutuh ni Yesus felé Ieh ngedoꞌ neneh. 39 Yesus inéꞌ tufed iring decur ineh idih nengecuk dadem ineh buro. Iban i Simon ferecu nedoꞌ idih netumui idih nengerimo nedeh. 40 Kereb eco mecep, emung lemulun ferigeiꞌ nenguit kinanakdeh luk nengaca refut-refut luk mét eméꞌ matun ni Yesus. Yesus nengerereng ticuꞌ-Neh lun anid-anid bururdeh idih nengedoꞌ nedeh. 41 Rat arang lun mulaꞌ ineh, inan teh sitan-sitan neremuat idih sitan-sitan ineh nengitang, keburiꞌdeh, “Iko inih Anak Allah!” Yesus nengarod nedeh idih nemepeng nedeh felé na febala ngecehkuh ideh nekeliꞌ ku Yesus ineh Kristus.
Yesus Madaꞌ bang Bawang-bawang Beken
42 Kereb eco mageh macang Yesus nenacan bawang Kapernaum inéꞌ su luk ali-ali. Yehmoꞌ, lun mulaꞌ nenakap ni Yesus. Kereb ideh nefafuꞌ Neneh, ideh fian felé Yesus na nacan nedeh. 43 Yehmoꞌ, Yesus nefebala, “Ago luk Doꞌ ku Kuyut Allah, bedén-Kuh teh bang bawang-bawang beken, ngecehkuh inehngeh Allah nengecuk Negkuh eméꞌ tungéꞌ.” 44 Ku ineh Yesus nemadaꞌ Ago bang Rumaꞌ-rumaꞌ Tebupun efut bawang Yudéa.