Yesus Tinganak
2
1 Kereb idih Kaisar Agustusa nengecuk felé emung lemulunb luk idih fa liang kuyut Kekaisaran Roma eméꞌ madaꞌ ngadandeh ruen ngiap. 2 Iap luk fun-fun inih ineuꞌ kereb Kirenius inéꞌ ku Gubernur Provinsi Siria. 3 Emung lun kereb idih inéꞌ madaꞌ ngadandeh felé yuden bang anid-anid bawang tefundeh. 4 Yusuf fanaꞌ inéꞌ rat bawang Nazarét ideiꞌ wilayah Galiléa, inéꞌ bawang Bétléhém ideiꞌ wilayah Yudéa, luk inan racaꞌ Daud tinganak, ngecehkuh Yusuf ineh inul racaꞌ Daud. 5 Yusuf inéꞌ madaꞌ ngadanneh ruen ngayud febayaꞌ dingan i Maria tudukneh luk kereb idih batek rayeh. 6 Kereb didueh deiꞌ Bétléhém magehneh i Maria nenganak feh. 7 Ieh nenganak Anak delei, Anak tutuꞌneh. Idih Maria nengelebin ne-Neh ku kibung tefin, rirengneh Ieh bang tabau luk nan keledai kuman, tifin ku gerami, ngecehkuh na luk inandeh rucu.Waꞌ Gembala Domba
8 Na mado rat yeneh, kereb malem ineh inan tudaꞌ-tudaꞌ gembala nematar dombadeh nan laman. 9 Danak-danak malaikat Tuhan netufed muneng nedeh, nesigalaꞌ nedeh, rasat Allah nengacang libutdeh idih ideh felaba tot. 10 Buriꞌ moꞌ malaikat dih nedeh, “Eleg muyuh metot, ngecehkuh uih ngecing bala luk doꞌ, luk ngawang niat emung lemulun. 11 Eco sinih bang bawang Daud fengeh tinganak Lun Ngulun, yeineh Kristus, Tuhan. c 12 Inih tanuꞌneh, muyuh mefafuꞌ eceh anak beruh tinganak luk linebin ku kibung tefin, idih rireng bang tabau luk nan keledai kuman.” 13 Danak-danak galaꞌ moꞌ seruyud malaikat Surga fad-fad dingan malaikat luk ina dih, ideh nengubur Allah, keburiꞌdeh,
14 “dEmung rayeh kuan Allah ideiꞌ Surga luk felabaditaꞌ,
Idih awang lun tanaꞌ kuan lemulun luk finian Allah.”
15 Sefengeh waꞌ malaikat nenacan waꞌ gembala nuliꞌ inéꞌ Surga, idih waꞌ gembala nefegayam, “Doꞌ teu eméꞌ Bétléhém nier enun luk nangun ideiꞌ, kudeng luk fengeh bidaꞌ Tuhan neteu ina dih.” 16 Idih ideh ferecu inéꞌ fafuꞌ ni Maria didueh Yusuf, idih nenier Anak ineh luk telubid bang tabau luk nan keledai kuman. 17 Kereb waꞌ gembala nenier Anak ineh, idih ideh nemadaꞌ emung luk bila malaikat nedeh ku Anak ineh. 18 Emung lun mawa tutu neninger luk bila waꞌ gembala ineh. 19 Yehmoꞌ, Maria nengenug emung bala ineh bang niatneh idih nengerawé neneh doꞌ-doꞌ. 20 Waꞌ gembala nelemubed idih nengubur, nengerayeh ngadan Allah, ngecehkuh luk findinger idih sinierdeh, emungneh mafad kudeng luk bidaꞌ malaikat nedeh dih.
Yesus Biré Kuan Tuhan
21 Umur Anak ineh fatap waluh eco kerebneh Ieh ruen sunat. Ineuꞌ ngadan-Neh Yesus, yeineh ngadan luk bidaꞌ malaikat kereb na teh tinan-Neh maliꞌ ne-Neh. e 22 Fatap afat ngefuluꞌ eco sefengeh Yesus tinganak, mecingneh kereb Maria nengeligan ulunneh mayaꞌ Ukum Torat Musa. Kereb ineh teh ideh nenguit ni Yesus inéꞌ Yerusalém idih nemeré Neneh kuan Tuhan, f 23 mayaꞌ luk inayud bang Ukum Tuhan, “Emung anak delei tutuꞌ berén tutu kuan Tuhan.” g 24 Idih Maria nemeré lua mayaꞌ kudeng luk titen bang ukum Tuhan yeineh dueh suit sukur, miek teh dueh anak suit merpati. 25 Kereb idih ideiꞌ Yerusalém eceh lemulun ngadanneh Siméon. Ieh ineh lemulun luk doꞌ, mefiteb mayaꞌ bala Tuhan, nenginulat kereb Allah meré fuit kuan Israél. Roh Meligan idih bang ulunneh, 26 idih Roh Meligan fengeh nemadaꞌ neneh, kereb na teh ieh maté, atun ieh nier Kristus, Luk finiliꞌ Tuhan. 27 Roh Meligan nenguyut Siméon nesemuet bang natad dalem Rumaꞌ Allah. Kereb idih Yesus nuit taman-tinan-Neh felé ideh meré luk berén kuan Tuhan kudeng luk litep bang Ukum Torat, 28 Siméon nengabin Anak ineh idih nengubur Allah, 29 “Nekinih, saganneh demulun-Muh inih maté dingan awang kudeng luk fengeh bila-Muh, 30 ngecehkuh matehku sibuleng fengeh nenier Anak inih luk muit lemulun rat nan ukum Allah, 31 luk ineuꞌ-Muh teminaꞌ kuan emung fufu lun tanaꞌ, 32 yeineh acang luk ngegalaꞌ dalan-Muh kuan fufu beken lun tanaꞌ, idih eméꞌ ku ubur kuan fufu-Muh Israél.” h 33 Idih taman-tinan-Neh felaba awa ku emung luk bila ku Ieh. 34 Fengeh idih Siméon nengeferuan nedeh idih nefebala ni Maria, tinan Anak ineh, “Anak inih fengeh finiliꞌ Allah. Ngecehkuh anak inih, mulaꞌ lun Israél mefuit; kudeng ineh teh mulaꞌdeh kumin. Ieh miek mangun ku eceh tanuꞌ rat nan Allah, luk ruen lun mulaꞌ ngilang, 35 ngecehkuh Anak inih ngegalaꞌ emung terawé dat luk bang niatdeh. Idih Siméon nefebala ni Maria teh, Nafeh iko meleso niat kudeng tipek ku felefet luk metadem.” 36 Inan teh selemulun nabi decur luk remarar tu-tu. Ngadanneh Hana, anak Fanuél, rat inan fufu Asyér. Sefengeh tuduꞌ lak nengaweh, 37 Hana inéꞌ ku tinulaꞌ, idih nekinih ulunneh waluh ngefuluꞌ afat lak. Na tufu ieh nenacan Rumaꞌ Allah. Tebeco kedangan ieh netebupun yeneh dingan nesembayang idih nemawaꞌ mutuh rat nan Allah. 38 Kereb ineh teh Hana necing, ieh nengubur Allah. Hana nefebala ku Anak ineh inan emung lemulun luk nenginét kereb Allah muit Yerusalém ratnan luk dat. 39 Sefengeh i Maria nengeligan ulunneh idih didueh Yusuf nemeré anak ineh nan Allah mayaꞌ Ukum Tuhan, idih ideh nuliꞌ inéꞌ Nazarét ideiꞌ Galiléa. i 40 Anak ineh nerayeh idih metueh. Ieh mileh tutu idih eiꞌ Allah lutep lun-Neh.
Yesus bang Rumaꞌ Allah
41 Anid-anid lak taman-tinan Yesus inéꞌ Yerusalém kereb eco rayeh Paskah. j 42 Kereb ulun Yesus fuluꞌ dueh lak, ideh inéꞌ ku irau Paskah ineh mafad kudeng luk fekalai ruendeh. 43 Kereb nabud eco irau ineh, didueh nuliꞌ, yehmoꞌ Yesus netudo ideiꞌ Yerusalém, na nekeliꞌ taman-tinan-Neh. 44 Ideh nengerawé Yesus nuliꞌ nefebayaꞌ ruyud lun mulaꞌ dih. Fengeh tebeco neh lawédeh, idih didueh nenakap Neneh arang fufu, rurum, idih emung kinanak luk idih dingandeh. 45 Ngecehkuh na nefafuꞌ Neneh, didueh nelemubed inéꞌ Yerusalém nenakap Neneh. 46 Sefengeh teluh eco ideh nefafuꞌ Neneh bang Rumaꞌ Allah. Yesus netudo arang uned tudaꞌ-tudaꞌ guruꞌ Yahudi idih neninger luk beléndeh. Ieh nengitun-ngitun nedeh. 47 Emung lun luk neninger Neneh felaba awa ngecehkuh ileh idih or-Neh luk metu. 48 Taman-tinan-Neh fanaꞌ negagap nenier Neneh, idih tinan-Neh nefebala Neneh, “Asi, nengudeh Iko nengeneuꞌ luk kudeng inih nekei dueh? Keidueh i tamam merafang nakap ne-Muh.” 49 Bala Yesus nedidueh, “Ngudeh muyuh nakap Negkuh? Na keliꞌ medueh, keliꞌ rungenneh Uih tudo bang Rumaꞌ Yamaꞌ?k” 50 Yehmoꞌ, taman-tinan-Neh na keliꞌ enun ilung bala luk belén-Neh nedeh. 51 Idih Yesus nuliꞌ febayaꞌ taman-tinan-Neh inéꞌ Nazarét, setecuneh Ieh lutep mayaꞌ asuh didueh. Maria nengerawé emung luk nangun ineh. 52 Yesus eméꞌ rayeh-rayeh feh, melun mileh idih mefiteb, idih melunneh awa Allah Neneh, kudeng ineh teh lemulun mawa Neneh. l