AGO DOꞌ LUK INAYUD
LUKAS
Fingimun
1
1 Lun rayeh, Théofilus. Mulaꞌ lun nenutun ngayud burung luk fengeh nangun arang teu. 2 Ideh nengayud mafad kudeng luk fengeh ineuꞌ ngecing neteu. Ideh luk rat fun nenier enun-enun luk nangun idih nengecing burung ineh eméꞌ yafeh-yafeh. 3 Sefengeh uih nengelio enun-enun luk nangun rat fun ineh, uih nengayud burung inih doꞌ-doꞌ kuanmuh, Théofilus, 4 felé iko keliꞌ ku emung luk fengeh bidaꞌ nemuh ineh metu.Badaꞌ Ku Eco Tinganak Yohanés Pembaptis
5 Kereb Herodés racaꞌ deiꞌ bawang Yudéa, inan eceh imam ngadanneh Zakharia rat nan ruyud Abia. Awan i Zakharia ngadanneh Elisabét. Ieh fanaꞌ inul imam Harun.a 6 Didueh mulun doꞌ fa kiung Allah idih mayaꞌ emung-emung ecuk Tuhan. 7 Yehmoꞌ, na anak didueh ngecehkuh Elisabét na miek maliꞌ idih didueh fanaꞌ fengeh mengered. 8 Bang seeco, kereb waꞌ fufu Abia nekeneh bapat ngekem bang Rumaꞌ Allahb, Zakharia nengedalan kekemen imam fa kiung Allah. 9 Kereb ideh nengundi, kudeng luk fekalai ruen waꞌ imam nan ngeletep luk ngalap bapat ngekem bang Rumaꞌ Allah, Zakharia nekeneh bapat semuet bang Rumaꞌ Allah idih nengeseb kemenyan yeneh kuan Tuhan.c 10 Kereb kemenyan fengeh iseb, lun mulaꞌ sembayang deiꞌ luar. 11 Kereb ineh teh malaikat Tuhan nesigalaꞌ ni Zakharia. Malaikat ineh netufed fa tinueh su luk nan nengeseb kemenyan kuan Allah. 12 Zakharia felaba gagap idih metot. 13 Yehmoꞌ, malaikat ineh nefebala neneh, “Zakharia, eleg metot, ngecehkuh sembayangmuh fengeh findinger Allah. Nafeh, awanmuh, Elisabét, mebatek idih nenganak eceh anak delei. Ruenmuh ngadanneh Yohanés. 14 Iko felaba awang niat idih lun mulaꞌ teh mawang niat kereb anak ineh fengeh tinganak nafeh. 15 Ngecehkuh ieh mangun ku lun rayeh fa kiung Tuhan idih ieh na ngirup burak. Rat kereb tinganak ieh fenuꞌ ku Roh Meligan. d 16 Mulaꞌ lun Israél itenneh lemubed eméꞌ nan Tuhan, Allah-deh. 17 Ieh mangun ku lemulun luk icuk Tuhan. Ieh metueh idih melalud kudeng Elia. Ruenneh fedoꞌ waꞌ taman dingan waꞌ anakneh idih lun luk dat ulun ruenneh nguned terawédeh. Kudeng ineh ieh nguit lemulun felé muned ulun idih teminaꞌ ngafuꞌ Tuhan.” e 18 Bala Zakharia nan malaikat ineh, “Kudeng afeh uih keliꞌ ku balamuh inih mangun? Uih inih fengeh mengered, kudeng ineh teh awankuh.” 19 Or malaikat ineh, “Uih inih Gabriél, malaikat luk ngekem kuan Allah. Allah nengecuk negkuh ngecing bala doꞌ inih kuanmuh. f 20 Mecing kerebneh nafeh, luk icingkuh nemuh inih mangun. Yehmoꞌ, ngecehkuh iko na menu, nafeh iko mebegkeh; iko mebegkeh mecing emung luk bilakuh inih mangun.” 21 Kereb ineh lun mulaꞌ mio nengenét ni Zakharia. Ideh nenginawa ngecehkuh ieh felaba io bang Rumaꞌ Allah. 22 Kereb ieh neremuat, na mekebalaneh nedeh ngecehkuh ieh nebegkeh feh. Ku idih nekeliꞌ ideh neh ku Zakharia nefafuꞌ eceh luk nan nenginawa bang Rumaꞌ Allah. 23 Sefengeh kekemneh bang Rumaꞌ Allah, Zakharia nuliꞌ inéꞌ rumaꞌneh. 24 Na mio sefengeh ineh, Elisabét, awanneh mebatek, idih limeh bulan kinioneh ieh na tufu neremuat rat bang rumaꞌ. 25 Bala Elisabét, “Nekinih Tuhan fengeh nengedangan negkuh idih nengiuꞌ iguꞌkuh fa kiung waꞌ lemulun.” g
Ago Ku Yesus Tinganak
26 Bang bulan luk keenem batek Elisabét rat funneh maliꞌ, Allah nengecuk malaikat Gabriél eméꞌ Galiléa bang bawang Nazarét, 27 inéꞌ iring eceh anak adiꞌ melulum, na nefemung nan delei, luk tinuduk i Yusuf, rat nan fufu i Daud, ngadan anak adiꞌ ineh Maria. h 28 Malaikat ineh nesemuet bang rumaꞌ i Maria, kebalaneh, “Maria, samalmuh teh, feruan rat nan Allah idih kuanmuh, Tuhan idih dinganmuh tecu-tecu.” 29 Maria negagap neninger bala Malaikat ineh idih nefebala bang niatneh, “Enun ilung bala Malaikat ineh.” 30 Malaikat ineh nefebala ni Maria, “Eleg metot Maria, ngecehkuh iko nefimaran feruan rat nan Allah. 31 Fedingeren doꞌ-doꞌ! Iko nafeh mebatek idih nenganak eceh Anak delei, ruenmuh ngadan-Neh Yesus. i 32 Ieh eméꞌ ku Lun Rayeh luk meburung idih lun neten ngadan-Neh Anak Allah Luk Felabaditaꞌ. Nafeh Ieh ruen Tuhan Allah eméꞌ ku Racaꞌ mafad kudeng Racaꞌ Daud tefun-Neh. j 33 Ieh eméꞌ ku Racaꞌ kuan inul Yakub seruked-rukedneh idih Kuyut-Neh na kekifedneh.” 34 Maria nefebala nan malaikat ineh, “Kudeng afeh ineh miek mangun lun ulunkuh, ngecehkuh uih anak adiꞌ melulum, na tufu nefemung nan delei?” 35 Malaikat ineh nengor bala i Maria, “Mecing kerebneh nafeh Roh Meligan temurun bang ulunmuh idih lalud Allah Luk Felabaditaꞌ idih dinganmuh teh. Ku ineh feh, Anak luk tinganak ineh nafeh tetenen Meligan, Anak Allah. 36 Teruaienmuh, Elisabét fanaꞌ fufumuh ineh, mebatek anak delei sagan fanaꞌ ieh mengered; inih bulan keenem batekneh, ieh luk labaꞌ inih belén lun na anak. 37 Ngecehkuh mayaꞌ finian Allah, enun fanaꞌ miek mangun.” k 38 Idih Maria nefebala, “Uih inih demulun Tuhan, mangun moꞌ luk negkuh mafad kudeng balamuh ineh.” Sefengeh idih Malaikat ineh nenacan ni Maria.
Maria idih Elisabét
39 Na mio sefengeh ineh, Maria inéꞌ bang eceh bawang lun fegkung deiꞌ Yudéa. 40 Ieh inéꞌ rumaꞌ Zakharia idih kereb nesemuet, ieh nemeré tabiꞌ kuan Elisabét. 41 Kereb Elisabét neninger bala i Maria, anak luk bang batekneh sigio mawang niat, idih kereb ineh Elisabét nefenuꞌ ku Roh Meligan. 42 Ferecu ieh nengor dingan ngitang, “Allah fengeh nengeferuan nemuh melun ratnan waꞌ decur beken!l Feruan Allah teh kuan anak luk nafeh ruenmuh nenganak ineh! 43 Buraꞌ feh samalkuh tinan Tuhankuhm eméꞌ ngikak negkuh? 44 Maria, kereb uih neninger tabiꞌmuh, anak luk bang batekkuh sigio mawang niat. 45 Samal kuanmuh, ngecehkuh iko fengeh menu ku luk bila Tuhan nemuh ineh mangun!”
Maria Ngubur Allah
46 Maria nefebala, “Uih ngubur Tuhan, n 47 idih uih felaba awang niat ngecehkuh Allah nemuit negkuh rat nan ukum salaꞌ. 48 Ieh na mekelufan negkuh, demulun-Neh luk masiꞌ. Rat eco sinih emung lemulun febala ku uih doꞌ feruan. 49 Ngecehkuh Allah Luk Felabalalud fengeh nengeneuꞌ eceh luk rayeh nangun bang ulunkuh. Allah ineh meligan. 50 Nan emung inul lemulun, Tuhan nengegalaꞌ eiꞌ-Neh kuan lun luk mayaꞌ Neneh. 51 Ieh nemadaꞌ lalud-Neh, dingan enun luk ruen-Neh. Ieh nengatad idih nengusag waꞌ lemulun luk meditaꞌ niat. 52 Racaꞌ-racaꞌ ruen-Neh ngebeneh, lun luk mebeneh niat ruen-Neh ngeditaꞌ. 53 Refut-refut doꞌ berén-Neh kuan lun masiꞌ, yehmoꞌ lun kaya duken-Neh buro na binaweh. 54 Ieh nenangan lun Israél, demulun-Neh ineh, ngecehkuh Ieh lutep ngimet janiꞌ-Neh. 55 Kudeng luk nefengeh finjaniꞌ-Neh nan tefunteu Abraham idih inulneh mecing seruked-rukedneh.” o 56 Maria netudo yeneh lélé teluh bulan kinioneh dingan Elisabét. Sefengeh ineh ieh nuliꞌ inéꞌ rumaꞌneh.
Eco Tinganak Yohanés Pembaptis
57 Mecingneh kereb Elisabét nenganak. Ieh nenganak eceh anak delei. 58 Kereb kinanak-kinanak idih lun luk muneng iring rumaꞌneh ninger ku doꞌ Tuhan ni Elisabét, ideh mawang niat teh dinganneh. 59 Waluh eco sefengeh anak ineh tinganak, ideh inéꞌ nyunat neneh. Ideh fian ngeneuꞌ ngadanneh Zakharia mayaꞌ ngadan tamanneh,p 60 yehmoꞌ tinanneh nefebala, “Na! Yohanés ngadanneh ruenteu.” 61 Ideh nengor balaneh, “Na luk idih sebuleng fanaꞌ kinanakmuh ngadanneh kudeng ineh.” 62 Idih ideh nengayut nan taman anak ineh, i Zakharia, nengitun ku enun ngadan luk fian berénneh nan anakneh ineh. 63 Zakharia nemutuh eceh batuh luk nan ngayud, idih ieh nengayud, “Ngadanneh Yohanés.” Idih emungdeh feh nenginawa. 64 Kereb ineh teh Zakharia miek nefebala feh idih nengubur Allah. 65 Metotneh emung lemulun luk idih kereb ineh, idih bala ku luk nangun ineh nedinger lun efut fegkung bawang Yudéa. 66 Ideh luk neninger burung ineh nengerimaꞌ idih nefebala bang niatdeh, “Eméꞌ ku enun anak ineh nafeh?” Ngecehkuh Tuhan ngedangan neneh.
Zakharia Ngecing Bala rat nan Tuhan
67 Zakharia, taman i Yohanés, nefenuꞌ ku Roh Meligan idih nengecing bala rat nan Tuhan. Ieh nefebala, 68 “Doꞌ teu ngubur Tuhan, Allah Israél! Ieh fengeh necing nangan neteu idih muit neteu rat nan bunuꞌ. 69 Ieh nemeré Lun Ngulun luk melalud kuan teu rat Inul Daud demulun-Neh ineh.q 70 Mon rigaꞌ tanaꞌ, mayaꞌ bala nabi-nabi luk finiliꞌ-Neh, Tuhan nefejaniꞌr 71 muit neteu rat nan bunuꞌ teu idih rat nan emung lun luk dat neteu. 72 Allah nefejaniꞌ tutu ku madaꞌ eiꞌ-Neh nan tefun teu; janiꞌ-Neh ineh lutep ruen-Neh ngimet. 73 Ieh nefejaniꞌ ni Abraham tefun teu,s 74 muit neteu rat nan bunuꞌ-bunuꞌ teu, felé teu na metot kereb ngekem kuan Allah, 75 idih teu miek mulun metu mayaꞌ bala Tuhan seruked ulunteu. 76 Iko, anakkuh, tetenen nabi rat nan Allah Luk Felabaditaꞌ. Iko icuk Tuhan nepuꞌ dalan atun kuan-Neh, t 77 ku madaꞌ nelun fufu-Neh, ideh miek mefuit rat nan ukum salaꞌ kudeng Allah ngiuꞌ emung salaꞌdeh. 78 Allah teu meiꞌ idih mawa neteu, kuidih Ieh mecing eméꞌ muit neteu rat nan ukum salaꞌ. Kudeng mateheco luk masat kereb fakak, 79 kudeng ineh Ieh meré acang-Neh kuan emung lemulun luk mulun bang decem idih fenuꞌ ku tot. Ieh nguyut neteu mayaꞌ dalan eméꞌ su luk fenuꞌ ku awang niat.” 80 Anak i Zakharia ineh netemubuꞌ eméꞌ rayeh idih Allah nengetueh rohneh. Ieh netudo nan fayeh bada luk metudal mecing kerebneh ieh nesibadaꞌ nedeh lun Israél.