Noho Nin Ma Namwali i

Nohe Nin Ma Namwali Dedesne

Horok Lirna La'an

Horok eniyeni konohi panaeku wo'ira maika: Hi'ihehewi noho wawan noro a'am nin ma namwali, hi'ihehewi ri mormori dedesne namwali, hi'ihehewi dohohala dedesne namwali la nakoko ri mormori na'akeme hi'i dohohala la lernala apinpinha wo'operperi, la hi'ihehewi Makromod Lalap hi'i wewhe Nin panaeku noro ri mormori. Horok ‘Nohe Nin Ma Namwali Dedesne’ eni ha'ar namwali hana'arne woro'o ma na'onno. Hana'arne dedesne kukunohi maika hi'ihehewi Makromod Lalap nakuku noho la naleu a'am na'akeme, la hi'ihehewi An umupala ri mormori, la konohi maika ri mormori dedesne rira ope. Mai eni ik lese Adam noro Hawa rira morimori, Kain noro Habel rir morimori, Nuh noro oir rulu lalap, noro inhawa ma namwali noro manara Babel (pnk. 1-11). Hana'arne woro'o nine kukunohi maika ha ma namwali noro ri Israel dedesne noro rir ope. Ri Israel dedesne ida naran Abraham, la ai onne naran pe'eredi ono ai akin namkene naili'il la derne nakani Makromod Lalap. Ik les inhawe namwali noro Abraham anan Isak noro Isak anan Yakup (man wewekel Israel haenihi). Horu, ik lese wanakunu ma na'onno Yakup ananhe mo'oni idaweli woro'o ma namwali Israel nin luhu idaweli woro'o enihe. Ri ida nano hi naran Yusup. Ai onne lernala rere'e haharu man lap narehi nano mo'onwalin namehin la lolo horok eni honon ik lese hi'ihehewi Makromod Lalap nair Yusup leke hari kalla Yakup noro nakar raram na'akeme rahala kemen nano noho roulara rei laa noho Mesir (pnk. 12-50).

Kade horok eniyeni loikaru ri mormori dedesne rir wanakunu, maa nano horok kalari rakan honon ik kauroin nahenia Makromod Lalap penia man hi'i ha wo'ireni namwali, la Ai namkene kukul aki man wa'an Nin ri. Ik lese horok eni kauroin Makromod Lalap eni inhoi, la kauroin Ai penia man ho'ok kail la nala hunukum ri man hi'i yaksala, Ai nala nounaku la paku Nin ri, la nakoko noho-noho hair-hair hi'i lernohi Ainin panaeku. Makromod Lalap nala horok eniyeni leke na'ori honorok ika ri mormori hi'ihewi ri nonolu eni akin naili'il Makromod Lalap, la paku ika leke ik akin naili'il Ai haenihi.

Horok Ihin

1. Makromod Lalap nakuku noho naleu a'am la umupala ri mormori dedesne (1:1-2:25).

2. Ri mormori hi'i dohohala dedesne, de lernala hunukum lernohi rir dohohala (3:1-24).

3. Wanakunu ma na'onno Adam upun anan rakan Nuh (4:1-5:32).

4. Makromod Lalap nahaledi Nuh noro nakar raram nano oir rulu lalap (6:1-10:32).

5. Makromod Lalap nawokor nakaliyedi ri mormori rir wanakunu penia manara Babel ka namwali (11:1-9).

6. Wanakunu ma na'onno Sem upun anan rakan Abram (11:10-32).

7. Wanakunu ma na'onno Israel upun a'an Abraham, Isak, Yakup (12:1-35:29).

8. Wanakunu ma na'onno Esau upun ananhe (36:1-43).

9. Wanakunu ma na'onno Yusup noro mo'onwalinhe (37:1-45:28).

10. Wanakunu ma na'onno lere ri Israel minle Mesir (46:1-50:26).