Rut 1

Rut

Naomi naupanna Rut noro Orpa

1-2 Nonolu lere noho Israel nina ma naho'ok nakail rodi molollo, noho Kana'an lernala noho lara lap. Lere onne mo'onida aile naran Elimelek. Ai eni namhara nano luhu Eprata, la minle Betlehem lolo noho Yehuda. Noho lara lap de noro hono Naomi, anan mo'oni woro'o Mahlon noro Kilyon ramhara Betlehem rala'a laa hair namehin ma naran Moab leke minala tarana lolo enne. 3 Hir minle Moab onne, ka nalo'ol Elimelek maki, de Naomi noro anan woro'o enihe memehedi me'e. 4 Ananhe ramwaliyedi manaikaka, hir hoo noro noho Moab nina maekrara woro'o, ida naran Orpa, la ida naran Rut. Hir min lolo onne anna idaweli me'e ne, 5 anan mo'oni woro'o enihe maki haenihi, de Naomi memehedi ono hono noro ananhe makiyedi me'e.

6 Enla Naomi derne nahenia Makromod namre'e namharu Nin ri lolo noho Israel penia noho lara lap horuwedi me'e de rira kirna ihin ennen nammori. Ende an hi'i kenekrohu namhara noho Moab wali wali'ur laa noho Yehuda lolo noho Israel, la panin woro'o enihe lernohi haenihi. 7 Hi ramharedi noho onne rala'a laa noho Yehuda. 8 Hir rakan kalla toro Naomi hopon ma'eke woro'o onnenihe na'aheni, “Inaihe, wali wali'ur laa minima meheromo mememen here. Ya apanak Makromod Nala Nina raramyake ki mi naise mi maledi maya'u noro mi houm me'eni. 9 Na'amoli Makromod namre'e namharu mi lernala ihiwali rarwali leke mim hoo wali'ur la mamwali popono orereki man holi moiliwi mahuwele. Naomi na'aheni heheni horu, an masiyedi hi la konohiyala rahina'ar, maa hi rahere raruri. 10 Hi ra'aheni, “Yono mame! Ainima panaeku lernohi mama, wali wali'ur laa mama nina nohe!” 11 Enimaa Naomi ne'el panin woro'o enihe na'aheni, “Wa'an rehi mim wali wali'ur laa minima meheromo mememen. Alhi'ihepe lernohi ya'u laa noho Yehuda? Ainu'u lere mormoriyana horuwedi me'e, de hi'ihehewi ya'u moriyana wali'ur leke more hoo? 12 Wali wali'ur laa numa meheromo mememen. Ya a'ileheredi me'e de lo'o ka'u hoo me'e, maa lo'o ya'u hoo wali'ur lere eniyeni la moriyana tatana mo'oni, 13 hi'ihehewi mim lapan tatan onne ramwali manaikaka leke more hoo? Nalo'ol rehi! Yono hi'i de inhawa ma namwaliyedi maya'u me'e onne hi'i mi kam hoo ri. Yono! Yon hi'i heheni, kalo'o mim lernala wewerek pananaka wali'ur ono Makromod nala apinpinha maya'u! Lo'o onne namwali ki mi, hi'i ya'u raram eren pepenu.”

14 Woro'ohe derne Naomi nina wanakunu eni, eren rahehere. Enine Orpa masiyedi Naomi, la konohiyala, nala'a me'e, maa Rut namhene naloi panin. 15 Naomi na'aheni, “Loi honorok wawa'an! Laurme waliyedi laa nina nakar raram mememen noro nina noho makromon me'e. Wa'an rehi lernohi ai wali here haenihi.”

16 Enimaa Rut walha na'aheni, “Yon hopon ya ala'a, ya amhene ahinuri nano mame! Ainu'u panaeku ya'u lernohi mama mamani! Mama laa ewi-ewi mano ya'u laa haenihi. Mama min lolo ewi, ya'u min lolo onne haenihi. Mama nina ri, namwali ainu'u ri, la Mama nina Makromod Lalap namwali ainu'u haenihi. 17 Enla Mame nina lere horu lolo ewi, ya'u min lolo onne rakan ainu'u lere horu, la himpai manaku ya'u ihin kemen lolo noho onne haenihi. Ainu'u panaeku min noro mame wewerre rakan ya'u maki, maa lo'o ka'u lernohi ainu'u nou eniyeni, ya apanak Makromod nala hunukum man werek maya'u.

18 Enine Naomi nauroinedi Rut hi'iyedi kenekrohu lernohi laa Yehuda, de kan wakunu me'e.

19 Kame'ede woro'ohe rala'a laa kota Betlehem me'e. Rakanedi Betlehem ne, kota ne'en raram na'akeme man po'on ai, rahumarnedi, la maeke na'akeme ida ma na'ukani ida na'ahenia, “Eih! Hi'ihehewi? Namlolo kokkoo e'eni Naomi, ee ka?”

20 Naomi walha nahenia, “Yon mapolu ya'u Naomi me'e (naran Naomi onne napa'ahne ‘Ma nahuwa'an aki’), maa mapolu ya'u Mara (napa'ahne ‘Meru’) ono Makromod Lalap Ma Nodi Molollo Narehi Nalewen naledi apinpinha man werek maya'u me'e. 21 Ya amhara noho eni, odi hawo'ire kukkuku noknokor maa ors eni ya'u wali wali'ur mai, ya a'alehe amlinu, ono Makromod na'okuledi ya'u me'e la Ai Ma Nodi Molollo Narehi Nalewen naledi apinpinha nammori maya'u haenihi, de yon mapolu ya'u Naomi me'e.” 22 Wanakunu eniyeni na'onno Naomi noro panin Rut (manin Moab onne) rira mormori lere hir wali mai Naomi nina noho Yehuda, kote Betlehem. Lere hir rakan Betlehem onne, manin lolo onne rira lere alam hari kalla ra'ili radai gandum.

Jelai (1:22)