50
Yusup wali kemen laa aman, nahere, masi aman oin makan. 2 Enla an hopon ri ma nadedem komon maki kemen enihe rodi awa'ar kadi kemen leke yon yaka. 3 Hir ilitolle Yakup kemen alam weli'akka raram. (Lolo Mesir nin noho honolla hi radedem ilitolle ri man maki ihin kemen rakan alam weli'akka). Lere alam weli'ikku raram, ri Mesir enihe sus mak oir Yakup nin makimaki.4 Hir sus mak oir Yakup nin makimaki horu ne, Yusup napanak rai nin ri ma nodi molollo lolo nin nakar romleher enihe na'ahenia, “Modi ainu'u nou enie lam konohi rai, 5 ‘Ya am'u nin makimakie na'uraniyedi ne, an nou maya'u nahenia nin lere horu yo odi ihin kemen karu lolo ku'il ma namkenedi lolo noho Kana'an. Ende ya apanak papa rai nala leken maya'u leke i laa karuwedi ya am'u ihin kemen mene wali mai wali'ur noho eni.’ ”
6 Rai nala leken Yusup na'aheni, “Mala'a wawa'anedi! Lam karuwedi o ammu ihin kemen lernohi nina nounou eniyeni.”
7 Ende Yusup noro rai nina ma nodi molollo, leleher lalapa Mesir ne'en raram na'akeme, roro wewerre Yusup lar karu aman ihin kemen. 8 Yusup nin nakar raram, noro lodon walinhe na'akeme laa haenihi, kokoko tatan'ukun roro rira ha mormori mehe hir hoikaruwedi lolo noho Gosyen. 9 Ri nammori ha'a kuda, la heruwali ha'a kareta lernohi haenihi, penia man lisne la'ak onnenihe nammori wake'e.
10 Hir rakanedi Goren-Ha'atad ma na'uranrani oir wauwau Yordan eni (lolo onne ri nadedem ra'amou gandum), hir kanhi wewerre noro malui mahehel. Yusup sus mak oir lere wo'ikku alam wo'ikku. 11 Ri man minle Kana'an po'on sus mak oir lolo Goren-Ha'atad onneni ne, hir polletilu ra'aheni, “Eih! Ri Mesir enihe rira kananhie dudum wake'e.” Ende hir waki onno onne naran Abel-Mizraim (napa'ahne, ‘ri Mesir rir malui mahehel onno’).
12 Ende Yakup ananhe hi'i ha rahu na'akeme lernohi aman nin nounou eni. 13 Hi rodi ihin kemen la noho Kana'an, la karu ku'il Makpela man aile kirna lolo Mamre wali kimur. Kirna onneni Abraham weliyedi nano Efron, ri Het onne, leke namwali nina meheromo rira makileke. 14 Karu aman horu, Yusup noro walinhe roro ri man lisna la'ak na'akeme wilu wali laa Mesir.
Yusup walinhe rapanak hamlinu rira yaksala nonolu
15 Hi aman makiyedi ne, walinhe ida ma ne'el ida na'ahenia, “Hi'ihewi! Iknika pape makiyedi me'e, de lo'o Yusup kan suk noro maika me'e. Lo'o an herre walha iknika hini'i man yaka ai nonolu harome?” 16 Hi ramka'uk Yusup, de hopon ri namehin lan konohi ai na'ahenia, “Pape kan maki makun, an nou nahenia lam konohi Yusup, 17 ‘Ya apanak Yusup hamlinuwedi wallumhe rira dohohala noro yaksala nonolu hir hihi'i eni.’ Ende wallumhe rapanak leke papa hamlinuwedi hirira yaksala hir hi'iyedi nonolu eni, ono hi ramwali man lolo yawa Makromod Lalap man iknik pape horhawe.”
Yusup derne ma nodi walinhe rir lira nou onne horu, ai nahere. 18 Enine walinhe meher mai kadi ein korno yawa kalarna ra'aheni, “Mayai eniyenihe, papa nin hophopon wahwahan.”
19 Yusup na'aheni, “Yom mamka'uk. Ainu'u molollo kaale herre Makromod Lalap amwali man ho'ok kail mi. 20 Nonolu eni mim paeku ha man yaka noro maya'u, maa Makromod Lalap herredi panaeku yaka onne noro ha wawa'an, leke lere eniyeni ri mormori yon maki roulara. 21 Ende yom mamka'uk! Ya'u mehe wayahu wadana mi moro mi anum na'akeme.”
Yusup aran horuwedi
22 Yusup namkene lolo Mesir noro lodon walinhe la upun ananhe. An mori rakan anna rahu idaweli. 23 Ai kan maki makun, an makrana anan Efraim ananhe roro upunhe. An makrana upun Makhir ananhe haenihi. (Makhir onneni Manasye anan). 24 Ai na'ori honorok walinhe, “Ainu'u lere makmaki na'uraniyedi me'e, maa na'amolia Makromod Lalap mehe leluwai makrana mi, nodi mi mamhara noho eniyeni laa noho man Ai nodi hope na'anouwedi Abraham, Isak, noro Yakup me'e.” 25 Enine Yusup hopon lodon walinhe na'akeme rahopedi ai kalarna na'ahenia, “Rakan lere Makromod Lalap nodi nala mi mamhara noho eniyeni mi modi ya'u ihin kemen, la karue ya am'u nin makileke haenihi.”
26 Yusup nin anne rakan rahu idaweli mene maki. Ri ma nadedem komon maki kemen enihe rodi awa'ar kadie leke kemen yono yaka, la loile oplaha manaku lolo noho Mesir.