Yakup nin makmaki na'uraniyedi, de an konohi ananhe ha ma namwali hi lere man mai
49
Rakan Yakup nin lere alam makmaki na'uranrani ne, ai napolu ananhe, “Maiwuku ma'urani ya'u leke ya'u konohi inhawa ma namwali noro mi lere man mai eni.2 Ya an'uhe, maiwuku eni, dernala Israel, mi ammu!
3 Ruben, ya an'u anulue, lere o inum mori o, ya aruri makun, o mamwali ainu'u rurie. O penia ri man lewlewen la naruri narehi ya an'u na'akeme, 4 maa onum morimori naise oir rulu wauwaue ono haida kan kawala o. Ende o ka mamwali anulu me'e, ono o mamkuru noro i hou'u, de ma'amorsedi ainu'u namkuru onno.
5 Simeon noro Lewi ma'umo'onwali. Minima suk modi rae hi'i panaeku man kerhe wewerre. 6 Ya amhene oro mi aikoro wuku panaeku yaka, la ya amhene lernohi minima honopun penepen, ono mi ma'ahan, mi mesne ri, la modi kawe dara arpau ein orokne ma'alehe honorok panaeku man wa'an ida. 7 Makromod Lalap hukum mi, ono mi ma'ahan rehi, la mim owok rehi hi'i ha man yaka narehi heri na'akeme. Ende Makromod Lalap ha'aredi mi lolo noho Israel ne'en raram la lolo Israel upun anan na'akeme, leke yono mamwali luhu mahaku me'e.
8 Yehuda, o walinhe mai rahirawa o kalarum, la ra'uli rasa'a o. O modi limmu kernala onuma arwali enihe lonno. 9 O maisa singa dalu ma namkuru nahinononowedi, la o maise singa man tamakedi ha mormori me'e, de wali laa nin ku'il, la ri na'akeme ramka'uk ra'o'e. 10 O modi molollo mamwali rai, la o upun anumhe rodi molollo laa ewi-ewi rakan lere rai ma nodi molollo narehi mai, la ri na'ahoru derne rakani ai. 11 Lo'o an orok nin keledei lolo anggur onno, kan hi'i haida, ono nina anggur onno onne nammori rehi. Anggur oron nammori rehi, de kan hi'i haida ai nodi anggur oron pahar nina nainair. 12 Makan memere ono nomun anggur nammori, la nihin wawarha ono nomun huhu nammori.a
13 Zebulon, om holi na'urani kahi, la onum herraram namwali kapal nin panaliyonno. Onum nohe nina korono rakan kota Sidon.
14 Isakar, o maise keledei ma naruri. Om warnala noro numa yodie lolo onnida, 15 la om po'onala lolo onne wa'an rehi de o mamhene laa onno namehin. Kade rin hopon om howok naise hophopon wahwahan, maa o me'e moku ma'uware, ono noho onne ma'aruru wake'e.
16 Dan, o modi molollo onum ri wa'awa'an namnenehe Israel nin luhu na'akeme. 17 O maisa haimoke ma aile kalla mamarka arkanne ma namlilinnohi ni'i kude ein, de ma naikoro kude nediyawa lolo kili'ur de ko'orne apinha.
18 (Eih, Makromod! Ya'u mahu lalapan Om huri we'er mayai nano ha man yaka ke'e.)
19 Gad, heri mai leke ra'ahoro ra'arei onum hahaa, maa om wali mohi hi leke ma'ahoro ma'arei rira hahaa wali'ur.
20 Asyer, om lernala hanana'an man ma'aruru wake'e naise rai enihe rira hanana'an.
21 Naftali, o maise rusa iri man mosue, la ri kan kawale. An moriyana ananhe ma'aruru rehi.
22 Yusup, o maise keledei daudaul ma nadedem na'urani oir makan. O maise keledei ananne man larlari lolo wo'or leren. 23 Onum arwali mai, hi ra'ara naruri roro o. Hi rohi o rodi ram ihie, 24 maa o limmu naruri mamkene masala numa ram ihie kerhe, ono Makromod Lalap Ma Narehi Ma Nalewen nala molollo ki o, la Makromod Lalap Man Huri, Man Norle'ule'u Norwaliwali Israel eni nala ruri ki o. 25 Na'amoli Makromod Lalap paku o, la Makromod Lalap Ma Narehi Ma Nalewen namre'e namharu o, la nala okon nano a'am noro oire keul nano yawa. Ai nodi nala o leke o moriyana nammori, num ha mormori moriyana nammori, la num au or'oriyana noro dipin woin noro kirna raram na'ihi nammori. 26 Makromod Lalap ma namre'e namharu maya'u, o ammu, naledi wawa'an rara'a ki o, la wawa'an rara'a onne wa'an narehi nano wo'or-wo'or nonolu ihin ennen. Enla Ai naledi ki o hahaa man wa'an narehi wo'or-wo'or lo'olo'ol eni ihin ennen haenihi. Na'amoli Makromod Lalap namre'e namharu o, la nala ha wo'ira na'akemeni ki o. O penia man wa'an narehi wallumhe na'akeme.
27 Benyamin, o ma'ahoru onum arwali naise ahu merwui ma namlara wake'e. Al'alam ahu onne la nanoin ya'ane, lere helem nodi mai ha'are.”
28 Yakup anan idaweli woro'o eniyenihe ma namwali luhu-luhu Israel. Wanakunu eniyeni rira ame nina nou nodi ha'ar hi meririi, mene maki.
Yakup nin makmaki
29-30 Enine Yakup nou ananhe, “Ka nalo'ol ya aran horu me'e, de modi ya'u la noho Kana'an enne, karu ya'u lolo ik upud a'ad rira ku'il ma aile kirna Makpela lolo leke Mamre wali kimur. Ku'il noro kirna ma namwali makileke onne, Abraham weliyedi nano Efron, ri Het onne. 31 Abraham noro hono Sara, Isak noro hono Ribka karuwedi lolo onne me'e, la ya'u karuwedi Lea lolo onne haenihi. 32 Abraham weliyedi ku'il noro kirneni nano ri man minle Het, de karu ya'u lolo onne!” 33 Yakup nou ananhe horu ne, ai namkuru ekeredi liman ein, aran horuwedi.