Yakup na'onno Yusup anan Efraim noro Manasye
48
Lere li'ur Yusup derne lir anna aman nin kini'ir werek, de ai noro anan woro'o enihe, Manasye noro Efraim, laa ka'ar. 2 Yakup derne hir maiyedi me'e, ai na'aruriyedi kemen, la naikoredi nina leu eni.3 Yakup wakunu noro Yusup na'ahenia, “Nonolu Makromod Lalap Ma Nodi Molollo Narehi Nalewen Na'akeme nalhari kemen maya'u lolo leke Lus man aile noho Kana'an. Lolo onne Ai nodi nala ya'u na'ahenia, 4 ‘Ya ala upun anum nammori leke ramwali noho lalapa ida lolo noho onneni. Ya ala noho eniyeni o upun anum man mamai eni leke hir manarna noho onne rakan laa ewi-ewi.’
5 Ende o anum woro'o, Efraim noro Manasye, ramwali ya an'u mememen. Woro'ohe mori lolo Mesir, maa ka'u rakan lolo enne makun. Ya auroin woro'o enihe ya an'u mememen, namnenehe Ruben noro Simeon. 6 Ende lo'o om lernala tatana mo'oniyana wali'ur, hi ka ramwali ya an'u mememen, maa ramwali o anum, de hir kokala hana'ar nano Manasye noro Efraim. 7 Ya'u hi'i eniyeni ono horokala o inum, Rahel. Ai mala'ala'a kalla nano noho Mesopotamia laa noho Kana'an, kan ko'u nano leke Efrata o inum maki de i karu lolo enne lolo kalla man rodi laa leke Efrata.” (Ler eniyeni Efrata wekel Betlehem.)
8-10 Yakup na'ileheredi me'e, la makan auwedi de ai na'ukani na'ahenia, “Emene eniyenihe inhoi ananne?”
Yusup walha, “Ya an'u eniyenihe Makromod Lalap nala maya'u lolo noho Mesir.”
Yakup na'aheni, “Mala hi ra'urani maya'u leke ya apanak Makromod Lalap nodi nala hi.”
Yusup nala ananhe na'urani laa Yakup, ai nauruku woro'ohe masi.
11 Enla Yakup na'aheni, “Nonolu ka ahinorok me'e yo oro o pakromo wali'ur, maa lere eniyeni Makromod Lalap hari kalla maya'u penia ya'u do'on o anumhe haenihi!”
12 Enime'ede Yusup nala ananhe nano Yakup kalarne, la ai mehen kadi ein korno la yawa lolo aman kalarna. 13 Kadi ein korno horu, ai nala anan woro'o enihe na'urani wali'ur laa Yakup. An lernohi rir noho honolla nala Efraim man karurie laa minle Yakup herne mariri, la ai nala Manasye man anulue la minle Yakup herne malanna. 14 Maa Yakup kan lernohi rira noho honolla de nawaliyedi liman kikan malanne kemenala Efraim uluwakun wawan, la mariri kemenala Manasye uluwakun wawan.
15 Enine Yakup napanak Makromod Lalap nala ma'urinrinna la ma'uwarwara Yusup. Ai na'aheni,
“Ya apanak Makromod Lalap, man Abraham noro Isak rakinali rore,
la ma norle'ule'u norwaliwali la nadiyaka ya'u rakan lere eniyeni,
na'amoli namre'e namharu tatana woro'o eniyenihe.
16 Ya apanak Makromod Lalap ma namwali Hophopon A'am Raram ma nodi nala ya'u nano ha yakyaka rahu na'akeme man ken hi'i sus i kem'u me'eni,
na'amolia namre'e namharu tatana woro'o enihe, leke i naran, Abraham noro Isak naran na'amoli rin wekwekel lolo ewi-ewi,
la na'amoli hir moriyana dariyana nahuwa'an leke eren nammori noho wawan.”
17 Yusup akin ka nahuwa'an po'on aman kemenala liman malanna Efraim uluwakun wawanne. Ende Yusup nasalala aman liman hoi nano Efraim uluwakun laa Manasye uluwakun. 18 Ai na'aheni aman, “Pape yono hi'i heheni. Eni penia tatana man anulue, papa nala liman malanna laa uluwakun wawanne.”
19 Maa aman na'okuledi na'aheni, “Ya auroroin ya'u hi'i inhawa, pa'e. Namlolo kokkoo, Manasye nodi molollo, la upun ananhe ramwali hair lalape haenihi, maa mo'onwalla karurie nodi molollo narehiyedi ai, la mo'onwalla karurie upun ananhe ramwali hair nammori.” 20 Enpenia Yakup na'onnedi Efraim nolu nano Manasye.
Kame'ede ai napanak Makromod Lalap nodi nala woro'ohe wali'ur na'aheni,
“Ma'anana-ma'anana lo'o ri Israel rapanak Makromod Lalap nodi nala ri, hir wekel mi narane. Hi ra'aheni, ‘Na'amoli Makromod Lalap nodi nala mi naise Efraim noro Manasye.’ ”
21 Enine Yakup na'aheni Yusup, “Lo'o om do'on ainu'u makmaki na'uraniyedi me'e, maa ya auroin Makromod Lalap nouwedi nahenia Ai norle'ule'u norwaliwali mi, de nodi mi wali wali'ur laa mi upum a'um rira nohe. 22 Ya ala noho Sikem ki o, maa o wallumhe ka. Yo odi rae noro ram ihie, ahoredi noho man wa'an eniyeni nano ri Amori me'e.”