47
Hir rakanedi Mesir, Yusup lan konohi rai na'ahenia, “Ya am'u noro mo'onwal'uhe na'akeme maiyedi nano Kana'an me'e. Hi rodi rira pipi, sapi noro ha wo'ira, la hi na'akeme aiyedi noho Gosyen me'e.” 2 Enine Yusup norkaru walin wolima laa rakpali rai eni.3 Rai na'ukani hi, “Minima honowok inhawe?”
Hir walha, “Makrommu, mayai eniyenihe man huri pipi naisa ai upum a'um. 4 Am mai holi lolo noho eniyeni, ono noho lara lape Kana'an, la ainima ha mormori na'alehe ya'anhe. Ai mapanak makrommu ke'e hurinohi am holiyala lolo noho Gosyen.”
5 Rai na'aheni Yusup, “Lere eniyeni ammu noro wallumhe maiyedi me'e, 6 de ya'u raram nodi hir holi lolo noho Mesir naise rira noho mememen haenihi. Wa'an rehi hi ramkene lolo noho Gosyen, noho man wa'an wake'e lolo Mesir eniyeni. Enla lo'o ri ma nauroin tolle ha mormori aile, wa'an rehi hopon hi tolle ainu'u ha mormori haenihi.”
7 Enine Yusup noro aman laa rakpali rai, la konohi aman naran. Enine Yakup na'aheni, “Makromod Lalap na'amoli nodi nala papa rai.”
8 Enime'ede rai na'ukani Yakup, “Papa nin anna wo'ira me'e?” 9 Yakup walha, “Rakan lere eniyeni ainu'u anna rahu ida welikelu me'e. Ya'u lalaa mamai mamani, ka amkene onno mahaku. Ainu'u morimori ho'o ne lernala wewerek pananaka la sus nammori. Ende ainu'u anne ka nammori naise ai upum a'um rira anne.” 10 Enine Yakup konohiyala nala'a me'e la na'aheni wali'ur, “Makromod Lalap na'amoli nodi nala papa.”
11 Enla Yusup nala noho man wa'an wake'e ma na'urani kota Rameses leke hir manarne noho onneni, lernohi rai nina honopon eni. 12 Enla Yusup na'akene hanana'an nokor leke aman, lodon walinhe, noro nakar raram na'akeme, ra'an.
Yusup na'olu gandum ono noho lara lapa wake'e
13 Noho lara lapa wake'e makun, de hanana'an kaale rakan lolo ewi-ewi. Ri Mesir noro ri Kana'an um'uma me'e. 14 Akilere hi rodi kupan weli gandum, de Yusup loiwuku nodi lan na'akene lolo rai nina romleu onno. 15 Ende ka nalo'ol, ri Mesir noro ri Kana'an rira kupan horuwedi me'e, de ri man minle Mesir mai ra'aheni Yusup, “Makrom'u, ainima kupan horuwedi me'e, yono huri we'er mayai maki roulare, malala hanana'an mayai ke'e.”
16 Yusup walha, “Minima kupan lo'o horuwedi me'e, de modi minima ha mormori maya'u leke ya ala hanana'an ki mi.” 17 Ende anna onne hi rodi ha mormori na'akeme, kuda, pipi, sapi, noro keledei laa Yusup herre hanana'an.
18 Rakan anna kalari hir mai Yusup wali'ur, ra'aheni, “Am wakunu mouropo makrom'u. Ainima kupan horuwedi me'e, ainima hunuri wana'an makrom'u ninedi me'e. Ai ma'alehe haida-haida me'e. Ai mala inhawa ho'o? Kokoko ai kemmu noro ainima nohe mehe me'e. 19 Makrommu yono huri we'er mayai maki, yono huri ainima kirna namwali noho mamu. Na'amoli ai modi ai kemmu noro ainima noho herre gandum, leke ai kemmu noro nohe papa rai ninedi, la ai mamwali hophopon wahwahan papa rai. Makrommu nala gandum mayai leke ai mo'on, de yon am maki, la ai mapanak wini tarana haenihi leke hapala ainima kirna.”
20 Ende Yusup weli noho Mesir na'akeme rai manarnedi. Ri Mesir na'akeme ra'olu rira nohe, ono noho lara lapa wake'e. Ende noho Mesir na'akeme rai manarnedi, 21 la ri Mesir na'akeme ramwali rai nina hophopon wahwahan, 22 kokoko ma namwali imam noho Mesir mehe ka ra'olu rira nohe, ono nano nonolu eni hir lernala hana'ar nano rai leke rodi tolle rira morimori popono orereki.
23 Yusup konohi manin Mesir eni, “Po'onala, mi kem'u ya'u weliyedi noro minim noho penia rai manarnedi me'e. Ende ya ala wini ki mi leke lam hape minima kirna. 24 Rakan nina lere na'ihi lo'o mim lernala lunu wolima, mala rai eni lunu ida. Enla rehin eni, modi heruwali hi'i wini leke hape, la mala heruwali moro minim nakar raram mo'on.”
25 Hir walha, “Ai mapanak trimkasi nammori, makrommu. Makrom'u na'amoriyedi mayai me'e. Ai me'e mamwali rai nin hophopon wahwahan.” 26 Ende Yusup hi'iyedi kenekrohu lolo noho Mesir: Noho na'ihi na'ene lernala lunu wolima, rai nina lunu ida. Rakan lere eniyeni kenekrohu onneni aile makun, kokoko ma namwali imam noho Mesir, rira nohe mehe rai kan manarne.
Yakup napanak Yusup karu kemen lolo Kana'an
27 Enpenia ri Israel enihe holi Mesir, lolo noho Gosyen. Hi ramwali ri orkanaru la upun ananhe nammori lolo onne. 28 Yakup (rapolu Israel haenihi) holi Mesir anna idaweli wo'ikku, de lere onne nin anna rakanedi rahu ida weli'akka wo'ikku. 29 An rakanedi nin lere alam na'akekeki mamaki eni, napolu anan Yusup, na'ahenia, “Lo'o o maramyaka ya'u, mala o liman loile i pepen mahopedi leke ya auroin kokkoo, kam karu ya'u lolo Mesir eniyeni. 30 Ya'u raram nodi om karu ya'u lolo ik upud a'ad rira makileke, de modi i kem'u nano noho Mesir eniyeni, la karue na'urani hi.”
Enine Yusup walha, “Ya'u hi'i naise inhawa man pap naheheni eni.”
31 Yakup na'aheni, “Mahopedi leke ya auroin om hi'i kokkoo.” Ende Yusup nahopedi. Ai nahopedi horu, Yakup nodi nina au ke'eke'en ke'enale leke namriri na'uli nasa'a Makromod Lalap lolo nin namkuru onno herne.