Yakup noro nakar raram laa holi Mesir
46
Ende Yakup na'akene nin hahaa na'akeme leke noro nakar raram rala'a. Hi rakan lolo Bersyeba, ai nesne ha mormori nodi hoikani Makromod Lalap man aman Isak na'uli nasa'a haenihi. 2 Yakup aile Bersyeba makun ne, a'alam lerida Makromod Lalap nalhari haida an mehen do'on, la napolu, “Yakup! Yakup!”Yakup walha, “Ya, Makrom'u!”
3 Enine Ai na'aheni, “Ya'u Makromod Lalap, man o ammu na'uli nasa'a haenihi. Yon mamka'uk mala'a laa Mesir, ono Ya'u hi'i o upun anum moriyana nammori leke ramwali noho lalapa ida lolo enne. 4 Yo odi nala o laa Mesir. Enla o upun anum yo odi wali wali'ur mai leke eniyeni, la Yusup namkene o herne kalarna leke onuma lere horu an tolle o ihim kemen.”
5 Enine Yakup namhara Bersyeba. Yakup ananhe paku aman noro hi hono ananhe ha'a laa karete wawan man rai Mesir a'aku eni. 6 Hi rodi ha mormori noro rira kanaru rahu na'akeme man hir lernala lolo Kana'an rodi laa Mesir. Yakup nala'a noro nakar raram na'akeme, 7 upun anan, mo'oni maeke na'akeme.
8 Yakup upun ananhe ma noro wewerre laa Mesir naranhe me'eniyeni:
Yakup noro Lea ananhe
9 Ruben (Yakup anan anulu) ananhe: Henok, Palu, Hezron, noro Karmi.
10 Simeon ananhe: Yemuel, Yamin, Ohad, Yakin, Sohar noro Saul. Saul eniyeni inna nano noho Kana'an.
11 Lewi ananhe: Gerson, Kehat, noro Merari.
12 Yehuda ananhe: Er, Onan, Sela, Peres, noro Zerah. Er noro Onan, hir makiyedi lolo Kana'an. Peres eniyeni ananhe: Hezron noro Hamul.
13 Isakar ananhe: Tola, Pua, Ayub, noro Simron.
14 Zebulon ananhe: Sered, Elon noro Yahleel.
15 Yakup noro hono Lea minle noho Mesopotamia makun, hir moriyana ri eniyenihe, la Lea moriyana maekana ida naran Dina. Ende Yakup upun ananhe nano hono Lea aki na'akeme ri welikelu wokelu.
Yakup noro Zilpa ananhe
16 Gad ananhe: Zifyon, Hagi, Syuni, Esbon, Eri, Arodi noro Areli.
17 Asyer ananhe: Yimna, Yiswa, Yiswi, Beria, noro Zerah. Zerah eniyeni hi narna. Beria ananhe: Heber noro Malkiel.
18 Ri idaweli woneme eniyenihe Yakup noro Zilpa upun ananhe. Zilpa eniyeni maeke hophopon wahwahan man Laban nala anan Lea.
Yakup noro Rahel ananhe
19 Yakup noro hono Rahel mori tatana woro'o: Yusup noro Benyamin. 20 Yusup minle Mesir, anan woro'o: Manasye noro Efraim. Yusup hono naran Asnat, ai aman Potifera ma namwali imam lolo leke Heliopolis.
21 Benyamin ananhe: Bela, Bekher, Asybel, Gera, Na'aman, Ehi, Ros, Mupim, Hupim noro Ared.
22 Ri idaweli wo'akka eniyenihe Yakup noro Rahel upun ananhe.
Yakup noro Bilha ananhe
23 Dan anan naran Husim.
24 Naftali ananhe: Yazeel, Guni, Yezer noro Syilem.
25 Ri wo'ikku eniyenihe Yakup noro Bilha upun ananhe. Bilha eniyeni maeke hophopon wahwahan man Laban nala anan Rahel.
26 Yakup upun ananhe man laa Mesir aki na'akeme ri welineme woneme, maa panin maeke enihe kar aki. 27 Ende Yusup anan woro'o momorie lolo Mesir na'uwali Yakup nin nakar raram man laa Mesir, aki na'akeme ri weli'ikku.
Hir laa rakpali rai Mesir
28 Hi ra'uraniyedi Mesir, Yakup hopon Yehuda nolu lan polu Yusup leke mai noro aman pakromo lolo noho Gosyen. Hir rakanedi noho Gosyen, 29 Yusup lan ha'a nin karete laa noho onne leke noro aman pakromo. Hir pakromedi ne, Yusup naurukuwala aman, la nahere nammori. 30 Yakup na'aheni Yusup, “Lere eni i maki here wa'an, ono i do'on auroinedi me'e om mormori makun.”
31 Enine Yusup nou mo'onwalin noro lodon walinhe na'akeme na'ahenia, “Ya'u laa konohi rai nahenia i lodon walin man holi noho Kana'an na'akeme maiyedi me'e. 32 Ya'u konohi rai eni mi madedem huri wa'an ha mormori, la mi modi minima ha mormori, pipi sapi, noro ha wo'ira na'akeme maiyedi me'e. 33 Lo'o rai napolu mi na'ukani minima honowok inhawe, 34 konohi rai ma'aheni nano tatana mim huri wa'an ha mormori naise mi upum a'um nonolu eni. Wakunu heheni leke an hopon mim holi lolo noho Gosyen.” Yusup wakunu heheni ono ri Mesir mahalarna roro ri man huri pipi minwuku.