Yusup konohi walinhe ai naran
45
Ende Yusup kan kerhunala akin me'e lolo nina man howok eni kalarna, de an hopon hi ramharedi kamar leke an konohi walinhe naran. Enla nina man howok na'akeme ramharedi, ai na'aheni, “Ya'u eni Yusup!” 2 Ai nahere naruri, penia ri Mesir ma aile paharne derne lirna, noro ri man aile rai nina romleu onno haenihi.3 Yusup na'aheni walinhe, “Ya'u eniyeni Yusup! Papa mormori makun, ee ka?” Enine walinhe rahiyennale, rarururu, kar wakunu, ono ramka'uk rehi. 4 Enine Yusup na'aheni hi, “Wakuraniyala mai eni.” Hir wakuraniyedi, mene ai na'aheni wali'ur, “Ya'u eniyeni Yusup man nonolu eni mi ma'olu laa ri man rala'a Mesir. 5 Yom mim hehel mi kemmu. Yom mamka'uk maya'u, ono nonolu mi ma'oluwedi ya'u me'e, maa Makromod Lalap mehe nodi ya'u nolu mi mai eni leke yono ri nammori maki roulare. 6 Noho lara lapa anna wo'ikku, de lere eni rakanedi anna woro'o me'e, la anna wolima raram makun de ri kan lernala kirna ihin ennen. 7 Makromod Lalap nodi ya'u nolu mi mai eni leke ya a'ori mi yon minima nakar raram maki horu roulare. 8 Makromod Lalap ma nodi ya'u mai lolo eni, mi eniyenihe ka! An kikanedi ya amwali man nounaku rai Firaun, de yo odi molollo lolo Mesir ne'en raram na'akeme.
9 Lere eni pelek wali laa iknik papa ma'aheni, ‘Papa anan Yusup na'aheni heheni, “Makromod Lalap kikanedi yo odi molollo Mesir ne'en raram na'akeme, de pelek papa mai lolo eni.” 10 Papa namkene lolo noho Gosyen, na'urani ya'u, la mai noro upun ananhe, nodi pipi, sapi, noro papa nina ha wo'ira na'akeme. 11 Papa min lolo leke Gosyen leke ya'u wayahu. Noho lara lapa anna wolima raram makun, de ya ahehe leke papa nin meherome noro ha mormori yon maki roulare.’ ”
12 Yusup na'aheni wali'ur, “Lere eniyeni mi na'akeme moro Benyamin mehem do'onedi, ya'u eniyeni Yusup kokkoo. 13 Lam konohi iknika papa nahenia yo odi molollo lolo Mesir ne'en raram na'akeme. Konohi ai ha wo'ira na'akeme mim do'onedi me'e, la pelekleke more mai here!” 14 Enime'ede Yusup noro mo'onwalla karuri Benyamin, ida ma naurukuwala ida rahere wewerre. 15 Yusup nodi naherhere lan masi walinhe na'akeme. Ai nahere horuwedi, ai noro hi wakunu me'e.
16 Enla rai noro nin man howok lolo romleu onno derne Yusup walinhe maiyedi me'e, hi akin nahuwa'an wake'e. 17 Ende rai na'aheni Yusup, “Hopon o wallumhe rala gandum ne'en rira keledei rodi wali laa Kana'an here, 18 leke hi roro hi aman noro nakar raram mai, holi mai eni. Hir maiyedi Mesir, ya ala hi nohorai man wa'an wake'e, leke hir lernala morimori wawa'an rara'e nano noho ihin ennen. 19 Enla hopon hi rodi kareta noknokor leke roro hono noro ananhe man tutusiyana makun mai, la roro hi aman mai haenihi. 20 Konohi hi haenihi, yon hir horokala hahaa ma ka namwali rodi mai lolo eni, ono hahaa man wa'an rehi lolo Mesir ne'en raram na'akeme namwali hirira.”
21 Yakup ananhe hi'i lernohi rai nin honopon eni. Yusup nala hi karete noro oir wa'aleher lolo kalla naise rai hohopon eni. 22 Ai nala nainair worworu hi dodohedi, maa Benyamin ai nala kupan pere rahu wokelu noro nainair worworu wolima. 23 An aku hahaa wo'ira eniyeni la aman, keledei waku idaweli leke rodi ne'en hahaa man wa'an nano Mesir, noro keledei waku idaweli leke rodi ne'en gandum, kukis, noro oir wa'aleher leke hi ra'an lolo kalla nano Mesir rakan Kana'an. 24 Eni nanumene an huri walinhe rala'a. An nou hi na'ahenia, “Yono ida ma nasesi noro ida lolo kalla.”
25 Enla hi ramhara Mesir wali wali'ur laa aman. 26 Hir rakanedi Kana'an, hir konohi aman, “Yusup mormori makun! Ai nodi molollo Mesir ne'en raram na'akeme!” Yakup derne lira onneni honorokne we'eredi, la akin ka naili'il hirira wanakunu eni. 27 Maa Yakup derne hahaa na'akeme man Yusup na'aheniyedi hi eni, la po'on karete nammori man an a'akue leke aman ha'a laa Mesir. Enime'ede ai raram nahuwa'anedi wali'ur, 28 na'ahenia, “Eih! Lo'o namlolo, ya an'u Yusup mormori makun. Ya ahehe la'u do'onale, mene i maki.”