Yusup nodi nin nonomun onno rodi pere hi'ie ken walinhe
44
Enine Yusup hopon uluwakun honowok nakar raram na'ahenia, “Lam loile gandum rira kaduk enihe, ho'okle rira keledei rir yodi, la mala dohodoho rira kupan loile kaduk raram lolo gandum wawan. 2 Mala ainu'u nonomun onno rodi pere hihi'ie loile walinhe karuri nina kaduk raram, noro wewerre gandum panairne haenihi.” Uluwakun honowok lernohi nin honopon onne.3 Rakan nohoropo al'alam wake'e, Yusup noro walinhe rahina'ar, de walinhe rodi rira keledei rala'a Kana'an. 4-5 Maa kar ko'u nano kota onne makun, Yusup hopon man howok lolo nakar rir uluwakun na'aheni, “Pelek kawa lewen ri onnenihe. Om dawakedi hi, tumdesne ma'ahenia, ‘Alhi'ihepenia mi mamna'a makrom'u nina nonomun onno rodi pere hihi'ie? Ai nodi nonomun onno onneni hi'i u'ur leher, de mim hi'iyedi sala lapa me'e. Yusup hi'i ha wawa'an noro mi, maa kam hi'i ha man wa'an noro ai!’ ” 6 Ende an larnohi Yusup walinhe. An dawakedi hi, na'aheni ha wo'ira na'akeme man Yusup na'aheheni eni.
7 Enine hir walhe, “Alhi'ihepenia makrommu na'ukani heheni? Ai mahopo, ai kam hi'i ha onne. 8 Makrommu mehe nauroin kupan man am do'on kaduk raram ai modi mano noho Kana'an mai, la ai mala wali'uredi makrom'u me'e. Alhi'ihepenia kuku mana'a ai ma'aheni ai mamna'a pere me mahe, nano anulu panulu eni? 9 Lo'o makrommu do'on inhoi ma nala ha onneni hukumesnedi, la mayai namehin mamwali hophopon wahwahan makrommu.”
10 Uluwakun honowok onne na'aheni, “Wa'an, maa inhoi ma nala nonomun onno onne, ai mehe namwali hophopon wahwahan maya'u, namehin enihe rala'a.”
11 Idewe hi meririi rala kopur rir kaduk we'ere. 12 Uluwakun honowok onne po'on wa'awa'an rir kaduk-kaduk nano anulu rakan karuri. Enine an do'on nonomun onno onne aile Benyamin nin kaduk raram,
Yusup nin man howok do'on Yusup nin nonomun onno lolo Benyamin nin kaduk raram (NN. 44:4-14)
14 Hir rakanedi Mesir, Yehuda noro walinhe laa Yusup nina nakar. Yusup aile nakar makun, de hir kadi ein korno yawa ai kalarna. 15 Enine ai na'ukani, “Mim hi'i inhawa? Alhi'ihepenia mi ka mauroin maya'u eniyeni ma nauroin hi'i u'ur leher, de ri man hi'i yaksala, pelek ya auroinne?”
16 Yehuda walha, “Mayai lo'o ma'aheni inhawa makrom'u? Ai ma'alehe ya'ar ida mawalha lira la ma'alolo ai kemmu makrom'u kalarne. Makromod Lalap nalhariyedi ainima sale me'e. Ri ma nala nonomun onno, ai kan mehe namwali hophopon wahwahan, maa lere eniyeni mayai na'akeme mamwali hophopon wahwahan makrom'u.” 17 Yusup na'aheni, “Ka! Ya amhene hi'i heheni! Kokoko ai mehe, ma nala onno onneni, namwali hophopon wahwahan maya'u. Namehin enihe ya'u huri lam do'on mi ammu.”
18 Enine Yehuda hoi wakurani Yusup na'aheni, “Yono makrom'u na'ahan maya'u. Ya apanakala yo oro makrom'u wakunuwala tarana, ono makrom'u namnenehe noro rai Mesir. 19 Makrom'u na'ukaniyedi mayai me'e, ‘Hi'ihewiyala mi ammu, ee mi wallumhe namehin, aile makun, ka?’ 20 Am walha, ‘Ai ammu aile, maa na'ileheredi me'e. Ai walin karuri ida aile haenihi. Ai ammu na'ileheredi me'e mene morie, penia ai ammu naramyaka ai rehi. Enla ai mo'onwalla anulu mememen makiyedi me'e. Woro'ohe inna mahaku la narehi karuri mehe aile.’ 21 Nonolu eni makrom'u hopon ai more mai leke makrom'u do'onale oin makan. 22 Maa am walha nahenia karuri onne aman kan huri nako'u nano ai, kalo'o aman makiyedi. 23 Enla makrom'u na'aheni, ‘Mi ka moro mi wallum karuri onne mai maya'u, yono makpali ya'u me'e.’
24 Enla am wali wali'ur laa ai ammu. Rakanedi ne, am konohi ai ammu makrom'u nina wanakunu eniyeni. 25 Enla ai ammu hopon am wali mai weliyala hanana'an tarana ikar, 26 maa am walhe na'ahenia, ‘Ai kam laa enne, ono man panulu lolo Mesir na'ahenia, “Mi ka moro mi wallum karuri onne mai, yon makpali maya'u me'e.” ’ Ende ai me'e laa Mesir horo nahenia ai moro Benyamin. 27 Enine ai ammu na'aheni, ‘Mi mauroin i hou'u Rahel anane woro'o mehe. 28 Anulu huriyedi ya'u me'e, ono ha mormori merwui lo'o tamakedi ai me'e, penia rakan lere eniyeni ka'u do'one me'e. 29 Ya'u eniyeni, a'ileheredi me'e. Lo'o mi mala ya an'u karuri eniyeni nano ya'u, la lernala ha romo lolo kalla, mim hi'i sus maya'u, de i maki.’
30 Ende makrom'u, lo'o am wali wali'ur laa ai ammu, ai ka moro ai walin karuri eni, ai ammu lo'o makiyedi, 31 ono ai ammu morinore makinore ai walin karuri eniyeni. Ai ka more wali, lo'o ai ammu maki ono ai ammu na'ileheredi me'e. 32 Enla i nouwedi ya am'u me'e yo odi molollo tatana onne. Ya'u nouwedi ya am'u, ‘Lo'o ka odi tatana eniyeni mai wali'ur pape ya'u lernala hunukum laa ewi-ewi.’