Yusup mo'onwalinhe noro Benyamin wali wali'ur laa Mesir
43
Noho lara eren wewerek lolo noho Kana'an, 2 la gandum man hi rorodi nano Mesir ra'an horuwedi me'e. Enpenia Yakup hopon hi, “Lam weliyala gandum ikar.”3 Enimaa Yehuda walha aman, “Ri onne nou an'anhedi mayai me'e na'ahenia, ‘Mi ka moro mi wallum karuri onne mai, yono mi makpali ya'u.’ 4 Ende ai mapanak papa huri Benyamin ai more laa wewerre, lekpananne am weli hanana'an enne. 5 Maa lo'o Papa kan huri an laa, ai ka mala'a haenihi, ono ai mamka'uk anulu panulu lolo Mesir onne nin nou ma na'aheni ai ka moro ai wallum karuri laa, ai kan huri mayai makpali ai me'e.”
6 Enine Yakup na'aheni, “Mim hi'i ya'u sus! Alhi'ihepenia mim konohi ri onne mi mo'onwallum karuri aile?”
7 Hir walha ra'aheni, “Ri onne na'ukani makmaki mayai na'ahenia, ‘Mi walinhe wo'ira? Hi'ihewi mi ammu, mormori makun, ee ka? Hi'ihewi mi mo'onwallum karuri aile, ka?’ Enpenia am konohi na'akeme ai! Ai ka mauroin hi'ihepeni an hopon ai moro ai wallum karuri onne laa!”
8 Enine Yehuda na'aheni, “Pape, wa'an rehi huri ai more mala'a here, leke yono papa upun anan, nakar raram na'akeme maki roulara. 9 Yo odi molollo ai, leke yono haida-haida namwali ai kemen lolo kalla. Lo'o ka oro Benyamin mai wali'ur, na'amoli ya'u lernala hunukum laa ewi-ewi. 10 Lo'o ai kam lapan nalo'ol mai eni, am laa de rakan laa wali mai rewro'o nina me'e.”
11 Enine Yakup na'aheni hi, “Lo'o onne kokkoo, modiyala noho ihin ennen man wa'an wake'e naise wuru awa'ar tarana, rampa-rampa tarana, miri woi tarana, noro yere woi dudu'ul tarana, wani oir tarana, leke namwali rarweni kanile anulu panulu onne. 12 Ende modiyala kupan nammoriyala leke herre wali'ur kupan man minle kaduk raram onne noro kupan aimehi weli hanana'an. 13 Enla mi moro mo'onwallum karuri laa ri onne here. 14 Maa ya apanak Makromod Lalap Ma Nodi Molollo Narehi Nalewen Na'akeme naramyaka mi lekpananne anulu panulu onne nala wali'ur Benyamin noro Simeon maya'u. Ya'u eni, lo'o ya an'uhe maki horu, ya'u hi'ihewi?”
15 Enine Yusup mo'onwalinhe roro Benyamin rodi rarweni noro kupan dedesne na'uwali kupan aimehi laa Mesir. Hir rakan enne, hi rakpali Yusup. 16 Yusup do'on Benyamin noro mo'onwalinhe ne, an hopon uluwakun honowok lolo nakar, “Modi ri enihe laa ainu'u nakar. Mesne ha mormori ida mapali la ma'akene hanana'an nonomun, leke lere ulu yo oro hi, ai ma'ak wewerre.”
17 Enla uluwakun honowok eni lernohi nin honopon de noro Yusup walinhe rala'a laa nina nakar. 18 Walinhe rala'a nakar ne, hi ramka'uk rehi. Hir pene'ek, “Ai napanak ik mai eni ono kupan man minle iknika kaduk raram, de lo'o hir kelewuku ika, rala iknik keledei, la hir hi'i ika kamwali hophopon wahwahan harome!”
19 Ende hir rakan nika makan ra'aheni uluwakun honowok onneni, 20 “Am wakunuwala panaeku tarana pape. Am mai weli hanana'an dedesneni, 21-22 am wali rakan kalla toro, na'umetekedi me'e, de warnala leke mamkuru lolo onne. Am we'er ainim kaduk eni, am do'on ainima kupan man ai modi weli hanana'an aile gandum wawan! Maa ai ka mauroin inhoi loile kupan onne! Ende lere eni ai modi kupan onne wali'ur mai pape. Enla ai modi kupan aimehi weli hanana'an.”
23 Man howok onne na'aheni, “Yom mamka'uk. Minim Makromod Lalap man mi ammu na'uli nasa'a haenihi, lo'o nala kupan loile wali'ur kaduk raram. Ya'u kokaledi kupan rodi weli hanana'an me'e.” Horu ne, nala Simeon wali wali'ur laa hi.
24 Enla man howok lolo nakar eni lariyala hi laa raram, nala oir leke rodi wuri hi liman ein, la nala hanana'an rodi wa'an rira keledei. 25 Hir derne Yusup lariyaledi hi lere ulu rore ra'ak wewerre, de hi ra'akene rarweni rodi nano Kana'an, weilapan Yusup mai, mene hi rale.
26 Yusup rakan nina nakar ne, hir kani rarweni ai, la hir kadi ein korno la yawa rahuwo'oke. 27 Enine Yusup na'ukani hi na'ahenia, “Hi'ihewiyala? Mi ammu na'ileheredi me'e de, wa'awa'an, ee ka?”
28 Hir walhe, “Ai ammu man lolo yawa makrommu, wa'awa'an.” Enla hir kadi ein korno laa yawa rahuwo'oke wali'ur.
29 Yusup do'onedi mo'onwalla mememen Benyamin, ai na'ukani na'ahenia, “Pa'eni penia mi mo'onwalin karuri man mim konohiyedi ya'ue? Na'amoli Makromod Lalap nodi nala o, pa'e.” 30 Idewe Yusup nala'a paharne ono horok rehi mo'onwalin karuri mememen eni, penia laa nina kamar raram nahere.
31 Ai nahere horu, kerhuwala akin la laruwedi, mene wali wali'ur laa hi. An hopon ra'akene hanana'an leke hi ra'ak.
32 Yusup mehe naikoro mei ida, walinhe mehe mei ida, ri Mesir mehe ra'ak mei ida haenihi. Ri Mesir ramhene ra'akwuku mei ida noro ri Ibrani, ono hir mahalarna ri Ibrani. 33 Yusup kakar hi raikoro nano anulu rakan karuri, de ida man po'onala ida, mehe oine! 34 Hir lernala hanana'an nano Yusup nin mei, maa Benyamin lernala hanana'an rakan rewlima narehiyedi walinhe. Ende hi rodi aki ma nahuwa'an ra'ak romun wewerre roro Yusup.