Yusup mo'onwalinhe rala'a Mesir
42
Ende Yakup derne lir anna nahenia gandum aile lolo noho Mesir. Ai na'aheni ananhe, “Alhi'ihepe mi maikoro karkaramedi, ida man po'on ida? 2 Ya'u derne nahenia gandum aile lolo noho Mesir, de lam weli gandum enne modi mai leke ik ka'an, de yon ik maki roulare.”3 Enime'ede Yusup mo'onwalin idaweli enihe laa Mesir weli gandum, 4 maa Yakup kan huri Benyamin noro walinhe rala'a, ono ai namka'uk lo'o ha romo namwalile lolo kalla. Benyamin eniyeni Yusup mo'onwalla karuri mememen. 5 Noho lara lape noho Kana'an ne'en raram na'akeme, de Yakup ananhe roro ri nammori lar weli gandum lolo Mesir.
6 Ler onne Yusup namwali anulu panulu lolo Mesir ne'en raram na'akeme, de ai na'olu gandum heri man aile leke-leke onne na'akeme, de mo'onwalinhe mai kadi ein korno rawa yawa Yusup kalarna rahuwo'ok.
Yusup mo'onwalinhe kadi ein korno rawa yawa ai kalarna (NN. 42:6-12)
8 Yusup nahiyennaledi mo'onwalinhe me'e, maa hi ka rahiyennala ai. 9 Enla an horoknala nin namarmi noro mo'onwalinhe, la an tumdesne hi na'ahenia, “Mi eniyenihe mamwali man koklolo na'inau. Mi mam koklolo ma'inau ke'ede, leke ewi ri ka nadiyake ne, mim mai mahoredi ainim nohe.” 10 Maa hir walhe, “Ka, makrommu, am lolo yawa makrommu. Ai mam weli hanana'an mehe. 11 Mayai eniyenia ma na'amo'oniwalie, mayai eniyeni ai ammu mahaku. Mayai eniyeni ri wawa'an, ai ka mamwali man koklolo na'inau.”
12 Yusup na'aheni hi, “Lo'o mi mapoho! Mam po'on ke'ede hair eniyeni rin nadiyaka, ee ka!” 13 Maa hir walhe, “Mayai ma na'amo'oniwali ri idaweli woro'o, makrommu. Mayai eniyeni ai ammu mahaku lolo noho Kana'an. Ai wallum ida makiyedi me'e, la karurie nornoro ai ammu.”
14 Yusup walha na'ahenia, “Yom wakunu me'e! Naisa idedi ya aheni ki mi, mi mamwali man koklolo na'inau. 15 Ende ya'u ken mi leke namlolo, ee ka. Yo odi rai naran ahopedi mi mamkene mai eni hehenanumene mi mo'onwallum karuri mai. 16 Ya'u huri minim ri ida wali lan polu, la namehin min bui raram mai eni, lapan hehenanumene ya auroin minima wanakunu namlolo, ee ka. Lo'o ka, yo odi rai naran ahopo mi eniyeni man koklolo na'inau.” 17 An wakunu horu mene hopon ri rodi hi laa bui raram lere wokelu alam wokelu.
18 Rakan lere wokelu Yusup na'aheni hi, “Ya'u eniyeni, ri man derne nakani Makromod Lalap, de ya ala kalla ida ki mi, 19 leke ya auroin mi enihe ri wawa'an, ee ka. Ende ri ida min namkene bui raram, la namehin lar weli gandum rodi laa minim nakar raram man mahan kerhu lara eni, 20 la mim wali mai moro mo'onwallum karuri onne mai wewerre. Onne leke namwali tanada nahenia minim wanakunu namlolo, leke yon ya'u hukumesne mi.”
Hi re'enohi anulu panulu onneni nina kenekrohu eni, 21 la ida ma ne'el ida, “Eih! Lere eniyeni lo'o ik lernala hunukum ono nonolu eni ik hi'i yaksala noro ik mo'onwalla Yusup. Nonolu Yusup aile oir makan poro'uk raram, napapanak ik pakue maa ik kak peinohie, kade ik po'on an sus wake'e. Onne penia lere eniyeni namwali wewerek pananaka maika.”
22 Ruben na'aheni, “Nonolu ya aheni ki mi, ‘Yom hi'i haida-haida noro tatana onneni,’ maa mi mamhene derne maya'u. Lere eniyeni rarna nadour maika me'e.” 23 Enimaa hi ka rauroin na'aheni Yusup nauroinedi rira wanakunu me'e, ono hir nair ma nauroin halla wanakunu leke wakunu noro Yusup. 24 Enine Yusup hoikaruwedi hi laa onno namehin mene nahere. Rakan ai namkene wakunu wali'ur an wali mai hi, hopon rala Simeon mai mo'onwalinhe kalarna nanumene wukuwedi.
Mo'onwalinhe wali wali'ur la Kana'an
25-26 Horu ne, Yusup hopon rala gandum loile mo'onwalin rira kaduk rorodi eni, la rira kupan loile meririi nina kaduk raram, la an hopon rala oir wa'aleher lolo kalla. Na'akeme namwaliyedi lernohi Yusup nin honopon eni, mene hir ne'en keledei rodi rala'a. 27 Ende rakan kalla toro lere helemedi me'e de hir warnala la ramkuru. Ri ida we'er nin gandum kaduke leke nodi wa'an nina keledei, la an do'on nina kupan aile kaduk raram, 28 de kukunohi mo'onwalinhe, “Eih, ainu'u kupan rala wali'uredi, po'onala me'eni ainu'u kaduk raram!” Enime'ede na'akeme akin tanedi, ida ma na'ukani ida na'aheni, “Makromod Lalap hi'i inhawa noro ika?!”
29 Hir rakanedi Kana'an hir konohi aman ha wo'ira ma namwali hi na'akeme, 30 la ra'aheni, “Ri ma namwali anulu panulu Mesir ne'en raram na'akeme wakunu nodi rurilai la tumdesne mayai, na'aheni ai mamwali man koklolo na'inau nin lekloi!” 31 Maa ai ma'aheni, “Mayai eniyenihe ri wawa'an, man koklolo na'inau ka! Mayai ri mololole. 32 Mayai na'akeme ma na'umo'onwali ri idaweli woro'o, ai ammu mahaku, la ai wallum ida makiyedi me'e. Karurie nornoro ai ammu ai Kana'an.
33 Enimaa ma namwali anulu panulu onne na'aheni, ‘Ya'u ken mi leke ya auroin mi ri mololole, ee ka! Loikaruwedi minima ri ida, la namehin enihe rodi gandum wali here, ono minim nakar raram mahar kerhu lara. 34 Wali wali'ur mai, modi mi mo'onwallum karuri eni, leke ya auroin mi eniyenihe man koklolo na'inau ka, maa ri mololole. Enleke mi wallum man ya'u nekiyale ya ala wali'ur ki mi, leke ya'u huri mi mai noho eniyeni ma'iwali.’ ”
35 Enine hi ra'amamu rira kaduk gandum, hir do'on rira rakuraku, meririi rira kupan aile. Ende hi ramka'uk rehi, noro rira ame haenihi. 36 Aman na'aheni hi, “Mim hi'i ainu'u tatana na'akeme molu horu. Yusup kaale me'e, Simeon lo'o kaale me'e haenihi, la lere eni mi mala Benyamin ho'o me'e! Ha eniyeni na'akeme namwali ainu'u apinpinha wo'operperi.”
37 Enimaa Ruben na'aheni aman, “Papa, mala Benyamin maya'u. Na'amoli ya ala wali'ur mai papa. Lo'o ka ore mai wali'ur papa, ya an'u mo'oniyana woro'o eniyenihe, pap nesnedi.” 38 Maa Yakup na'aheni, “Ka! Ya an'u Benyamin, yom more. Mo'onwalla makiyedi me'e, narehi ai mehe me'e. Yon hi'i de an lernala ha romo lolo kalla. Ya a'ileheredi me'e, yon mim hi'i sus ya'u wali'ur, kalo'o i maki.”