Rai Firaun nin namarmi
41
Enla nakawedi anna woro'o wali'ur, mai a'alam lerida rai Mesir (Firaun) namarmi nahenia ai mahan namririri lolo oir wauwau lapa Nil arkanne. 2 Enine Firaun namlilinnohi do'on sapi poipoir waku wo'ikku, ulikne ad'ada, woku nano oir wauwau Nil raram mai paharne ra'an penek man aile oir wauwau arkanne. 3 Kan maha ne, waku wo'ikku woku nano oir raram mai paharne ho'o me'e. Enimaa sapi onnenihe tutusiyane, la rakrusa wake'e, kokoko ulikne mehe paspasun rurna. Sapi ma nakrus enihe ramriri roro sapi man poipoir enihe wewerre lolo oir wauwau arkanne. 4 Kame'ede sapi ma nakrusa ra'an sapi man poipoir enihe. Idewe rai eremedi.5 Enine ai namkuru wali'ur namarmi nahenia an do'on gandum onnida woin wo'ikku ihin penpenu, 6 horu ne, an do'on gandum onnida mori wali'ur woin wo'ikku, maa anna kimur huu de kilu kauwedi la namlau napro'ukedi. 7 Kame'ede man woin kilu kau onne nawaledi man woin ihin penpenu. Onne horu, rai eremedi, la namaka na'aheni, “Eih, ya amarmiyedi ho'o me'e.”
8 Rakan nohoropo raie honorok akin ka namkene de hopon rapolu ri man hi'i u'ur leher roro orworoin lolo Mesir onne na'akeme mai, leke an wakunu nina namarmi hi, maa ri mahaku ka nauroin napa'ahe. 9 Enime'ede uluwakun nonomun na'aheni rai, “Eni nanumene ya'u horoknala ainu'u yaksale, 10 ono lere man laedi me'e pap rai nawuhur yo oro uluwakun kukis penia nakoko am laa bui raram man ai lolo uluwakun diyaka nin nakar.
11 Rakan a'alam lerida airo mamarmi wewerre, maa ainim namarmi napa'ahne, ka namnenehe. 12 Lere onne ma na'ikaka Ibrani ida min wewerre bui raram haenihi. Nonolu ri onne namwali hophopon lolo uluwakun ma nadiyaka rai nina romleu onno. Am wakunu ainim namarmi, la ai napa'ahe. 13 Ende namarmi na'akeme napa'ahe namlolo namwali naise ai na'aheheni eni. Kame'ede papa rai hopon ya'u wali wali'ur laa ainu'u onno nonolu, la uluwakun kukisi hukumesnedi.” 14 Enime'ede rai hopon lar polu Yusup nano bui mai paharne. Yusup eriyedi, herredi nin raine, laa nakpali rai eni. 15 Enine rai eni na'aheni ai, “Alameni ya amarmi, maa ri mahakue ka nauroin napa'ahe. Eni nanumene ya'u derne o mauroin napa'aha namarmi.”
16 Yusup na'aheni, “Pap rai, ya'u me'e ne ka auroin, maa Makromod Lalap mehe nala woroin ri leke napa'ahe namlolo kokkoo.”
17 Enine rai na'aheni, “Ya amarmi ya'u aile oir wauwau Nil arkanne. 18 Enla sapi poipoir waku wo'ikku, ulikin ad'ada ramhara oir wauwau Nil ra'an penek man aile oir arkanne. 19 Onne horu sapi waku wo'ikku ramhara nano oir wauwau ho'o me'e, maa sapi onnenihe rakrusa wake'e, ulikin mehe paspasun rurna. Ka'u do'onala sapi ma nakrus heheni lolo Mesir makun. 20 Kame'ede, sapi ma nakrus enihe ra'anedi sapi man poipoir enihe, 21 maa rakrusrusa makun. Enime'ede ya'u eremedi. 22 Horu, ya amkuru wali'ur, ya amarmi do'on gandum onnida woin lalapa wo'ikku, ihin penpenu. 23 Enla ya'u do'on gandum onnida mori wali'ur woin wo'ikku kilu kauwedi, maa anna kimur huu de namlau napro'ukedi. 24 Kame'ede man woin kilu kauwedi onnenihe nawaledi man woin ihin penpenu eni. Ende ya'u wakunuwedi ainu'u namarmi ri man hi'i u'ur leher me'e, maa ri mahakue ka nauroin napa'ahe namarmi eni.”
25 Enine Yusup na'aheni rai eni, “Namarmi woro'o eniyenihe napa'ahne, namnenehe. Makromod Lalap konohiyedi papa me'e inhawa man An hi'i namwali. 26 Sapi waku wo'ikku man poir onne namwali anna wo'ikku, la gandum man woin wo'ikku man ihin penpenu namwali anna wo'ikku haenihi, de woro'o enihe napa'ahne, namnenehe. 27 Enla sapi waku wo'ikku ma nakrusa wake'e noro gandum woin wo'ikku man kilu kauwedi onnenihe napa'ahne, melle noho lara lape anna wo'ikku raramne. 28 Na'akeme lo'o namwali naise ya'u konohiyedi papa me'e. Makromod Lalap konohiyedi papa me'e inhawa man An hi'i namwali, loiyedi lira rore me'e. 29 Ende lo'o anna wo'ikku man mai eni, lolo noho Mesir ne'en raram ka ramlara, 30-31 maa lewenedi anna wo'ikku onne, anna wo'ikku wali'ur noho lara lape, de rin hamlinuwedi anna man hanana'an nammori, onno noho lar wake'e. Ende oir waku namkisi la aukawi namlau, lo'o kak do'onala hanana'an ida ono noho lara lape. 32 Papa nin namarmi namwali rewro'o, ono Makromod Lalap naledi lira rore me'e, la pelek namwali haenihi.
33 Ende wa'an rehi papa nanoin ri ma nin panaeku wa'an la nauroin, kikan nodi molollo lolo noho Mesir ne'en raram na'akeme. 34 Enla papa kikan uluwakun-uluwakun haenihi, leke anna wo'ikku raram noho lernala hanana'an nammori, loiwuku leke ra'akene manaku heruwali. Ende inhoi lernala lunu rewlima nala lunu raram uluwakun enihe ra'akene manaku. 35 Enla papa nala molollo uluwakun eniyenihe leke hir loiwuku, ra'akene radiyaka hanana'an nano leke-leke na'akeme. 36 Hanana'an eniyeni ra'akene rodi weilapan noho lara lapa anna wo'ikku man mai eni lolo Mesir ne'en raram na'akeme, leke yono hir uma la maki roulare.”
Rai Firaun kikan Yusup namwali anulu panulu
37 Rai Firaun noro nin man howok na'akeme re'e lernohi Yusup nina panaeku man wa'an eni. 38 Firaun na'aheni nina man howok enihe, “Lo'o ika lernala ri namehin naise Yusup, ee ka? Ri eniyeni, Makromod Lalap Nin Roh nodi molollo.” 39 Horu ne, rai Firaun na'aheni Yusup, “O mauroin rehi ri na'akeme. Makromod Lalap hi'i ha rahu eni na'akeme, ri namehin ka nauroin makun, maa o mauroinedi me'e. 40 Ende ya'u kikan o mamwali anulu panulu lolo ainu'u nohorai, la ri na'akeme derne rakani o, maa ya'u mehe ma nodi molollo narehi o.”
41 Ende rai Firaun kikan Yusup namwali anulu panulu lolo Mesir ne'en raram. 42 Horu ne, Firaun ruri nina deli cap rai loile Yusup liman ra'ane, la na'aheni, “Ya ala eni, leke ri nauroin ya'u kikan o mamwali anulu panulu lolo noho Mesir ne'en raram na'akeme.” Enla ai nala rain ma'aruru ida Yusup nair la nala pama maha loile kelen. 43 Horu ne, an hopon Yusup ha'a kerete kuda ida man ma'aruru naise rai nina, mene rai nin hophopon lolo kalarna ra'aheni, “Ma'ahari kalla, rai henemen lole.” Rai Firaun hopon hi'i heheni ono kikanedi Yusup namwali anulu panulu noho Mesir ne'en raram na'akeme. 44 Enla Firaun na'aheni Yusup, “Ya'u eni rai Mesir, ya ala molollo ki o, de lo'o om hopon Mesir ne'en raram na'akeme hi'i haida, kar huri ra'okul num honopon onne.”
45 Enla an waki narane Safnat Paaneah, la nala maeke ida naran Asnat noro Yusup ho. Maeke eniyeni aman naran Potifera ma namwali imam lolo leke Heliopolis. Enla Yusup laliwewer noho Mesir ne'en raram na'akeme. 46 Yusup nin anna welikelu mene namwali anulu panulu rai Mesir. Ai namhara rai nin romleu onno lan laliwewer leke-leke na'akeme man aile Mesir.
47 Enla anna wo'ikku raram noho ka namlara, ono kirna na'akeme na'ihi na'ene nammori. 48 Anna wo'ikku raram ne, Yusup loiwuku gandum lolo noho Mesir, la leke-leke na'akeme meririi ra'akene manaku gandum nano hirira kirna ihin ennen. 49 Enpenia Yusup loiwuku gandum rehiyala doslo lour, kar akinala, de Yusup hopon yon aki me'e.
50 Kan rakan noho lara makun, Yusup hono Asnat moriyana mo'oni woro'o. 51 Mo'oni anulu Yusup waki naran Manasye la na'aheni, “Makromod Lalap nodi nala ya'u penia ya'u hamlinuwedi ha man hi'i sus ya'u, la ka'u horok mo'onwal'uhe noro ya am'u me'e.” 52 Enla anan karuri an waki naran Efraim la na'aheni, “Makromod Lalap nodi nala ya'u penia ya'u lernala tatana lolo noho man ya'u sus eniyeni.”
53 Anna wo'ikku noho man wa'an onne horu, 54 noho lara lapa anna wo'ikku mai naise Yusup na'aheheni eni. Enpenia noho wawan na'akeme lernala roulara, maa lolo noho Mesir gandum ra'akenkene aile. 55 Ende rakan noho Mesir nin hanana'an kaale haenihi, hir laa Firaun rapanak hanana'an. An hopon na'ahenia, “Mala'a laa Yusup. Ai na'aheni inhawa ki mi, lernohie.”