40
Enla nakawedi anna ida woro'o ne, rai Firaun nin uluwakun nonomun noro uluwakun kukis hi'i sala noro rai Mesir eni. 2 Ende ai nawuhur mo'oni woro'o enihe, 3 hopon kele, rodi laa bui raram. Bui onne ai lolo uluwakun ma nadiyaka rai Firaun nin romleu onne nin nakar, la Yusup aile bui raram onne haenihi. 4 Enla uluwakun ma nadiyaka onne hopon Yusup totolle ri woro'o onne, la hir minle bui raram nalo'ol tarana.5 A'alam lerida uluwakun nonomun noro uluwakun kukis ramarmi. Rira namarmi napa'ahe ka namnehe na'alono. 6 Enla rakan oreki al'alam Yusup mai po'on hi oin makan sus wake'e, 7 de Yusup na'ukani na'ahenia, “I mo'onwal'u mie, alhi'ihepenia lere eni naise mi oum makum suse mamanie?”
8 Enine hir walha ra'aheni, “Alam eni, ai mamarmi, maa ri ma nauroin napa'aha ainima namarmi kaale.”
Ai na'aheni, “Makromod Lalap mehe nala woroin ri napa'aha namarmi, de ken wakunu minima namarmi ke'e.”
9-11 Uluwakun nonomun na'aheni, “Ya amarmi, ya'u do'on anggur onnida nakinaman i kalar'u. Hanan wokelu eni nanumene napupupul, la idewe dipi woi, awar nammori. Enla ya asalsala rai Firaun nina nonomun onno, de ya ala anggur woin, eri loile nin nonomun onno mene ya ala kanile rai eni.”
12 Ende Yusup na'aheni, “Namarmi eni ya apa'ahe: Hanan wokelu namwali lere wokelu. 13 Rakan lere wokelu ikar, rai lo'o naramyaka de huriyedi o, leke mamwali uluwakun ma nasala rai nin nonomun wali'ur.”
14 Horu Yusup napanak, “Lere pap wali wali'ur hi'i num honowok nonolu eni, horhorok ya'u. Ya apanak lo'o pape rakanedi ne, konohi rai inhawa ma namwali noro maya'u, leke rai Firaun huriyedi ya'u nano bui eni, 15 ono nonolu rin mai kele ya'u rodi rako'uwedi ri Ibrani nin nohorai laa mai eni. Kade ka'u hi'i haida-haida, maa hi rodi ya'u mai bui raram!”
16 Enine uluwakun kukis derne uluwakun nonomun nina namarmi napa'ahne, ha man wa'an, de ai na'aheni Yusup, “Ya'u me'ene amarmi haenihi. Ya amarmi yo oku lunu danaran wokelu. 17 Rai nina kukis warna-warna aile lunu nowawan, maa manu merwui mai na'anedi kukis onne.”
18-19 Enine Yusup walha na'ahenia, “Namarmi onne ya apa'ahe: Lunu wokelu onne, alam wokelu, de rakan lere wokelu onne rai hukumesne o. Enla wair o au meriri ida leke manu merwui mai na'an o ihin kemen.”
20 Ende rakan lere wokelu rai Firaun nin lere alam momorie, de an hi'i yapi lalape, lariyala nina man howok enihe na'akeme mai. Enine ai napolu uluwakun nonomun noro uluwakun kukis nano bui raram mai rakpali rai noro nina ma nodi honopon. 21 Ende an hopon uluwakun nonomun laa wali'ur nin honowok nonolu, 22 maa uluwakun kukis resnedie. Na'akeme namwali naise namarmi man Yusup napa'ahedi me'eni. 23 Enimaa uluwakun nonomun kan horoknala Yusup nin nou eni.