Yusup rala laa bui raram
39
Ri Ismael onnenihe rodi Yusup laedi Mesir me'e, la ra'olule Potifar. Ai onne namwali uluwakun ma nadiyaka rai Firaun nina romleu onno, 2 maa Makromod nodi nale penia ai namkene holi Potifar nin nakar. An howok ha wo'ireni, Makromod namre'e namharue. 3 Ende Potifar do'on Yusup hi'i haida-haida lernala, ono Makromod namre'e namharue. 4 Enpenia Potifar naramyaka Yusup de kikan namwali nin hophopon, la an hopon Yusup nodi molollo nina popono orerekie, lekpananne nadiyaka ha wo'ira na'akeme man aile nakar eni.5 Nano lere onne Potifar kikanedi Yusup nodi molollo nina meherome, penia rira kirna nakar, la hirira ha wo'ira na'akeme Makromod namre'e namharue. 6 Potifar akin naili'il ai nadiyaka ha wo'ira na'akeme. Ende Potifar ka nadiyaka haida-haida lolo nakar eni, kokoko ai nauroin nin ya'an yomun mehe.
7 Yusup eniyeni ma na'ikaka lewlewen, penia lerida Potifar hono akin nale Yusup, de ai na'aheni, “Pa'e, mai kamkuru wukuwala.” 8 Maa Yusup namhene, la na'aheni, “Yom ma'ahan, mame. Pap Potifar namhene nodi molollo haida lolo nakar eni, maa ai akin naili'il ya adiyaka nin ha wo'ira na'akeme. 9 Ende yo odi molollo naise ainin molollo haenihi. Ha wo'ira na'akeme an hopon ya adiyake, maa mame ka, ono mame pap hono. Ka e'enohi hi'i diwar dawar ma naisa onne ma nodi dohohala laa Makromod Lalap!”
10 Enimaa akilere Potifar hono nori Yusup mamani, maa Yusup namhene ne'e noro ai ramkuru wuku, la nadiyaka nahaledi nano mam onne. 11 Maa rakan lerida Yusup noro Potifar hono memehedi nakar, 12 de an roulle hedu Yusup nin rain, na'aheni, “Mai ikroko kamkuru wuku here!” Maa Yusup nawe'ul. Enime'ede lari idewe laa paharne, la huriyedi nin rain Potifar hono liman raram. 13 An do'on Yusup lari hoikaruwedi nin rain me'e, 14 idewe Potifar hono napolu nin man howok namehin na'ahenia, “Ken po'onala. Ri Ibrani man i hou'u nodi mai nakare hi'i wawwawa ika. An ki ainu'u kamar raram nahehe hi'i dawar ya'u, maa ya'u wakau aruri. 15 Ende an derne ya'u lirna penia lari la paharne huriyedi nin raine maya'u.” 16 Enime'ede Potifar hono na'akene manaku rain onneni nodi lapan hono wali mai.
17-18 Potifar mai ne, idewe konohi ai na'ahenia, “Tatana Ibrani man modi mai nakare, ki ainu'u kamar raram, nahehe hi'i dawar ya'u, idewe ya'u wakau, de an lari laa paharne hoikaruwedi nin raine.” 19 Enpenia Potifar na'ahan rehi, 20 la hopon kele Yusup rodi laa bui raram! (Nadedem ri man hi'i yaksala noro rai rala laa bui raram lolo onne.) 21 Enimaa Makromod nodi nala Yusup penia ma nadiyaka bui onne naramyaka Yusup rehi. 22 Ende ma nadiyaka bui onne akin naili'il Yusup, de nala molollo Yusup nadiyaka ri man aile bui raram noro hi'i honowok na'akeme. 23 Ma nadiyaka bui onne ka nadiyaka haida-haida me'e, ono akin naili'il Yusup nodi molollo ha wo'ira na'akeme, ono Makromod nodi nala Yusup, penia howok ha wo'ira na'akeme na'ene namwali.