Yehuda noro Tamar
38
Lere onne Yehuda hoikaruwedi walinhe nala'a laa leke Adulam minwuku noro na'aromwali ida naran Hira.2 Lolo onne ai noro maekrara ida pakromo. Maeke onne aman manin Kana'an naran Sua. Yehuda akin nala maeke onne de woro'ohe ho.
3-5 Enla hi ra'ori tatana mo'oni wokelu: anulue Yehuda waki naran Er, ma'akore inna waki naran Onan, onne horu, mori Sela. Lere an mori Sela, Yehuda reiyedi laa leke namehin naran Kesib.
6 Rakan tatana anulu ma naran Er lapedi, Yehuda laa napanak maekrara ida naran Tamar leke noro anan hoe. Ende woro'ohe ho, 7 maa Er onne ailanna rehi penia Makromod hukumesnedi de an maki na'alehe anan.
8 Horuwedi Yehuda hopon anan ma naran Onan na'aheni, “Pa'e, o wallum anulu makiyedi me'e, maa ai na'alehe tatana. Lernohi iknik noho honolla, wa'an rehi lam herre mo'onwallum ho wali'ur o orrum Tamar leke o mala tatana o mo'onwallum.”
9 Onan nauroiroin noho honolla, maa namhene nala tatana mo'onwalla Er. Ende lere ai namkuru wuku noro Tamar, an sopoledi nina wini leke yono mo'onwalla man maki lernala tatana.
10 Onan nina panaeku onne hi'i Makromod na'ahan rehi de hukumesnedi ai.
11 Yehuda anan woro'o man ho Tamar makiyedi de, ai namka'ukedi me'e. Enpenia ai namhene anan mo'oni karuri Sela ho Tamar me'e, kalo'o maki wali'ur. Ende ai lan konohi panin Tamar, “Inaiye, wa'an rehi yom ho lere eniyeni, maa wali wali'ur laa numa ri leleher. Na'amoli ya an'u Sela lapedi mene om wali mai leke mirom ho.” Enime'ede Tamar wali laa nina ri leleher me'e.
12 Nakawedi anna wel'irha, Yehuda hono, Sua anan, maki. Nina sus mak oir horu, Yehuda napolu nina na'aromwali Hira ma nano Adulam onne, de woro'ohe rala'a laa leke Timna. Lolo onne nin ri mahar rosu pipdum wulla ra'olue.
13 Ende rin kukunohi Tamar na'ahenia, “O panum nala'edi Timna lan lernohiyedi man rosu pipdum wulla.”
14 Lere onne Yehuda anan mo'oni karuri Sela lapedi me'e, maa Tamar nauroinedi nahenia panin namhene an ho anan Sela me'e, de an ruriyedi nina nainair walwalum, nair nainair ma'aruru la nodi haiwarware damdamun oin makan. Enla an laa naikoro leke Enaim nina nike lape man pana'an noro kalla man laa Timna.
15 Lere Yehuda lolnohi kalla onne, an do'on maeke onne, la pene'ek ai onne maekyak ono nina nainair nodi damdamun oin makan.
16 Yehuda ka nauroin nahenia onne panin, de lan wakuraniyedi maeke onne ai na'aheni, “Mai ik laa kamkuru wuku.” Tamar walhe na'ahenia, “Pap raram nodi nala inhawa maya'u?”
17 Yehuda na'aheni, “Hi'ihewi ya ala pipiyana ida?”
Tamar walhe, “Wa'ane, horo nahenia pape nalala ha romo ma namwali tanada ya asalale hehenanumene papa aku pipi maya'u.”
18-19 Yehuda na'ukani wali'ur na'ahenia, “Ya ala inhawa tanada ki o?”
Tamar walhe, “Pape hoikaru num deli man rodi kali waiwair o kelem onne noro num au ke'eke'en haenihi.” Yehuda derne nina napanak onneni, an hoikaruwedi nin hahaa onne, la woro'ohe laa ramkuru wuku me'e.
Horu Tamar wali laa nin nakar me'e. An ruriyedi nina nainair ma'aruru eni, la nair wali'ur nina nainair walwalum eni. Kan maha ne, Tamar nornoro raram me'e.
20 Ka nalo'ol Yehuda napanak nina na'aromwali Hira paku ai na'ahenia, “Pape, ya apanak modi pipi eni laa male maekyaka man minle Enaim onne leke mala wali'ur ainu'u hahaa ai nasasala onne.” Ende Hira laa enne na'ukani lalaa mamai maa ka noro maeke onne pakromo.
21 Ende ai na'ukani ri man holi lolo onnenihe, “Mim do'on maekyaka ma nadedem naikoro lolo nika lap enie? Ai ewie?”
Maa hir walhe, “Pape, mai eni maekyak kaale.”
22 Kame'ede Hira wali wali'ur laa Yehuda konohi na'ahenia, “Ya anoin maekyak onne maa ka ore pakromo. Ya a'ukani ri man min lolo onnenihe haenihi, maa ra'aheni lolo onne maekyake kaale.”
23 Yehuda walha, “Kan hi'i haida! Yon ik kanoin ai me'e, kalo'o ri nalau ika. Na'amoli hahaa onnenihe aininale ke'e. Ha ma na'ono, ik kahehe kawo'oredi pair ai me'e, maa ka kore pakromo, de hi'ihehewie!”
24 Nakawedi wollo wokelu rin mai konohi Yehuda na'ahenia, “O panum Tamar onne hi'i kemen namwali maekyake, de ap'apun me'e.” Yehuda derne onne na'ahan wake'e, de hopon ri na'ahenia, “Lam sedu maeke onne laa paharne, harnesnedie.”
25 Kame'ede hir laa sedu Tamar, maa ai nalhari deli noro au ke'eke'en eni, hopon hi rodi laa panin ra'aheni na'ahenia, “Pape, po'onnala hahaa eni nanu. Ri ma nina au ke'eke'en noro deli ma namwali cap eni penia man hi'i panum de apune.”
26 Yehuda po'on hahaa onneni ai na'aheni, “Maeke onne kan sala. Ya'u penia man saleni ono ka ala ya an'u Sela nore ho.” Kame'ede Yehuda ka namkuru wuku noro Tamar me'e.
27 Tamar nina lere alam nokor, an mori tatana adodo'e. 28 Lere an momori eni, tatanida nala liman mai paharne nolu, de man patale orokedi auhe memere ida liman la na'aheni, “Eni tatana anulue.” 29 Maa tatana hedu wali'ur liman, la walla nahehe mai paharne nolu, de man patal na'aheni, “O mahehe moluwedi mo'onwallum mai paharne, de o maruri rehi.” Enpenia waki tataneni naran Peres (napa'ahne, ‘nahehe mai paharne’).
30 Horuwedi nanumene walla man or'orok awaha liman onne mai paharne. An waki naran Zera (napa'ahne, ‘mere ad'ada’).