Yusup noro walinhe
37
Yakup holi nohorai Kana'an lolo aman nina onno nonolu.2 Wanakunu eni Yakup nina wanakunu mormori dardarie:
Ler onne Yakup anan mo'oni ida naran Yusup nina anna idaweli wo'ikku. Ai noro mo'onwalinhe nadedem huri aman nina pipdum ukunne. Mo'onwalin onnenihe rir inna woro'o naran Bilha noro Zilpa ma namwali Yakup nin hophopon wahwahan.
Ler ida Yusup konohi aman nahenia ai mo'onwalin onnenihe hi'i ha ma namehiyala mamani. 3 Yakup na'ileheredi mene hono mori Yusup, de naramyaka Yusup rehi nano mo'onwalin na'akeme. Enla an hi'i rain worworu nanaru ida man ma'aruru wake'e nala kanile Yusup. 4 Enine mo'onwalinhe po'on Yakup naramyaka rehi Yusup, de ra'ahan ai, la ka rodi lir mamamal noro ai me'e.
5 Alam ida nine Yusup namarmi. Enine an konohi mo'onwalinhe nin namarmi eni, de hir erem ra'ahan. 6 An konohi hi, “Makaniyala! 7 Ya amarmi ik na'akeme mahanoro worro gandum. Enla ainu'u gandum worre namririri, la mi na'akeme minim gandum worre lupurala ainu'u. Minim gandum worre rahirawrawa rahuwo'ok ainu'u eni.”
8 Walinhe dadiyale ra'aheni, “Yom mauroin nahenia o mamwali rai mayai!” Hir ra'ahan rehi la ra'aheni, “Ai ka mamwali hophopon wahwahan ki o!”
9 Enine Yusup konohi nina namarmi ida wali'ur na'ahenia, “Ya amarmi ya'u do'on lere, wollo, noro kaliyoro idaweli ida mahanoro rahirawrawa rahuwo'ok maya'u.”
10 An wakunu nina namarmi eni, aman noro mo'onwalinhe derne. Enine aman na'ahan me'e de na'aheni, “O mamarmi inhawa? O mauroin nahenia o ammu, o inum, noro o mo'onwalinhe mai rahirawa rahuwo'ok o!” 11 Enine Yusup mo'onwalinhe akin apinha ai, maa aman akin naledi Yusup nina namarmi me'e.
Yusup lan tolle walinhe
12 Lerida mo'onwalinhe rala'a Sikem huri aman nina pipi ukun. 13 Yakup hopon Yusup, “Lam tolle o wallum mahanoro huri pipi ai lolo Sikem.”
Yusup walhale, “Wa'an, pape.”
14 Aman na'aheni, “Lam po'onala o wallum roro pipi eni hi'ihehewi? Horu, om wali mai konohi ya'u hi wawa'an, ee ka.”
Ende aman hurinohi Yusup nala'a namhara kauhu Hebron. An rakan leke onneni, 15 mehen lalaa mamai kauhu raram onne. An pakromo noro mo'oni ida na'ukani ai na'aheni, “Pa'e, manoin inhawa?”
16 An walha, “Ya anoin i mo'onwal'uhe mahar huri pipi. Papa do'on hi aile lolo ewie?”
17 Mo'oni onne na'aheni, “Hi rala'edi me'e. Ya'u derne hi ra'aheni rala'a Dotan.” Enime'ede Yusup lernohi mo'onwalinhe laa Dotan leke noro hi pakromo.
18 Nano ko'u makun, mo'onwalinhe do'onedi Yusup me'e, de hir paeku wuku leke resne Yusup.
19 Ida ma na'aheni ida, “Po'onale, ri ma namarmi mai me'e. 20 Mai here, ik kesnedi ri onne! Ik sopole laa oir makan poro'uk raram man aile noho mamun eni, la ik ka'aheni ha mormori merwui lape lo'o tamak na'an horuwedi me'e. Enleke na'amoli ik po'on ke'ede, nina namarmi hi'ihehewi? Namwali, ee ka?”
21 Enine Ruben derne ha eniyeni, ainin panaeku lan huri Yusup nano hi liman raram, de na'aheni, “Yono ik kesne Yusup. 22 Yon ik hi'i ha rarrara, ik kala de sopol laedi oir makan raram man aile noho mamun eni, leke yon ik hi'i haida-haida ai.” Ruben wakunu heheni ono nin panaeku noro Yusup wali laa nakar.
23 Yusup lan rakanedi mo'onwalinhe, idewe hi rodi rurilai rala Yusup la ruri nina rain worworu eni.
Sopol Yusup laa oir makan poro'uk raram (NN. 37:23)
25 Hir sopoledi Yusup horu, hi raikoro ra'ak. Maha rara'ak, hir do'on ri Ismael (nano noho Midian) nammori ralislisna ramhara nano noho Gilead rala'ala'a laa noho Mesir. Hirira unta-unta rodi ne'en rampa-rampa, wuru awa'ar, noro wuru wala'ula'u, laa ra'iwali me'e.
26 Enime'ede mo'onwalla Yehuda na'ukani, “Alhi'ihepeni ik kesne ik mo'onwalla karuri la suwaredi rarne? 27 Wa'an rehi ik ka'olu laa ri Ismael enihe me'e, leke yon ik hi'i haida-haida ai, ono ai onne ik mo'onwalla, la iknik ihi rare.” Enine mo'onwalinhe re'enohiyedi.
28 Ka nalo'ol ri nano noho Midian ma nadedem ra'iwali hahaa mai lolo onne. Mo'onwalinhe rala Yusup nano oir makan mai paharne ra'olu wella kupan pere werro'o. Kame'ede ri Ismael onneni rodie rala'a Mesir.
29 Enine Ruben wali wali'ur mai oir makan eni, maa kan do'on Yusup me'e. Idewe ai akin hehel rehi, de sirrikiyedi rain manin kemen ono Yusup kaale me'e. 30 An wali laa mo'onwalinhe na'aheni, “Tatan onne kaale lolo enne me'e. Ya'u hi'i inhawa? Ya'u laa anoin ewi?”
31 Enime'ede hi resne pipi waku ida mene hi rala Yusup nin rain worworue koun pipi rarna. 32 Horu ne, hir hopon ri nodi laa nala aman. Enla hir nou ma nodi enihe, “Rakan ainim ame konohi na'ahenia, ‘Rain eniyeni am do'on kauhu raram. Ken papa po'onale ke'e, eniyeni pap anan nina rain, ee ka?’ ”
33 Ende Yakup po'on rain onne, an polletilu, “Namlolo. Rain eniyenia ya an'u nina. Ha mormori merwui lape tamakedi, de lo'o na'an horuwedi me'e. Ya an'u Yusup lo'o makiyedi me'e.”
34 Idewe Yakup sirrikiyedi nin rain ono naramyaka rehi Yusup, la nair rain rodi kaduk yaka hi'ie, la sus mak oir mamani. An susa nalo'ol wake'e ono naramyaka anan Yusup. 35 Anan na'akemhe mo'oni maeke mai ra'alap akin, maa namhene. Ai na'aheni, “Lo'o ya'u susa rakan i maki, kopur la'u do'on ya an'u.” Penia Yusup aman sus mamani ono naramyaka anan Yusup.
36 Lere onne me'e ne ri Midian onneni ra'olu Yusup rala ri ida naran Potifar lolo Mesir. Ai onne namwali uluwakun ma nadiyaka rai Firaun nina romleu onno.