Rut howok lolo Boas nina kirna
2
Naomi hono Elimelek man maki onne mo'onwalin ida aile lolo onne. Ri onne naran Boas la ai namwali orkanaru man rin horhawe rehi.2 Lerida Rut ma nano Moab eni napanak Naomi na'aheni, “Mame, hurinohi ya'u laa kirna lernohi man rosu gandum enihe. Ya'u lolo kili'ur loiwuku gandum worre ma nadiyaur nano man rosu enihe. Lo'o ya'u lernohi ri ma akin wa'an maya'u de huri ya'u loiwuku gandum ma nadiyaur.” Naomi walha, “Wa'an. Mala'a wawa'anedi, naiye.”
Boas noro Rut pakromo
3 Enime'ede Rut nala'a lan lernohi man rosu gandum leke loiwuku gandum ma nadiyaur. An lernohi man rosu gandum enihe hehen nanumene rakanedi Boas nina kirna. Boas eniyeni, Elimelek nina meheromo raramne.
Rut loiwuku jelai ma nadiyaur (2:16)
4 Ka nalo'olala Boas mai nano Betlehem me'e. An rakanedi ne, nala tape masi nina man howok enihe na'aheni, “Na'amoli Makromod norleuleu norwaliwali mi na'ahoru.” Man howok walha, “Makromod namre'e namharu pape haenihi.”
5 Enine Boas na'ukani nina uluwakun man howok eni, “Inai onne nano meheromo ewie?”
6 An walhe na'aheni, “Inai eni penia namwali do'on awan man lernohi Naomi nano noho Moab wali mai eni. 7 An mai napanak ya'u, ‘Pape lo'o naramyaka ya'u haromo, hurinohi ya'u lernohi maeke man loiwuku gandum worro enihe kili'urne, leke loiwuku gandum worre ma nadiyaur.’ Nano ororeki rakan ors eniyeni, ai kan ren howok. Idedi nanumene warnala tarana lolo heu-heu eni.”
8 Enime'ede Boas wakunu noro Rut na'aheni, “Makaniyala nanu naiye. Loiwuku gandum mai kirna eni mehe, yom laa kirna namehin. Loiwuku gandum ma nadiyaur yon ko'u nano ainu'u maeke man howok eniyenihe. 9 Lo'o hir laa ainu'u kirna namehin, lernohi laa wewerre, yon howok mako'u hi. Ya'u hopon ainu'u mo'oni man rosu gandum enihe yon ra'o'o o. Enla om marou haromo, laa momun oir man ainu'u man howok enihe rala loiyedi e'enoir me'eni.”
10 Rut awikorno rawa laa elimo'o wakunu nahenia, “Alhi'ihepe Pape akin wa'an rehi maya'ue? Kade ya'u eniyeni ri ma nano noho paharnne, maa Pape naramyaka maya'u.”
11 Boas walhe na'ahenia, “Ya'u derne mouwedi num hini'i wenewhe ki panum Naomi me'e. Lere o houm maki o mamharedi numa lekloi la hoikaruwedi num ri leleher la moro panum mai eni leke holiwuku noro ri man ka mauroinala makun. 12 Na'amoli Makromod namre'e namharu o. Naiye akin naili'il Makromod ma namwali Israel nina Makromod Lalap, de mahirei mapinaka mehe Ai. Na'amolia An herre walha onuma hini'i wenewhe man wa'an onne.
13 Rut walhe, “Terimkasi pape! Kade ka amwali pape nina man howok, maa Pape naramyaka'u, de wakunu wawa'an noro maya'u la mahuwa'an ya akin haenihi!”
14 Rakan lere ulu Boas napolu Rut nahenia, “Lariyala mai ka'ak here! Mai remen roti ko'o atal wewerre.” Ende Rut warnala, leke noro man howok enihe ra'ak wewerre. Boas nala roti kunkunu Rut na'an. Na'an pehuredi, narehi aile de na'akenedi. 15 Rut na'ak horu, namriri lan howok wali'ur. An laedi ne, Boas konohi nina mo'oni man howok eniyenihe nahenia, “Na'amoli hurinohi ai loiwuku gandum ma nadiyaur nano gandum man worredi me'enihe. 16 Enla hi'i heruwali nadiyaur leke an loiwukue. Yon ma'o'e, me ma'ahan ai.”
17 Ende Rut loiwuku gandum worre hehen nanumene lere helemedi. Horu ne ai nodi au nukur nina gandum worrenihe leke nodi ihin wakun wali laa nakar. An nukur horu, lernala namansa, lo'o kilo idaweli! 18 Enime'ede Rut nodi nina honowok ihin ennen wali laa nina nakar me'e. An rakan nakar ne, kukul gandum man namansa onne panin, la nala ha nana'an rehin man idedi na'akekene onne panin na'an.
19 Enpenia Naomi na'ukani na'aheni, “Rut, loiwuku gandum lolo inhoi nina kirne? Lereni om howok lolo ewi? Na'amolia Makromod Lalap lo'o namre'e namharu ri manin kirna onneni.”
Kame'ede Rut konohi Naomi inhawe ma namwali nahenia, “Ler eniyeni ya'u howok lolo kirna ida, la or kirna onne naran Boas.”
Rut kukul nin ihin ennen Naomi (2:20)
20 Enine Naomi walha nahenia, “Na'amoli Makromod namre'e namharu ri onne, ono Ai namkene kukul nina aki man wa'an maika man morimori noro idewe ri man makiyedi me'e! Eih, mo'oni onne namwali ik nika rie mememen! Ende ai nina yodi wara namwali ma nadiyaka maika!”
21 Rut ma namhara nano Moab onne na'aheni, “Ri onne konohi ya'u heheni, ‘Yon mako'u ainu'u man howok enihe hehen nanumene rosu gandum horu.’ ”
22 Enine Naomi na'aheni, “Ya an'ue, wa'an rehi om lernohi nina maeke man howok kirna enihe leke yon ri na'o'o o. Lo'o om howok lolo kirna namehin ka auroin lo'o inhawa namwali ki o.”
23 Kame'ede Rut namkene min noro panin, la lernohi Boas nina maeke man howok enihe hehen nanumene rosu gandum horu.