Naomi nala nounaku Rut
3
Lere ida Naomi wakunkunu noro Rut na'aheni, “Ya an'u, wa'an rehi ya anoin ri ida om hoo wali'ur leke mamkene mai eni. 2 Ende makaniyala ainu'u nounaku eniyeni. Naiye, lo'o om horhorok makun lere howok wewerre noro maeke man worro gandum lolo Boas nina kirne? Mauroin Boas onne i hou'u Elimelek mo'onwalla. Rosu gandum horuwedi me'e de alam eni lo'o hi ra'amou gandum lolo nina hahamar onno. 3 Ende wa'an rehi laa maroho, ma'akeki o kemmu, la nair nainair man ma'aruru noro wuru man walaula'u, mene mala'a laa onno hahamar gandum eni. Enimaa madiyaka leke yon an do'on la nauroin ki o aile enne. Lapan hehen nanumene ai na'ak horu, 4 lo'o namkuru me'ede om po'on wawa'an onno ai namkukuru onne leke laa maurani la mamkuru ein ki'il. Om laa mamkuru hariyala nina ho'iho'ir tarana nano ein la mamkuru here. Hi'i heheni leke an konohi o inhawe man wa'an om hi'iye.”5 Rut walha Naomi na'ahenia, “Na'amoli ya'u hi'i na'akeme lernohi inhawa man mama na'aheheni eni.”
Rut namkuru na'urani Boas
6 Enime'ede an laa naroho la nala nainair man ma'aruru nairedi, nala'a laa gandum nina hahamar onno me'e. 7 An rakan enne, lapan Boas na'ak nomun horu, an po'on akin nahuwaan wake'e. Boas laa namkuru lolo gandum hupu onne mahaledi ne, Rut nala'a karkaramedi lan kikan nina ho'iho'ir la namkuruwedi ein ki'il.
8 Rakan alam toro ha'ida hi'i Boas nahumarnedi de heriyala la mehe hapu laa wali-wali, maeke eni namkukuru aile ein ki'il. 9 Boas na'ukani, “Ki o eni inhoi?”
An walha Boas na'ahenia, “Ya'u eni Rut, num hophopon wahwahan. Ya apanak pape hoo noro mayau, ono pape penia namwali ainima ri de pape nina molollo aile madiyaka mayai.”
Boas nahumarnedi do'on maeke wakurani ai. (3:9)
10 Enine Boas na'aheni, “Na'amoli Makromod namre'e namharu o. Lere eni om hi'i ha man eren wawa'an nano nonoluweni moro panum, ono ka manoin hoo noro mana'ikaka man karu me na'alehe haida-haida, maa om raram nodi moro ya'u hoo. 11 Ende yom ma'iruhu, inhawe man ma'aheni onne ya'u hi'i wewhe, ono ri man minle lolo kote eni rauroinedi me'e nahenia o eni ri ma'eke manin morimori ma'aruru. 12 Namlolo, yo odi molollo adiyaka o num morimori, maa ri ida aile nina molollo narehiyedi maya'u ono ai onne mi wallum mememen. 13 Ende a'alam eni min mai eni, la noho na'ikeki roropo mene mala'a. Enla oreki mene ya'u laa oro ai wakunu, lo'o ai ne'e noro o hoo, wa'an, maa lo'o namhene, ya'u hi'i kenekrohu lolo Makromod Lalap man mori laa ewi-ewi kalarna nahenia yo oro o hoo. Ende mamkuru me'e, noho roropo mene mala'a.”
14 Kame'ede ai namkuru Boas ein ki'ile, noho roropeni ne, namaka nala'a me'e, ono Boas nina panaeku yon ri nauroin namkuru lolo onne. 15 Rut ka nala'a makun, Boas hopon nala nina haiwarwara werre kalarne la nasala kerehe. Enine ai nala gandum kilu werro'o rehi loile haiwarwareni, wuku nodi nala'a. Enla Boas onne wali laa kote me'e haenihi.
16 Rut waliyedi laa nina nakar ne, panin na'ukani, “Ya an'u, hi'ihewiyale? Wa'wa'an ee ka?”
Rut konohi inhawe man Boas hi'i wewhe noro ai eni. 17 An konohi wali'ur nahenia, “Ai nala gandum namansa yo odi haenihi, ono ai na'aheni kan wa'an ya alalali wali mai nakar.”
18 Kame'ede Naomi na'aheni, “Yon mahini'i, maa ik weilapan derne inhawa namwali mehe, ono lere eni me'ede mo'oni eni hi'i wewhe panaeku eni hehen nanumene horu.”