Boas hoo noro Rut
4
Enime'ede Boas nala'a laa kote nina nika lapa makan naikoro lolo onne.Ka nalo'ol Elimelek walin ma nodi molollo narehi ai mai. Boas lariyale na'aheni, “I wal'u, mai eni kaikoro wukuwedi.” Ende mo'oni onne mai naikoro nohiyedi.
2 Enine Boas nili leke nina ri leleher anulu idaweli ma aile lolo onne, lariyala raikorowuku haenihi. Hi raikorwukuwedi ne, 3 Boas wakunu noro walin na'aheni, “Naomi man hoo noro Elimelek waliyedi nano noho Moab me'e, la nina panaeku na'olu Elimelek nina nohana raiyana me'e. 4 Ende ya'u konohi pape mouropo lolo ri leleher anulu enihe kalarna nahenia yo oro pape mehe nima molollo aile weli noho eniyeni, maa papa nina molollo nolu mene maya'u. Ende lo'o pape raram nodi weli, wa'ane, maa lo'o pape raram ka nodi weliye, konohi maya'u mouropo leke ya auroin.
Ai ne'el Boas na'ahenia, “Na'amoli ya'u weli.”
5 Enimaa Boas na'aheni wali'ur, “Lo'o om weli noho onneni nano Naomi, Rut ma namhara nano Moab onne pape nale namwali num maekleher haenihi. Ai onne maeke walwalum, la hone ik walin mememen. Iknik noho nina holoor halauk kakaredi me'e leke yono Elimelek naran molu, de lere man mai tatan man wawa naran aile manarna noho eniyeni.’
6 Enine ri onne walhe, “Eih, hi'i heheni ka'u paekunale, kalo'o ya an'u mememen enihe roro ri namehin rakerne ha'ar ainu'u noho na'akemeni, de lere eni ya'u huriyedi ainu'u molollo ka'u weli noho onne me'e. Wa'an rehi pape mehe welie.” 7 Ler nonolu onne ri Israel nina holoor halauk hi'i heheni: lo'o ri ida huri nina molollo weli noho, me na'olu, ai nohuwedi nina pakpak ei mene nala ri man weli noho onneni. Hir hi'i heheni leke ri na'akeme do'on rauroin namlolo kokkoo ra'onno rawinauwedi pana'eku me'e. 8 Eni penia ri onne konohi Boas, “Om weli noho onne here.” Enla ai nohuwedi nina pakpak ei nala Boas.
9 Enine Boas konohi leleher anulu roro ri na'akeme ma aile lolo onne, “Mi na'ahoru mamwali man kuku maka nahenia lere eniyeni ya'u weli Elimelek, anan Kilion noro Mahlon rira nohana raiyana nano Naomi. 10 Enla maeke ma namhara nano Moab, Mahlon hono onne, ya ale namwali ainu'u maekleher. Kade Elimelek noro anan makiyedi me'e, maa upun ananhe ramkene rira nohana raiyane, leke rodi wekwekelle naranhe la yono lodon walin hamlinu hi. Lere eniyeni mi na'akeme mamwali man kuku maka.”
11 Horuwedi ne, leleher anulu roro ri na'akeme ma aile lolo nika lape onne walha ra'ahenia, “Ai mamwali man kuku maka! Na'amoli Makromod namre'e namharu maeke eni namwali num maekleher leke ai naise Rahel noro Lea man moriyana ra'uwana penia manin Israel namansa. Na'amoli Makromod nodi nala pape mamwali orkanaru lolo luhu Eprata la na'amoli oin naran ra'akulu ra'alap lolo Betlehem. 12 Na'amoli Makromod namre'e namharu ki o la Nala tatan nammori lolo maeke om hohoo eni leke num kuu pe'eredi naise Peres ma namwali Yehuda noro Tamar ananne.
Naomi Upun Anan
13 Ende Boas noro Rut hoedi, la Makromod namre'e namharu Rut de mori mo'oniyana ida. 14 Maeke na'akeme man min leke onne lawuku re'el Naomi ra'ahenia, “Ik ka'uli kasa'a Makromod ono Ai nala mo'oniyanida ilitolle Naomi lere man mai. Na'amoli tatan onne naran pe'eredi lolo noho Israel na'akeme! 15 Rut ma naramyaka o, moriyana mo'oni eniyeni, la lere mame na'ileheredi ai onne man ilitolle ki o la na'alapa o akim, ono panum Rut ma naramyaka o penia man moriye. Enlo'o mama moriyana mo'oni woisku mano rira raramyake kan wa'an narehi nano Rut.” 16 Naomi naramyaka tatan onne de ilitolle la wayahu wawa'anedi. 17 Ma'eke nakarwali enihe waki tatana onne naran Obed la ra'aheni, “Naomi lernaledi mo'oniyanida ho'o me'e.” Obed eni peni na'ori Isai, la Isai na'ori Daud!
Peres Upun Anan
18 Peres eniyeni na'ori Hesron,
19 Hesron na'ori Ram,
Ram na'ori Aminadab,
20 Aminadab na'ori Nahason,
Nahason na'ori Salmon,
21 Salmon na'ori Boas,
Boas na'ori Obed.
22 Obed na'ori Isai,
la Isai onne na'ori Daud.