2
Makromod Lalap nodi kalla onne nakuku nawauwedi noho, a'am, noro ne'en raram na'akeme.2 An hi'i na'akeme horu, rakan oreki, alam wo'ikku nine, An warnala. 3 Ai namre'e namharu alam wo'ikku nina onne, la hi'i namwali alam ma na'ono narehi alam namehin enihe. An kakar heheni ono rakan lere wo'ikku eni An warnala nano Nin honowok na'akemeni. 4a Wanakunu eni penia noho noro a'am nin ma namwalie.
Makromod Lalap umupala mo'oni noro maeke
4b-5 Lere Makromod Lalap hihi'i noho wawan noro a'am onne, au or'oriyane kaale ono ka nala okon mai noho wawan makun, la man howok kirna kaale makun. 6 Lere onne oir man keula mehe napa'uk noho wawan na'akeme. 7 Enime'ede Makromod Lalap nala elimo'o tarana umupale namwali mo'oni kemen. Horu ne, Ai nou aran ma nala or'ori laa irun ku'il, idewe namwaliyedi ri mormori.
8 Horuwedi ne, Makromod Lalap hi'i kirnida lolo Eden man aile wali kimur nala mo'oni onne holi lolo onne. 9 Kirna onne raramne Makromod Lalap na'amoriyedi au'onno warna-warna aiyedi me'e. Au'ono onnenihe po'on ma'aruru la woin namina haenihi. Lolo kirne toro onne, Makromod Lalap kaman au'onno woro'o. Au'ono ida woinni lo'o ri na'an, an mori laa ewi-ewi, la au'onno ida wali'ur woinni ri na'an, ai nauroin inhawa man yake noro inhawa man wa'an.
10 Oir wauwau ida aile man wau napa'uk kirne Eden raram. Oir onne wau laa kirna paharne mene nahana namwali oir wauwau wo'akka. 11-12 Oir wauwau hanan dedesne eni naran Pison, wau laliweweredi noho Hawila. Lolo noho onne mahe ihie aile, nornoro au mahairn wola'ula'u, noro waku lerlere man wella ai wawan naran krisopras. 13 Oir wauwau hanan woro'o nine naran Gihon, wau laliweweredi noho Kus.b 14 Oir wauwau hanan wokelu nine naran Tigris. Hanan eni namwali korono noho Asyur wali kimur. Oir hanan wo'akka nine naran Efrat.
15 Makromod Lalap nala mo'oni onne min lolo Eden leke howok la nadiyaka kirne wawa'anedi. 16 An nou mo'oni onne na'ahenia, “Au man woiwoi kirne raram na'akeme mo'on, 17 maa au woiwoi man minle kirne toro man hi'i ri nauroin inhawa man wa'an noro inhawa man yaka, yon mo'on. Lo'o o mo'one, om maki.”
18 Horuwedi, Makromod Lalap na'aheni wali'ur, “Kan wa'an ri mormori eni memehedi, de Ya'u umupala ri ida wali'ur ma nedile akin leke pakuwala ai.”
19-20 Enla ha mormori warna-warna noro manu liwliware man Makromod Lalap hi'iyedi nano elimo'o me'enihe, na'akeme Ai nodi laa mo'oni onne leke po'on, la derne ai nala inhawa naran hi. Ende mo'oni onne nala naran ha mormori warna-warna noro manu liwliware onne dohodoho.
Enimaa ai me'e ne na'alehe nin ri man paku makun. 21 Ende Makromod Lalap hi'i mo'oni onne namkuru mahaledi mene Ai nala rusan ida, horu nodi ihin pasun wali'ur. 22 Nano rusan onne An hi'i namwali maeke ida. Horu ne, nodi maeke onne laa nalle mo'oni onne.
23 Mo'oni po'on maeke onne ai na'aheni, “Ai eni penia rurna nano ya'u rurna la ihin nano ya'u ihin. Ya'u waki ai naran ‘maeke,’c ono Makromod Lalap hi'iyedi ai nano mo'oni.”
24 Ha eni penia mo'oni hoikaruwedi inna aman la noro hono minwuku leke ramwali kemen mahaku raram mahaku.
25 Lere onne woro'ohe radlewlewhe, maa ka rawawa.