Ri mormori kar derne rakani Makromod Lalap
3
Nano ha mormori man Makromod Lalap hi'ie na'akeme, nee nauroin wukupoho ri narehi. Lerida nine nee onne na'ukani maeke onne na'ahenia, “Namlolo kokkoo, Makromod Lalap kawala mi na'aheni yono mi mo'on auwoi man minle kirna raram enie?”2-3 Maeke onne walha na'aheni, “Ka! Na'akeme Makromod Lalap hurinohi ai mo'on, maa auwoi man minle kirne toro yono airo mo'on, roulle me'e ne luli, kalo'o am maki.”
4 Maa nee na'aheni wali'ur, “Lo'o ka! Mi mo'on kam maki! 5 Maa Makromod Lalap nauroinedi me'e nahenia mi mo'on auwoi onneni mi mauroin panaeku man wa'an noro panaeku man yake namnenehe noro Ai.”
6 Enla maeke onne po'on auwoi onne ne, noro akin wakunu na'ahenia, “Auwoi onne ma'aruru la lo'o namina, de wa'an rehi yo o'on leke ainu'u woroin nammori.” Enime'ede neku auwoi onne na'an. Ler onne hono aile wewerre lolo onne, de ai nala hono na'an haenihi. 7 Hi ra'an horu ne, rauroinnale nahenia radlewlewhe me'e, de rala ara kawi akur wuku rodi pasunala kemenhe.
8 Rakan lere mamal, rakaniyala Makromod Lalap nala'ala'a aile kirne raram, de lar suwaredi lolo au'onno ma aile lolo onne. 9 Maa Ai napolu mo'oni onne na'ahenia, “Heih, pa'e, o ai ewi?”
10 Mo'oni onne walhe na'ahenia, “Ya'u derne Makromod nala'a lolo kirna raram, penia ya amka'uk la ya awawa ono ya adlewlewehe de ya'u lari ma'u suwaredi ya'u.”
11 Makromod Lalap na'ukani, “Inhoi man kukunohi nahenia madlewlewehe? O mo'onedi auwoi man Ya'u heheruk onne me'e?”
12 An walhe na'ahenia, “Maeke man Makromod nanala maya'u eni nala yo o'on.”
13 Kame'ede Makromod Lalap na'ukani maeke onne, “Om hi'i inhawa?”
An walha, “Nee onne wukupoho ya'u, de yo o'on auwoi onneni.”
Makromod Lalap nakineri wokeluhe
14 Makromod Lalap nakineri nee na'ahenia, “Numa hini'i eniyeni ailanna wake'e, de Ya ala hunukum man werek ki o narehi ha mormori na'akeme. Nano lere eniyeni rakan om maki modi irhumne horu mamani, la mo'on elimo'o hapu hehenanumene num kulere. 15 Ya'u hi'i o moro maeke onne mamwali arwali, la ai upun ananhe roro o upum anumhe ra'ara mamani. O ma'unihi ai upun anan ein ki'il, maa ai upun anan onne na'itehe o uluwakum.”
16 Enla Makromod Lalap kukunohi maeke onne na'ahenia, “Lere om moriyana, o kemen apinha wake'e. Enimaa o maramyaka num mo'onleher la ai nodi molollo ki o mamani.”
17 Horu ne, An kukunohi mo'oni onne na'ahenia, “Kam lernohi Ainu'u nou, la om lernohiyedi houm nina panaeku, penia mo'onedi auwoi man Ya'u heheruk me'e. Ende Ya akineri elimo'o eni, penia susa mene au or'oriyana mori lole. Nano lere eniyeni rakan num ku helem om howok modi ruri pe'el noro kemen apinpinha mene lernala hanana'an leke mo'on la mori. 18 Mim kaman au kanaman warna-warna leke mo'on, maa kar mori wawa'an ono elimo'o ruri roko mamani. 19 Lo'o om howok, awenne dupu mene elimo'o eni nala ihin ennen o mo'on hehenanumene om maki rawilo'o o. Ya'u umupala o nano elimo'o, de om maki, om wali wali'ur laa elimo'eni.”
20 Adam waki hono naran Hawa,a ono maeke onne namwali ri mormori noho wawan rir ine. 21 Enla Makromod Lalap hi'i nainair nano ha mormori ulikne rale hir nair.
22 Horu ne, Makromod Lalap wakunu wali'ur na'ahenia, “Lere eni hi onne rauroinedi inhawa man wa'an noro inhawa man yake, de raisa ra'oi Maika me'e. Yon Ik hurinohi hi laa ra'an auwoi ma nala or'ori dardari laa ewi-ewi eni.” 23 Enime'ede Ai nohi hi ramharedi kirna Eden, laedi onno namehin. An umupala hi rodi elimo'o, de hopon hir howok lolo elimo'o leke ra'an ihin ennen leke mori. 24 Makromod Lalap nohi hi ramharedi kirna Eden eni ne, An hopon Nina Kerub eniheb minle kirna wali kimur leke radiyaka kirna onne. Enla Makromod Lalap loile raa aiye ida man mehe napaililili laliwewer haenihi, la hopon Nin raa noro Nin ma nadiyakenihe radiyaka kalla leke yon ri mahaku laa kirna raram na'urani au'onno ma nala or'ori dardari laa ewi-ewi eni.