Hawa moriyana Kain noro Habel
4
Adam noro Hawa ramkuru wuku, de Hawa nornoro raram me'e. Lere alam nokor moriyana mo'oni ida. Hawa na'aheni, “Makromod pakuwedi maya'u penia mori tatana mo'oniyanida.” Ende an waki naran Kain.2 Horu, an mori tatana mo'oniyanida wali'ur, de an waki naran Habel. Woro'ohe lapedi, Habel namwali man huri, la Kain namwali man howok kirna.
3 Lerida Kain nala nina kirne ihin ennen heruwali nodi lan hoikani Makromod, 4 la walla Habel nala pipdumana anulu nodi hoikani haenihi. Ai nesne pipdum onne nanumene nala ihin man wa'an nodi lan hoikani Makromod. Makromod do'on honoi kanani woro'o onne, Ai akin nahuwa'an Habel noro nina honoi kanani onneni, 5 maa Ai kan kokala Kain noro nina honoi kanani eni, penia Kain na'ahan rehi, de oin makan mermeru.
6 Ende Makromod ne'el Kain na'ahenia, “Hi'ihepenia o ma'ahan, la oum makum mermerue? 7 Lo'o om hi'i ha wawa'an, Ya'u kokala o, maa lo'o om hi'i ha ma ka namlolo, dohohala namkene nodi molollo ki o, naise singa ma namkene tamak ya'ane. Dohohaleni nin panaeku hi'i o madiyaur, maa yono hurinohie, mahehe om rehiyedi dohohala onne.”
8 Lerida Kain napanak Habel rala'a laa kirne wewerre. Hir rakan kirna ne, Kain riukesnedi Habel.
9 Makromod mai na'ukani Kain, “Mo'oni wallum ai ewi?”
Kain walha na'ahenia, “Ka auroine. Yo or'ore mamani pe?”
10 Maa Makromod na'aheni wali'ur, “Alhi'ihepenia om hi'i ha man yak onne? O mesne mo'onwallum, de rarna nakliu elimo'o eni. Rarne onne napolpolu Ya'u leke hukum o. 11 Ende Ya akineri o, ‘Nano lere eniyeni kam howok kirna me'e, ono om mesnedi mo'onwallum, la rarna dupuwedi laa elimo'o me'e. 12 Lo'o mahehe howok kirna, maa kam lernala raramne, la ka mamkene onnida de laliwewer noho wawan mamani.’ ”
13 Maa Kain walha Makromod na'ahenia, “Hunukum eniyeni werek rehi de ka a'uwaranale. 14 O mohiyedi ya'u nano noho eniyeni ko'u nano O kalarum me'e. Ya a'alehe onno mai noho wawan de ya'u lalaa mamai laa ewi-ewi. Ya amka'uk oro inhoi-inhoi pakromo lo'o hi resnedi ya'u.”
15 Maa Makromod walha na'ahenia, “Ka, inhoi ma nesne o, Ya ala hunukum rew'ikku man werek nano onum hunukum eni.” Horu ne, Makromod hi'i tanada Kain kemen leke ri noro pakromo rauroiroin de yono resne.
16 Kame'ede Kain namhara lolo onne nako'uwedi Makromod, la ai nala'a hehenanumene rakan onnida naran Noda man aile lolo kirna Eden wali kimur.
Kain upun ananhe
17 Kain noro hono ramkuru wuku, de moriyana mo'oni ida, la waki naran Henok. Lere onne an dokor leke worworu ida, de waki leke onne naran Henok, lernohi anan naran. 18 Henok na'ori Irad, la Irad na'ori Mehuyael, la Mehuyael na'ori Metusael, la Metusael na'ori Lamek. 19 Lamek hono woro'o, ida naran Ada la ida naran Zila. 20 Ada moriyana anan naran Yabal. Upun ananhe ramwali man huri, la hir holile heuheu laliwewer onnida laa onnida. 21 Walla karuri naran Yubal. Upun ananhe rauroin ra'aromo musik. Hi rauroin rou poloit, la rauroin ra'aromo kecapi.b
22 Lamek hono ma naran Zila onne mori Tubal-Kain. Upun ananhe ramwali man kuku. Hir kuku hahaa warna-warna nano pesi noro pirmere. Tubal-Kain narna maekida naran Na'ama.
23 Lerida, Lamek ne'el hono woro'o enihe na'ahenia,
“I hou'u woro'o mie, derne makaniyala maya'u nanu.
Lere man laa eni mo'oni ma na'ikaka ida riuk ya'u de ye esnedi me'e.
24 Lo'o ri ma nesne Kain lernala hunukum rew'ikku,
ri ma nesne maya'u lo'o lernala hunukum rewen weli'ikku wo'ikku.”
25 Enla, Adam namkuru wuku noro hono wali'ur, de moriyana tatana mo'oniyanida naran Set.c Hawa na'aheni, “Makromod Lalap naledi tatana mo'oni ida maya'u nahinerre Habel man Kain nenesneni.” 26 Set na'ori tatana mo'oniyanida naran Enos haenihi.
Rakan Enos nin ku onne mene ri nauroin hi'i lir napanak la ra'uli rasa'a Makromod.