Nohe Nin Ma Namwali Dedesne
Makromod Lalap nakuku noho naleu a'am noro ne'en raram
1
Dedesne wake'e, Makromod Lalap nakuku noho naleu a'am eni.2 Lere onne noho ka naisa ka na'oi makun la ha wo'ira kaale. Oir lape aile la metmetek pupupin oir onne makun. Makromod Lalap Nin Roh lalaa mamai lolo oir wawan.a
3 Enime'ede Makromod Lalap na'aheni, “Ropedi here.” Ideweni ne ropropo namwaliyedi. 4 An po'on ropropo onneni, akin nahuwa'anedi ono po'on wa'an. Horu ne, Ai naheiredi ropropo nano metmetek. 5 An waki metmetek eni naran ‘a'alam’, la ropropeni ‘lelere.’ Lere alam onne lere dedesne nine.
6-7 Alam dedesne horu, Makromod Lalap na'aheni wali'ur, “Rodi onno man mammamu naha'aredi oire.” Me'e'eni me'ede oire nahina'aredi de heruwali minle wawan la heruwali minle yawa. 8 Enla An waki onno man mammamu onne ‘a'am’. Lere alam onne lere woro'o nine.
9 Alam woro'o horu, Ai na'aheni wali'ur, “Oir man minle yawa onne lawukuwedi onnida here, leke noho ma napro'uk aile.” Me'e'eni me'ede oir lawukuwedi onnida. 10 Noho ma napro'uk onne, An waki naran ‘ro’, la oir man lawuku onne waki naran ‘lour.’ An po'on ha wo'ira na'akeme onne wa'an.
11-12 Horu, Makromod Lalap na'aheni wali'ur, “Au or'oriyane na'akeme namharedi elimo'o here! Penek noro au or'oriyane man woiwoi na'akeme namharedi elimo'o here! Au or'oriyana onne namwali warna-warna nammori nornoro dipin woin.” Me'e'eni me'ede namwali. Idewe penek noro au or'oriyana man woiwoi na'akeme mori de ramharedi elimo'o. Enpenia au or'oriyana onne ramwali warna-warna nammori nornoro dipin woin. An po'on onne na'akeme akin nahuwa'anedi ono po'on wa'an. 13 Lere alam onne lere wokelu nine.
14 Alam wokelu horu, Ai na'aheni wali'ur, “Ha man ropropo minle wawan here, leke ha'aredi lelere nano a'alam! Na'amoli ha man ropo onne namwali tanada man kakar lere, anna, noro yara kimur la yara warak. 15 Na'amoli ha eniyenihe ropala noho wawan here!” Me'e'eni me'ede namwaliyedi. 16 Ende Makromod Lalap hi'i ha ropropo lapa woro'o. Man lapa narehi ropala lelere, la man tana narehi ropala a'alam. An hi'i kaliyoro haenihi. 17 An kakar ha eniyenihe loile a'am leke na'aropo noho wawan. 18 Ende hahaa onne ropo lelere la ropo a'alam, leke naheir ropropo nano metmetek. An po'on ha wo'ira na'akeme An hihi'i onnenihe, akin nahuwa'anedi ono na'akeme wa'an mamani. 19 Lere alam onne lere wo'akka nine.
20 Alam wo'akka horu, Makromod Lalap na'aheni wali'ur, “I'in noro ha man mormori warna-warna na'akeme mori lolo lour here! Manu liwliwar warna-warna mori la liwar lalaa mamai lolo a'am here!” 21 Enpenia An hi'i i'in warna-warna, noro ha mormori man lalap man minle kahi raram eni, noro manu man liwliwar noho wawan eni nornoro walla na'akeme. An po'on ha hihi'i eniyenihe akin nahuwa'an ono wa'an mamani. 22 Horu Ai namre'e namharu i'in man minle kahi raram noro manu man liwliwar leke eren nammomori. 23 Lere alam onne lere wolima nine.
24-25 Alam wolima horu Makromod Lalap na'aheni wali'ur, “Na'amoli ha mormori warna-warna na'akeme ramhara noho kerkerne here! Ha mormori merwui, ha mormori oromnoo noro ha mormori ma na'ina'ik elimo'o na'akeme ramharedi elimo'o here!” Me'e'eni me'ede namwali. Idewe ha mormori warna-warna na'akeme nornoro walla ramhara mouwedi elimo'eni. An po'on Nin hini'i onnenihe akin nahuwa'anedi ono na'akeme wa'an mamani. 26 Eni horu Ai na'aheni wali'ur, “Mai ik hi'i ri mormori naise na'oi Maika.b Na'amoli hi rodi molollo i'in man minle kahi raram, manu man liwliwar noho wawan, noro ha mormori oromnoo, la ha mormori namehin man aile noho wawan eni.”
27 Ende Makromod Lalap umupala ri mormori naise na'oi Ai mehe. An umupala mo'oni noro maeke.
28 Ai namre'e namharu hi la hopon na'ahenia, “Moriyana dariyana eren nammomori leke holi lolo noho wawan na'akeme, la modi molollo i'in man minle kahi raram, manu man liwliwar noro ha mormori na'akeme! 29 Po'onala! Ya ala mi hanana'an warna-warna lolo noho wawan eni: onneni au kanaman man woiwoi noro au kanaman man ihin wakun aile na'akeme. 30 Ya ala au kanaman warna-warna ha mormori ra'an. Ha mormori oromnoo, merwui, ma na'ina'ik noro manu liwliwar na'akeme.” An wakunu onne horu, na'akeme namwaliyedi. 31 An po'on ha eniyenihe na'akeme, akin nahuwa'anedi ono ma'aruru wake'e. Lere alam onne lere woneme nine.