Makromod Lalap nawokor nakaliyedi wanakunu lolo kota Babel
11
Nonolu ri mormori noho wawan nair wanakunu mahaku mehe. 2 Ka nalo'ol heruwali rahina'ar laa noho wali kimur, la hir rakan kauhu melmele ida lolo nohorai Babilonia, de holi ramkene lolo onne. 3-4 Hi na'akeme lawuku, la ida ma ne'el ida, “I wal'u mie! Mai ik ka'aririyala kota lapida! Lolo kote raram ik ka'ariri manara kukulu ida man wuwan rakan a'am leke ik naran pe'er, la kamwali hair lapida leke yono kahina'ar me'e.” Ende hir hi'i waku tele nammori nanumene harne leke kerhe mene rodi ter darwuku hi'i kota onne.
Ra'ariri manara lolo Babel (NN. 11:3-4)
5 Enime'ede Makromod kopur man po'on kota onne noro manara kukulu man hi ra'aririri onne. 6 Horu Ai na'aheni, “Eih! Ri mormori enihe ramwali hair mahaku la nair wanakunu mahaku. Lo'o lere eniyeni hir paekunala hi'i ha naise eniyeni, ka nalo'ol lo'o hi rauroin hi'i inhawa memehe rodi rir suk aimehi. 7 Wa'an rehi Ik kopur, la kawokor kakaliyedi rira wanakunu leke yono hi ida ma nauroin ida nina wanakunu.”
8 Kame'ede Makromod kopur la nawokor nakaliyedi hirira wanakunu, penia An hi'i ri mormori onnenihe rahina'aredi lolo noho wawan na'akeme, de ka ra'ariri manara onne me'e.
9 Enpenia hir waki kota onne naran Babela ono Makromod mai nawokor nakali rir wanakunu la reiha'ar hi laa noho wawan na'akeme.
Sem upun ananhe rakan Abram
10 Eniyeni Sem upun ananhe: Lere Sem nin anna rahu ida ai na'ori tatan mo'oni ida naran Arpaksad. Lere onne oir lapa man lipan noho wawan namkisiyedi anna woro'o me'e. 11 Na'ori Arpaksad horu, an mori anna rahu wolima makun. Lere an mormori makun, ai na'ori tatana mo'oni maeke wali'ur.
12 Arpaksad nina anna welikelu wolima mene ai na'ori tatana mo'oni ida naran Sela. 13 Na'ori Sela horu, an mori anna rahu wo'akka wokelu makun. Lere an mormori makun, ai na'ori tatana mo'oni maeke wali'ur.
14 Sela nina anna welikelu mene ai na'ori tatana mo'oni ida naran Eber. 15 Na'ori Eber horu, an mori anna rahu wo'akka wokelu makun. Lere an mormori makun, na'ori tatana mo'oni maeke wali'ur.
16 Eber nina anna welikelu wo'akka mene ai na'ori tatana mo'oni ida naran Peleg. 17 Na'ori Peleg horu, an mori anna rahu wo'akka welikelu makun. Lere an mormori makun, na'ori mo'oni maeke wali'ur.
18 Peleg nina anna welikelu mene ai na'ori tatana mo'oni ida naran Rehu. 19 Na'ori Rehu horu, an mori anna rahu woro'o wohii makun. Lere an mormori makun, ai na'ori tatana mo'oni maeke wali'ur.
20 Rehu nina anna welikelu woro'o mene ai na'ori tatana mo'oni ida naran Serug. 21 Na'ori Serug horu, an mori anna rahu woro'o wo'ikku makun. Lere an mormori makun, na'ori tatana mo'oni maeke wali'ur.
22 Serug nina anna welikelu mene ai na'ori tatana mo'oni ida naran Nahor. 23 Na'ori Nahor horu, an mori anna rahu woro'o makun. Lere an mormori makun, na'ori tatana mo'oni maeke wali'ur.
24 Nahor nina anna werro'o wohii mene ai na'ori tatana mo'oni ida naran Tera. 25 Na'ori Tera horu, an mori anna rahu idaweli wohii makun. Lere an mormori makun, ai na'ori tatana mo'oni maeke wali'ur.
26 Tera nina anna weli'ikku mene ai na'ori tatana mo'oni wokelu naran Abram, Nahor, noro Haran.
Tera upun ananhe
27 Eniyeni Tera upun ananhe: Tera na'ori Abram, Nahor, noro Haran.
Haran na'ori tatana mo'oni ida naran Lot, 28 la an maki lolo nina lekloi Ur-Kasdim.b Lere an maki aman mormori makun. 29 Abram ho noro maeke ma naran Sarai, la Nahor ho noro mo'onwalla Haran anan naranne Milka. Lere Haran onne kan maki makun, ai na'ori tatana maeke woro'o: Milka noro Yiska. 30 Maa Sarai onne kan moriyana.