Makromod Lalap napolu Abram
12
Lere onne Makromod hoponedi Abram na'ahenia, “Abram! Mamharedi onum nohorai, onum luhu, onum ama nin nakar. Mala'a laa noho man Ya'u kukul ki o. 2 Na'amoli Ya ala rere'e haharu ki o, la hi'i o upum anumhe moriyana dariyana nammori la ramwali hair man lewlewen, de o naran pe'er lolo ewi-ewi, la o mamwali rere'e haharu ri namehin. 3 Na'amoli Ya amre'e amharu ri ma namre'e namharu o, maa Ya'u akineri ri ma nakineri o haenihi. Na'amoli noho wawan na'akeme lernala rere'e haharu lolo ki o.”4-5 Lere onne Abram nin anna weli'ikku wolima. Ai noro hono Sarai, aniyene Lot, noro nin kanaru na'akeme la nin hophopon wahwahan man an lernala lolo Haran onne, hi na'akeme ramhara Haran lernohi Makromod Nin honopon. Hi rala'a hehenanumene rakan noho ma naran Kana'an.
6 Lolo Kana'an onne Abram noro nin ri rala'a mamani rakan au'onno lalapida wekel More ma na'urani leke ida naran Sikem, de hi rahirei min lolo au'onno onne. Lere onne manin Kana'an enihe holiholi noho onne makun. 7 Lolo onne Makromod nalhari kemen Abram na'aheni, “Na'amoli Ya ala noho eniyeni o upmu anumhe.” Horu ne, Abram dara waku namwali panaur leke hoikani Makromod ma nalhariyedi kemen ai lolo onneni.
8 Onne horu, Abram namhara lolo onne nala'a wo'or ma aile wali karanna. Hi ra'ariri rir heuheu min lolo leke Betel noro leke Ai leken. Betel onne aile wali warak la Ai onne aile wali kimur. Min lolo onne an dara waku namwali panaur la na'uli nasa'a Makromod. 9 Horu ai nala'a laa karanna kulikuli onno laa onno rakan noho Negeb.
Abram laa noho Mesir
10 Ler ida noho Kana'an lernala roulara lape, de Abram nala'a laa karanna rakan Mesir, la min lolo onne hehenanumene noho roulara lapa onne horu. 11 Na'akeki hir rakan Mesir, an nou hono na'aheni, “O mamwali maeke herlei, 12 de ri Mesir enihe po'on o ma'aruru, la rauroin om ho noro maya'u, lo'o hi resna'u la hurinohi om mori. 13 Ende wa'an rehi om konohi hi na'ahenia, o eni, i nar'u, leke yon hi resna'u. Na'amoli hir hi'i wawa'anedi ya'u ono hir suk o.”
14 Abram rakanedi Mesir ne, ri Mesir onne po'on Sarai ma'aruru rehi. 15 Ler ida rai Mesir nina man howok enihe po'on maeke onne ma'aruru, de hi ra'ul'uli ai lolo rai kalarna la rore laa rai nina nakar. 16 Enpenia rai kokala Abram noro wawa'an ono ai raram nodi maeke onne. Ende Abram lernala pipduma, sapi, keledei dalu rara, unta, noro hophopon wahwahan mo'oni maeke. 17 Maa Makromod nala kini'ir warna-warna man yak wake'e rai onne noro nina nakar raram ono ai naledi Abram hono. 18 Enpenia rai napolu Abram na'ahenia, “Abram! Om hi'iyedi inhawe maya'u me'e? Alhi'ihepenia o kam konohi molololo na'aheni maeke eni o houme? 19 O ma'aheni ai onne o narume karurie peni, manlo'o ya ale namwali i hou'u me'e! Eni o houm de more mala'a here!” 20 Horu ne, rai komdere nina man howok enihe rorkaru Abram noro hono rodi rira hahaa na'akeme ramharedi lolo onne.