Abram noro Lot rahina'ar
13
Ende Abram noro hono, aniyene Lot rodi rira hahaa ramhara Mesir wali wali'ur laa noho Negeb. 2 Abram onne orkanaru lapa, nina mahe, pere noro ha mormori nammori. 3 Ai namhara Negeb, kulikuli onno laa onno, rakan onno man aile leke Betel noro Ai leken wali'ur. Nonolu an hi'iyedi heuheu min lolo onne, 4 la dara wukuwedi waku namwali panaur. Lolo onne ai na'uli nasa'a Makromod wali'ur.5 Lot, man lernohi Abram onne, ri orkanaru haenihi. Nin ri man howok noro ha mormori nammori, penia 6 nohorai hir hoholi onne kan nokor leke woro'ohe holi wewerre. 7 Enpenia Abram nina man huri roro Lot nin man huri enihe rasesesi mamani. (Lere onne manina Kana'an roro manin Feris holiholi lolo onne makun haenihi.)
8 Enime'ede Abram ne'el Lot na'ahenia, “Ik eniyenihe ka'umo'oniwali, de kan wa'an ainu'u ri roro onum ri rasesi. 9 Ende wa'an rehi kahina'arala ono nohorai eni naphari de o raram nodi nili wali ewi? Lo'o om minle wali malanna, ya'u minle wali mariri. Maa lo'o o raram nodi minle wali mariri, ya'u minle wali malanna.” 10 Enine Lot po'on wali-wali, la an po'on kauhe Yordan rakan kota Zoar nin oir nammori. Kauhu onne po'on molmolle Makromod Nin kirne Eden me naise noho Mesir lolo oir wauwau Nil eni. (Lere li'ur mene Makromod nano'onyaka Sodom noro Gomora). 11 Kame'ede Lot nili kauhu lap Yordan na'akeme, de noro yain rahina'ar. Lot nala'a laa wali kimur, 12 la Abram namkene min noho Kana'an. Lot namkene min lolo kauhu lap onne nin kota-kota leken la na'ariri nina heuheu na'urani Sodom. 13 Ri man holi kota Sodom onne, ri man ailanna mamani la hi'i dohohala nammori lolo Makromod kalarna.
14 Lot nala'edi ne, Makromod na'aheni Abram, “Nano onno mamririri eniyeni, po'onnala laa wali-wali! 15 Nohorai man om dodo'on onnenihe na'akeme, na'amoli Ya ala ki o moro upum anumhe manarne laa ewi-ewi. 16 Na'amoli Ya ala upum anumhe riwriwan rahrahu molmolle elimo'o hapue ki o, de ri mahaku kan akinalahe. 17 Mala'a po'on noho eni paharin noro narunne na'akeme, ono nohorai onne na'akeme Ya ale ki o me'e.”
18 Onne horu Abram noro nin ri na'akeme rei laa onno man wakurani au'onno lalap woro'o wokelu ma aile Mamre, wakuranrani Hebron. Hi ramkene lolo onne, la Abram na'ariri panaur nodi hoikani Makromod.