Abram paku Lot na'ara
14
Lere onne rai wo'akka nano hair-hair lalapa lawuku wakunu hi'i ara. Hi onnenihe: Amrafel nano kota Babilonia (Sinear), Ariok nano kota Elasar, Kedorlaomer nano kota Elam, noro Tideal nano kota Goyim. 2 Lere onne rai wolima nano kota-kota namehin lawuku haenihi. Onnenihe, Bera nano kota Sodom, Birsya nano kota Gomora, Syinab nano kota Adma, Semeber nano kota Zeboim, la rai nano kota Bela (man wekel kota Zoar haenihi). Rai wo'akka ma nano hair lalap enihe roro rai wolima namehin enihe mai ra'ara. 3 Rai wolima onnenihe roro rira ke'urauk enihe lawuku minle kauhu Sidim, (ors eni wekel ra'ahenia, Kahi Maki). 4 Ara onne lirna hi'i heheni: Nonolu eni rai wolima onne derne rakani rai Kedorlaomer anna idaweli woro'o raramne, maa rakan anna idaweli wokelu eni, rai wolimenihe ra'okuledi nin molollo. 5-6 Rakan anna ida wali'ur, rai Kedorlaomer noro nina rai wali wokelu onne roro rira ma nasala ke'urauk enihe, hi na'akeme mai rehi ara roro ri Refaim manin kota Asyterot-Karnaim, ri Zuzim manin kota Ham, ri Emim manin kota Syawe Kiryataim, la ri Hori man min lolo wo'or Seir rakanle noho mamun ma napro'uk El Paran arkanne. 7 Horu ne, hir wali wali'ur laa En Mispat (ors eni wekel Kades) rano'onyakedi ri Amalek rira kote noro idewe ri Amori man min lolo Haseson Tamar.8-9 Mai ne, rai wolima ma nano Sodom, Gomora, Adma, Zeboim noro Bela (Zoar) enihe ra'akene rira ma nasala ke'urauk lolo kauhe Sidim laa roro rai wo'akka ra'ara. Rai wo'akka onnenihe: Kedorlaomer nano Elam, Tideal nano Goim, Amrafel nano Babilonia (Sinear), la Ariok nano Elasar. Ende rai wolima roro rai wo'akka pakromo, maa wolimenihe kar rehi ara de lari me'e. 10 Kauhu onneni oir makan tere nammori. Rai wo'akka onnenihe rehiyedi rai ma nano Sodom noro Gomora noro rir ke'urauk, de hir lari me'e. Hir lari ne, heruwali rediyalle oir makan tere onnenihe raram, la namehin enihe lari laa wo'or. 11 Rai wo'akka man rehi ara eni, rahoro rareiyedi Sodom noro Gomora rira ha wo'ira na'akeme noro hanana'an haenihi, rodi rala'a me'e. 12 Lot, Abram aniyeneni, holi minle Sodom, de arwali enihe kele ai noro nin ri, la rahoro nin kanaru na'akeme.
13 Enimaa arwali kar do'on Lot nin ri ida ono nahaledi kemen, de an lari lan kukunohi Abram, ri Ibrani onne, ha wo'ire ma namwali noro Lot. Lere onne Abram nin miminlole na'uranrani au'onno lalap ida man ri Amori ida ma naran Mamre manarne. Mamre noro walinhe woro'o, Eskol noro Aner, hi onnenihe Abram nin muku. 14 Abram derne nahenia arwali keledi aniyene Lot me'e ne, an ra'ukwuku nin ri ma nauroin ra'ara, ri rahu wokelu idaweli wo'aa la na'akeme mori lolo nin nakar. Hir lari laa ranoin rai wo'akka onnenihe, la rakan kota Dan mene pakromo. 15 A'alam onne me'ede, Abram ha'ar nin ri ramwali muku ida woro'o leke ra'ara lolo waliwali. Hir rehiyedi arwali eni, de rohi hi hehenanumene rakan Hoba kota Damsyik wali ra'i. 16 Abram noro nin ke'urauk rahoro wali'uredi hahaa man arwali nahohoro eni na'akeme. Ai nala Lot noro nina kanaru eni, noro maeke, roro ri namehin enihe nodi wali wali'ur.
Melkisedek namre'e namharu Abram
17 An rehiyedi ara noro rai Kedorlaomer noro nina muku enihe, Abram waliyedi laa nin miminlole. Enime'ede rai Sodom laa nala nin hiyene aroro ai lolo kauhu Sawe, (man rin wekel ‘kauhe Rai’ haenihi.) 18 Lere onne, Melkisedek ma namwali rai kota Salema nodi roti noro anggur mai nalle Abram. Melkisedek namwali imam man hoikani Makromod Lalap Man Kulu Narehi Lap Narehi. 19 Ai namre'e namharu Abram na'ahenia,
“Makromod Lalap Man Kulu Narehi Lap Narehi ma nakuku noho ma naleu a'am namre'e namharu Abram.
20 Ma'uli masa'a Makromod Lalap Man Kulu Narehi Lap Narehi, man paku o penia rehiyedi onum arwali me'e.”
Onne horu Abram ha'ar nin hahaa nahohoro nano arwali eni nala persen idaweli Melkisedek.
21 Enime'ede rai Sodom na'aheni Abram, “Hahaa man pape nahoredi nano ainu'u arwali enihe, na'amoli pape nine, maa ya apanak pape mala wali'ur ainu'u ri mormori enihe maya'u.”
22 Maa Abram walhe, “Ya ahopo lolo Makromod kalarna, Makromod Lalap Man Kulu Narehi Man Lap Narehi, la ma nakuku noho la ma naleu a'am, 23 ya'u ka odi haida nano onum hahaa enihe, auha lihir ida me sandal kali ida me ha namehin ida, maa ya ala wali'ur na'akeme ki o. Ya'u hi'i heheni leke yon o ma'aheni, ‘Ya'u penia hi'i Abram namwali orkanaru.’ 24 Ka apanak haida-haida nano o, naukara hanana'an man ainu'u ri ra'anedi me'e, maa ya apanak pape nala ainu'u muku enihe, Aner, Eskol noro Mamre, hirira hana'ar.”