Makromod hi'i nou ma namkene noro Abram
15
Mai wali'ur Makromod mehe harile Abram. Ai na'aheni, “Abram! Yono mamka'uk! Ya'u ahaledi o nano ha yakyake, la Ya ala wawa'an rara'e nammori ki o.”2-3 Maa Abram na'aheni, “Eih! Makrom'u Ma Nodi Molollo Ha Wo'ira Na'akeme, alhi'ihepenia Makromod nala wawa'an rara'e nammori maya'u, maa ka mala tatana maya'u? Ende orekiha lo'o inhoi man manarna ainu'u pusake? Ainu'u man howok lolo nakar Eliezer man yo odi nano Damsyik, ai pe lo'o manarne. Ende wawa'an rara'e nammori man Makromod nala maya'u lo'o kan min haida.”
4 Mai Abram derne Makromod na'aheni wali'ur, “Lo'o ka! Onum man howok lolo nakar kan manarna onuma pusake, maa o anum mo'oni mememen.” 5 Enime'ede Makromod nodi Abram laa paharne la na'aheni, “Po'onala a'ame! Ken aki kaliyoro rahu eni! Lo'o om paeku akinale, ka?” Onne horu Ai na'aheni wali'ur, “Na'amoli o upun anumhe nammori naise kaliyoro rahu eni!”
6 Abram namkene akin naili'il Makromod Nin nou, de Makromod na'aheni Abram onne ri man akin moumou la namdudu.
7 Mai Makromod na'aheni wali'ur, “Ya'u eni, o Makrommu ma nodi nala o mamhara nano onuma lekloi Ur-Kasdim, lekpananne Ya ala nohorai eni o manarne.”
8 Maa Abram na'ukani, “Makrom'u Ma Nodi Molollo Ha Wo'ira Na'akeme! Mala inhawa tanade leke ya auroin nahenia nohorai eni ya'u manarne?”
9 An walha na'ahenia, “Mala sapi iri ida, pipi ketawa iri ida, noro pipduma dalu ida modi Maya'u. Nili na'akeme man anna wokelu mamani, la mala orpopo'o kem ida noro merpati kem ida haenihi.”
10 Ende Abram nala ha mormori onnenihe mai Makromod. Sapi, pipi ketawa noro pipduma onne an haruk namwali woro'o la hanarukne onne kakar loile elimo'o, ida ma nakpaliyedi ida (kanakarne woro'o), maa manu liwliwar onne kar haruka'ahe. 11 Manu liwliwar ma nadedem na'an mahin enihe mai kaile, maa Abram nohiyedi. 12 Lere na'ikeki helem Abram namkuru mahal wake'e. Namlilinnohi noho momohon wake'e pupinale me'e, de namka'uk rehi.
13 Makromod nou ai na'ahenia, “Horhoroke! Upmu anumhe lo'o ramwali do'on awan lolo nohorai namehin. Hi lo'o ramwali hophopon wahwahan lolo enne, la lo'o kerne dalhe hi anna rahu wo'akka raramne. 14 Enimaa Ya'u hukum nohorai man hi'i upmu anum ramwali hophopon wahwahan onne, la Ya'u hi'i upmu anumhe ramhara enne wali mai eni rodi kanaru nammori, 15 maa eniyeni ka namwali num lere. Om mori nalo'ol noro wawa'ane mene om maki la rawilo'o o. 16 Rakan ku rew'akka horu nanumene upmu anumhe wali mai eni. Ors eni, ri Amori man min mai eni kar ailanna wake'e makun. Na'amoli upmu anumhe wali mai mene Ya'u nair hi hukum Amori enihe ono lere onne rir ailanna nammori rehi.”
17 Lere helem la na'umetekedi Abram namlilinnohi do'on rane man mahu-mahu ida noro hulu man mormori ida lewen lolo mahin honoi kanani leken. 18 Eni nanumene Makromod hi'i nou ma namkene noro Abram na'ahenia, “Ya ala nou ki o, ‘Ya ala nohorai eniyenia upmu anumhe, nano oir wauwau Mesira rakan oir wauwau Efrat.’ 19 Ors eni ri man minle nohorai eni raram onnenihe: ri Keni, Kenas, Kadmon, 20-21 Het, Peris, Refaim, Amori, Kana'an, Girgasi, la Yebus.”