Hagar noro Ismael
16
Sarai, Abram hono, kan lernala tatana makun, maa nina hophopon wahwahan maekrara ida nano Mesir aile ma naran Hagar. 2 Ende Sarai na'aheni Abram, “Pape! Makromod lo'o kan hi'i ya'u moriyana me'e, de wa'an rehi o moro ainu'u hophopon wahwahan mamkuru wuku, lekpananne moriyana nala maya'u.”Abram nodi nohi Sarai nina panaeku. 3 Enpenia Sarai nala Hagar kanile Abram namwali hono karuri. Lere onne Abram minedi Kana'an anna idaweli me'e. 4 Abram noro Hagar ramkuru wuku la maeke onne nornoro raramne me'e, maa lere Hagar nauroin kuku nahenia ai nornoro raramne me'e, an po'on lewen Sarai.
5 Enpenia Sarai ne'el Abram na'ahenia, “Ya aledi ainu'u hophopon wahwahan Hagar ki o. Lere ai nauroin nahenia apunedi me'e an holi kukulu lalapa maya'u. Onne na'akeme onum sale. Na'amoli Makromod man ho'ok kail hi'i kenekrohu iknik panaeku eni.”
6 Abram walha, “Wa'ane! Hi'i heheni! O mamwali ya'u hono anulu, maa ai onne ya'u hono karuri, de modi molollo ai kemen. Ende o raram nodi hi'i hehewie, hi'i ke'e.”
Enpenia Sarai kerne dalha rehi Hagar, de Hagar lariyedi. 7 An lari rakan oir makan ida man aile lolo kalle man laa Sur. Lolo onne noho poro'uk, dosle mamani. Min lolo onne Makromod Nina hophopon a'am raram mai 8 na'aheni, “Hagar, Sarai nina hophopon wahwahan, o mano ewi la mala'a ewi me'e?”
9 Hagar walha na'ahenia, “Ya'u lari nano makrom'u, Sarai.”
Hophopon onne na'aheni, “Wali wali'ur lam ilitolle ai. Lere an kerne dalha, om derne makani mehe. 10 Na'amoli Ya'u lo'o hi'i upmu anum nammori la ri kan akinalahe.”
11 Makromod Nin hophopon a'am raram na'aheni wali'ur, “Mormoro o raramne me'e, la ka nalo'ol om mori mo'oniyanida. Om waki naran Ismaela ono Makromod dernedi onuma naherhere me'e. 12 Maa o anum onne lo'o minle ko'u nano lodon walinhe ono nina morimori naise keledei merwui ma kan derne ri nin hophopon. Ai lo'o nakpali ri na'akeme la ri na'akeme rakpali ai. Namlolo, ai kan holi wawa'an noro mo'onwalinhe.”
13 An derne nou onne horu, Hagar na'ukani akin, “Namlolo, ee ka! Ya'u do'onedi Makromod Lalap man ilitolle maya'u me'e?” Nano lere onne an wekel Makromod ma naledi wanakunu ai na'ahenia, “Makromod man ilitolle maya'u.” 14 Onne penia rin waki oir makan onne Beer Lahai Roi napa'ahne, ‘Oir makan nano Makromod Lalap man mori, man ilitolle maya'u.’ Oir makan onne aile leke Kades noro leke Beret leken makun.