Sunate namwali tanada nahenia Makromod hi'i nou ma namkene ida noro Abram
17
Lere Abram nina anna welihii wohii, Makromod nalhari kemen ai na'aheni, “Ya'u penia Makromod Lalap Ma Nodi Molollo Narehi Nalewen Na'akeme. Derne makani wawa'an Maya'u la lernohi Ainu'u honorok aki mamani. 2 Ya'u hi'i nou ma namkene noro o, la Ya ala upmu anumhe rariwan rarahu.”3 Enime'ede Abram nahinonowedi Makromod Lalap kalarna, la Makromod Lalap na'aheni, 4-5 “Eni Ainu'u nou ma namkene noro ki o: Orekiha o mamwali op a'a hair nammori. Onne penia Ka apolu o Abram me'e, maa Ya apolu o Abraham.a 6 Ya'u hi'i o upmu anum moriyana dariyana rariwan rarahu rakan ramwali hair-hair nammori, la nano hi onnenihe heruwali ramwali rai. 7-8 Ya'u hala Ainu'u weneke ki o moro upmu anumhe namkene manaku nano lere eni rakan laa ewi-ewi. Ende nano ku eniyeni rakan ku man mai, Ya'u eni amwali o moro upmu anumhe Makromon mamani. Nohorai Kana'an eni na'akeme, Ya ala ki o moro upmu anumhe. Lere eni o mamwali peina'a mehe, maa lere man mai upmu anumhe manarne noho Kana'an eni rakan laa ewi-ewi.”
9 Makromod Lalap nou wali'ur Abraham na'aheni, “Maa Ya ala yodi ida ki mi leke yon hamlinu Ainu'u nou ma namkene laa ewi-ewi eni. 10-11 Ya'u nou o moro upmu anumhe sunat minim mo'oniyana na'akeme leke namwali tanada harhari nahenia mim lernohi Ainu'u nou ma namkeneni. 12-13 Nano ku eniyeni rakan ku man mai, lam sunat mo'oniyana na'akeme ma nin lere alam wo'aa. Onum mo'oniyana mememen noro onuma hophopon wahwahan man mori lolo nakar romleher noro man weli lolo paharne na'akeme modi lam sunat. Hi'i sunat eni leke na'ori honorok mi nahenia Ainu'u nou eni namkene manaku laa ewi-ewi. 14 Mo'oni ma kan sunat, an larlewenedi Ainu'u nou ma namkeneni, de ai nahina'aredi nano lodon walinhe.”
15 Makromod Lalap na'aheni Abraham wali'ur, “Yono mapolu houm Sarai me'e, maa mapolu ai, Sara. 16 Ya amre'e amharu ai nammori, de an moriyana tatana mo'oniyanida nala ki o. Namlolo kokkoo lere man mai Sara namwali hair nammori rir in-leher, la nano upun ananhe Ya'u kikan ri nammori ma namwali rai.”
17 Enime'ede Abraham nahirawa yawa elimo'o, maa lolo akin nalaulau na'ahenia, “Ya a'ileher me'e, ainu'u anna na'akeki rahu ida me'e. Hi'ihehewi ya a'ori an'a? Sara nina anna welihii me'e. Hi'ihehewi an moriyana makun? Lo'o ka namwali!” 18 Enpenia Abraham na'aheni, “Makrom'u, wa'an rehi Ismael me'e de kokala Num rere'e haharu eni.”
19 Maa Makromod Lalap na'aheni, “Onne Ainu'u panaeku, ka! Na'amoli o houm Sara lo'o mori tatana mo'oniyana, de waki ai naran Isak! (Naran Isak napa'ahne, ‘nalaulau’.) Ainu'u nou ma namkene manaku eni Ya ala ai noro ai upun ananhe laa ewi-ewi.
20 Enla Ismael onne? Ya'u dernedi numa napanpanak Ismael me'e, de Ya amre'e Ya amharu ai haenihi, la Ya ala upun ananhe nammori haenihi. Na'amoli ai na'ori anan idaweli woro'o ma namwali uluwakun luhu mamani. Na'amoli nano upun anan namwali hair lapa ida man lewlewen. 21 Maa Ainu'u nou ma namkene manaku eni Ya'u du'ul kali noro anum Isak. Anna kalari, lo'o lere alam ma naisa eniyeni, Sara moriyana me'e.” 22 Wakunu horu, Makromod Lalap hoikaruwedi Abraham.
23 Lere onne me'ede Abraham derne nakani Makromod Lalap Nin nou, de lan sunat ananne Ismael noro nin hophopon wahwahan na'akeme, mo'oni man mori lolo romleher noro idewe hophopon wahwahan weliweli na'akeme. 24 Lere an sunat onne Abraham nina anna welihii wohii, 25 la anan Ismael nina anna idaweli wokelu. 26-27 Lere onne Abraham noro Ismael noro hophopon wahwahan mo'oni na'akeme sunat wewerre.