Makromod lernohi Nin nou nala tatana mo'oni ida Abraham
18
Ler ida Makromod mai nalhari kemen wali'ur Abraham. An mai ne, lere manmanha wake'e de Abraham naikokorle nina heuheu nike makan wakurani au'onno lapa ma aile Mamre onne. 2 An do'on ri wokelu ramriri kan ko'uwala ai kalarna. Abraham nahumarna namriri, lari laa nala hiyene aroro hi. Rakanedi ne, ai nahirawa hi kalarna, la 3 lariyala na'aheni, “Makrom'uhe! Yono pape larlewenedi ainu'u heuheu eni, maa mai lolala nanu ke'e. 4 Mai Makrom'uhe warnala tarana lolo au eni kakan mene ya'u hopon ainu'u ri nala oir rodi wuriyedi paphe ein. 5 Ya ahinoi amkauwala hanana'an popono orereki leke paphe lernala ruri rodi rala'a ho'o. Papa lernohi ainu'u napanak de loledi ainu'u heuheu me'e.”Hir walhale, “Trimkasi num wawa'an eni. Lo'o am lole.”
6 Me'e'eni me'ede Abraham nala'a heuheu raram ne'el Sara na'ahenia, “Halhala mala tapono kaduk wokelu man wawa'ane de hi'i roti pupu'un.” 7 Horu ne, an lari laa nina hunuri wana'an man min lolo onneni nili sapiyana poipoir ida nodi laa nale nina man lolo honopon enihe hopon ra'akene leke ra'ane. 8 Onne horu, Abraham nala huhu, noro huhu ma na'iwaku, noro mahin rapalpali onne nodi nahinoi namkauwala nina peina'a onnenihe. Maha rara'akne, Abraham mehe namriri au kakan ilitolle hi.
9 Mai ne hi ra'ukani, “O houm Sara ai ewi?”
An walhe, “Aile heuheu raram.”
10 Peina'ida na'aheni, “Anna man mai eni, i wali wali'ur mai eni. Lere onne o houm moriyanedi tatana mo'oniyanida me'e.”
Sara mahan nakakani aile heuheu nin nika wali. 11 Abraham noro Sara ra'ileher wake'edi me'e. Hi rauroin nahenia lo'o Sara kan lernala nina wollo me'e. 12 Enpenia Sara nalau lolo akin na'aheni, “Ya a'ileher amlauwedi me'e. Ma'ananahedi ya akin ni'ik yo oro i hou'u amkuru wuku? I hou'u na'ileher wake'edi me'e haenihi.”
13 Horu Makromod na'ukani Abraham, “Hi'ihepenia Sara nalau la na'aheni, ‘Ya a'ileheredi me'e, de hi'ihewi ya'u moriyana tatane?’ 14 Ya'u eni, Makromod! Yo odi molollo hi'i ha rahu na'akeme! Horhorok! Naise idedi ya aheheni eni, anna man mai eni Ya'u lo'o wali mai eni. Lere onne Sara moriyanedi tatana mo'oni ida me'e.”
15 Sara namka'uk de na'aheni, “Ya'u ka alau.”
Maa Makromod na'aheni, “Idedi o malau menee.”
Abraham napanak rala ampun kota Sodom
16 Onne horu peina'a wokelu onnenihe ramriri ramhara lolo onne laa kota Sodom. Abraham norkaruhe rakan onno kukulu ida. Lolo onne po'on werwerhedi kota Sodom. 17 Makromod noro akin wakunu na'aheni, “Lo'o kan wa'an Ya'u suwarala ha man lo'o Ya'u hihi'i eni nano Abraham. 18 Orekiha upun ananhe ramwali hair lapida ma nodi molollo narehi, la lolo ai eni, Ya amre'e Ya amharu hair rahu lolo noho wawan na'akeme. 19 Ya'u niliyedi ai nodi molollo upun ananhe, leke hir derne rakani Maya'u, la hi'i ha wawa'an noro ha ma namlolo. Lo'o hir hi'i heheni, Ya'u hi'i Ainu'u nou ma namkene manaku noro Abraham namwali.”
20 Enime'ede Makromod konohi Abraham na'ahenia, “Ya'u dernedi kalaklaka nammori ma na'aheni manin kota Sodom noro Gomoreni rira dohohale werek rehi. 21 Ende Ya'u mehe kopur laa enne koklolo ke'ede kalaklaka Ya'u dederne namlolo, ee ka!”
22 Makromod wakunkunu noro Abraham makun ne, peina'a woro'o namehin onne rahina'ar rala'a laa Sodom. 23 Abraham hoi na'urani Makromod na'ukani, “Hi'ihehewi? Namlolo kokkoo Makrom'u lo'o na'awoir ri ma kan sale noro ri man saleni? 24 Lo'o ri wellima aile ma kan hi'i sala lolo kota onneni, hi'ihehewie? Makrom'u Num panaeku mesne mouwedi kote raramne na'akeme? Yono! Lo'o Makrom'u nala ampun lekpananne ri wellima onnenihe mori, ee ka? 25 Enleke yono ri ma kan hi'i sala resne roro man hi'i sale wewerre. Yono Makromod Lalap hi'i heheni! Yon hi'i ri ma namlolo hukum wewerre noro ri man sale. Makrom'u penia ma nasala kaikaile a'am lehern, de Makrom'u nauroinedi hono'ok kanail onne ka namlolo.”
26 Makromod na'aheni, “Yono hi'i nahenia Ya'u lernala ri wellima ma kan hi'i sala lolo kota Sodom, Ya ala ampun kota onne na'akeme, leke yon hir maki.”
27 Abraham na'aheni wali'ur, “Ya apanak ampun ono ya'u haul ainu'u wanakunu eni taran ikar. Ya'u eni ri mormori, ya a'alehe molollo wakunu haida, 28 maa yono hi'i nahenia ri weli'akka wolima man wa'an, hi'ihehewi? Lo'o kopur ri wolima mehe, Makrom'u laa na'awoiredi kota onne, ka?”
Makromod na'aheni, “Lo'o Ya'u do'on ri weli'akka wolima ma kan hi'i sale, Ka a'awoir kota onne.”
29 Abraham na'ahenia wali'ur, “Lo'o Makrom'u do'on ri weli'akka mehe, hi'ihewi?”
An walhale, “Lo'o Ya'u do'on weli'akka, Ka a'awoir kota onne.”
30 Abraham nori Ai mamani na'ahenia, “Makrom'u yono ma'ahan ya'u! Yono hi'i na'ahenia ri welikelu mehe, hi'ihewi?”
An walha wali'ur na'ahenia, “Yono hi'i Ya'u do'on ri welikelu, Ainu'u panaeku lo'o kan yadi.”
31 Abraham na'aheni, “Makrom'u, mala ampun maya'u wali'ur, ya a'ukani taran ikar. Yono hi'i ri werro'o aile, hi'ihewi?”
An walhe, “Yono hi'i Ya'u do'on ri werro'o, Ka a'awoir kota onne!”
32 Mai wali'ur Abraham konsedi nin wanakunu na'aheni, “Makrom'u, lo'o ya'u wakunu raram mehe me'e, de yono ma'ahan maya'u. Yono hi'i ri idaweli mehe man wa'an, hi'ihewi?”