Manin Sodom rira dohohala
19
Makromod Nina hophopon woro'o enihe roro Abraham rahina'aredi ne, hi rala'a laa Sodom. Rakan enne lere helem me'e. Lere onne Lot naikokoro aile kote nina nike lape makan. An do'onedi hi, namriri leke nala hiyene arore hi. An rawa la yawa lariyalahe na'aheni, 2 “Pap mie! Lolala ainu'u nakar nanu leke wuriyedi paphe ein, la mamkuruwala ainu'u nakar. Na'amoli oreki nohoropo mene mala'a wali'ur.”Hi ra'aheni, “Trimkasi! Maa yom hi'i warna-warna me'e. Na'amoli ai mamkuru mai pasar eni me'e.” 3 Lot norikama hi hehenanumene hi re'e de roro Lot laa nina nakar. Lot na'akene hanana'an wawa'an, kunu roti ma na'alehe ragi nanumene hi ra'an. 4 Maa peina'a onnenihe ka ramkuru makun, manin Sodom onne, mo'oni leleher roro ma na'ikakenihe mai olokedi Lot nin nakar onne. 5 Hir kaisedi Lot ra'ahenia, “Peina'a man mai ramkuru numa nakar ai ewi? Huri mai leke ai ma'aromalahe.”
6 Lot laa paharne, elekedi nike horu, 7 mene ai na'aheni kote raram enihe, “I wal'u na'ahoruwedi ya apanak ampun lapa heheni! Yono hi'i danawar onne noro ainu'u peina'a enihe. 8 Makaniyala! Ya an'u maekrara woro'o aile! Ya ala woro'ohe ki mi leke more hi'i inhawa-inhawa lernohi minim suk aimehi, horo nahenia yono hi'i haida-haida ainu'u peina'a enihe ono ainu'u yodiwara adiyaka hi wawa'an.”
9 Manin Sodom enihe wakau ra'aheni, “Mala'a here, do'on awan o! O ka modi molollo mayai! Mala'a here, kalo'o am hi'i dawar o narehi ri woro'o onne.” Horu, hir ken rokul Lot laedi herne leke raiye'er nike laa raram, 10 maa peina'a woro'o enihe roulle Lot sedu maiyedi romleher mene konsedi nike. 11 Hi ra'atokedi ri manina paharn enihe na'akeme makan, de kar do'on nike me'e.
Lot noro nakar raram lari nano Sodom
12-13 Horu ne, hophopon a'am raram woro'o onne ra'aheni, “Lot! Makromod derne nauroinedi koteni nin mormorso mermeru diniwar danawar me'e, de An hopon am mai leke ma'awoiredi kote enie! Ende yon hi'i nahenia o anum mo'oni maeke me panum, me wallum namehin aile makun, laa male moro mamharedi kota eni here!”
14 Me'e'eni me'ede Lot lan konohi anan maeke rir mo'oni enihe na'ahenia, “Pa'a mie! Halhala mamharedi lolo eni ono Makromod lo'o na'awoir koteni me'e.” Maa mo'oni woro'o enihe pene'ek nahenia Lot sokala me'e de kar peinohi.
15 Rakan orereki al'alam wake'e hophopon a'am raram onnenihe rakerne Lot noro nin nakar raram halhala ramhara kota eni here! Hi ra'aheni, “Lot! Mamaka here! Pelek modi o houm anum maeke woro'o enihe lari mamharedi kota eni here! Alka lo'o o moro koteni mayo'o wewerre.”
16 Enimaa Lot mahan hi'i karkaram makun, de hophopon a'am raram enihe rouwalle ai noro hono liman noro anan maekana woro'o enihe sedu laedi onnida ma namlina namkai lolo kota paharne, ono Makromod Nin panaeku nahala hi nano hunukum eni.
17 Rakan enne, hophopon woro'o onne hopon ra'aheni, “Halhala lariyedi leke yon maki wewerre noro koteni raram! Yom po'on laa kili'ur, maa lari laa wo'or enne leke yono mim maki.”
18 Maa Lot walha hi na'aheni, “Papee! Yon hopon am lari laa wo'or onne! 19 Makrom'u akin wa'an maya'u penia ma'oriyedi i hamaran me'e, maa wo'or onne ko'u rehi! Yon hi'i de ka'u rakan wo'or onne makun, hunukum onne naledi maya'u me'e. 20 Paphe po'onnala nanu! Leke tutusiyana aile kalari enne, kan ko'uwala. Ende lo'o mi raram nodi, huri mayai laa enne leke yon am maki.”
21 An walhe na'ahenia, “Wa'ane! Laa here! Na'amoli ka a'awoir leke tutusiyana onne, 22 maa pelek laa enne ono ka'u huri hi'i haida hehenanumene om rakan enne.” Nano lere onne me'ede, rin waki leke onne naran Zoar (napa'ahne, ‘leke tutusiyane’).
Kote Sodom noro Gomora aiye na'an horu
23 Lere haha'a eni ne, Lot rakan leke Zoar onne. 24 Enime'ede Makromod nalkopur okon lali noro aiye nano a'am mai Sodom noro Gomora. 25 Makromod na'awoiredi kota-kota noro leke namehin man minle kauhu onne noro idewe ha man mormori na'akeme lolo onne: ri mormori, ha mormori, noro au or'oriyana na'akeme.
26 Enine Lot hono mahan lari lernohie, maa an po'on laa kili'ur, idewe namwaliyedi asir waku.
27 Al'alam onneni Abraham namaka, nala'a peleklek laa namriri onno man oirawi noro Makromod ramririri onne. 28 An po'on laa yawa lolo kauhu wali Sodom noro Gomora. Ai mahu nam'aw'awal molmolle noho ha'aha'e puppupin kote onnenihe, naise ai mahu namhara nano aiye ma na'an kirna lapa ida.
29 Ende lere Makromod Lalap hukum kota woro'o onne, An kokala Abraham nina napanak de nahaledi Lot nano kote haharna onnenihe.
Lot noro anan maeke woro'o enihe
30 Lere onne Lot namka'uk minle leke Zoar de ai noro anan maeke woro'o enihe wakiha'a laa wo'or holi ku'il ida raram.
31 Ler ida anan maeke anulu ne'el walla karuri, “Iknika ame na'ileleher me'e. Hi'ihehewi ik ho lernohi noho honolla ono mo'oni mai eni kaale, de lo'o ik kak lernala tatana me'e. 32 Ende wa'an rehi ik hi'i iknika ame manha la kore kamkuru wuku leke lernala tatana.”
33 A'alam onne hi rala arak aman nomun de an manha wake'e. Anan maeke anulu noro namkuru wuku, maa aman manha wake'e de ka nauroin inhawe ma namwali a'alam onne.
34 Rakan nohoropo maeke anulu na'aheni walla karuri, “Alam eni, yo oro iknika ame amkuru wukuwedi me'e, de lere helem ik hi'i manha wali'ur, la o moro mamkuru wuku leke ikroko lernala tatana wewerre.” 35 Ende lere helem hir hi'i aman manha la anan maeke karuri nore namkuru wuku. Lot manha wake'e de ka nauroin inhawe an hi'iyedi noro anan maeke karuri eni.