Abraham noro Abimelek
20
Onne horu, Abraham namhara nano Mamre nala'a laa noho Kana'an wali karanna, la na'ariri rir heuheu lolo leke Gerar man aile Kades noro Syur leken. 2 An kukunohi ri manin lolo onne nahenia hono Sara onne, ai narna. Eni penia Abimelek, rai Gerar onne, hopon nina hophopon laa napanak nala Sara. Ende an laa nale nodi laa rai nin nakar. 3 A'alam ida nine, Makromod Lalap nalhari kemen lolo rai onne nina namarmi na'aheni, “Om maki me'e ono maledi ri nin maekleher me'e.”4 Maa Abimelek kan tukulle Sara makun de ai na'aheni Makromod Lalap, “Makrom'u! Yo oro ainu'u hair kam hi'i salida. Lo'o Makrom'u nesne mayai? 5 Abraham mehen konohi ya'u maeke onne ai narna. Sara na'aheni onne haenihi. Enpenia ya'u hopon ri laa nale noro honorok aki moumou. Ende ya apanak yon Makrom'u nala sale maya'u.”
6 Enpenia Makromod Lalap walhe lolo namarmi onne na'ahenia, “Ya auroiroin om hi'i ha onne modi honorok moumou aki moumou. Eni penia Ya'u kawala o leke yono om hi'i dohohala, la Ya'u ka'u hurinohi om tukul maeke onne haenihi. 7 Ende mala wali'ur ai laa nin mo'onleher ono ai penia ma nodi Ya'u Lirna Wawan, la ai lo'o hi'i lir napanak ki o leke yono om maki. Horhorok! Lo'o ka male wali'ur laa hono, o moro numa ri mormori na'akeme lo'o maki.”
8 Rakan oreki al'alam Abimelek napolu nina man howok enihe na'akeme. An konohi hi ha ma namwali eni na'akeme, de ramka'uk mouwedi. 9 Onne horu Abimelek napolu Abraham mai. Maie ne, ai na'aheni, “Hi'ihepenia om hi'i heheni mayaie? Ainu'u inhawa sala ki o, penia om hi'i susa yo oro ainu'u haire? Kan wa'an om hi'i ha ma naise onne maya'u. 10 Om paeku inhawa penia om hi'i hehenie?”
11 Abraham walhe, “Ya auroin nahenia lo'o lolo eni ma namka'uk Makromod Lalap kaale, penia ya amka'uk ri ma namono i hou'u resna'u. 12 Lere ya a'aheni ai ma'unara, ya'u wakunu ha ma namlolo, ono mayai amida maa dodoho ina de ai ma'uturna. Lere li'ur ne, am ho. 13 Ende lere Makromod Lalap hopon ya'u amhara ainu'u ama nina nakar la laliwewer ri nina nohe, ya aheni i hou'u, ‘Yon hi'i maramyaka'u haromo ne, kukunohi ri nahenia ya'u eni o narum.’ ”
14 Onne horu ai nala Sara wali'ur laa Abraham noro idewe hophopon wahwahan mo'oni maeke, pipduma, noro sapi. 15 Horu, rai na'aheni Abraham, “Abraham! Ainu'u nohorai eni, ya'u huri o min lolo ewi-ewi menmolollo num raram nodie.” 16 Enla ai na'aheni Sara, “Ya aledi kupan pere riwan ida o narum leke namwali tanada heri kalarna nahenia ya'u ka'u hi'i salida noro o, la o kam hi'i salida haenihi.”
17-18 Lere rai nala Sara, Abraham hono, Makromod hi'iyedi maeke man minle rai nina romleher na'akeme kar moriyana me'e. Maa lere rai nala Sara wali'ur laa hono, Abraham hi'i lir napanak Makromod Lalap leke hi'i wa'anedi Abimelek hono noro nina hophopon wahwahan maeke na'akeme. Ende maeke onnenihe na'akeme moriyana wali'ur.