Mori Isak
21
Makromod namre'e namharu Sara lernohi Nin nou eni. 2 Lere Abraham na'ileheredi me'e, Sara apun de rakan lere Makromod Lalap wewekel eni, mori tatana mo'oniyanida. 3 Abraham waki naranne Isak.a4 Mai Isak nin alam wo'aa ne, Abraham nale, sunate lernohi Makromod Lalap Nin hohopon eni. 5 Lere momori Isak eni Abraham nin anna rahu ida.
6-7 Sara na'aheni, “Makromod Lalap hi'i ya alau ono i raramne nahuwa'anedi me'e. Ri nauroin nahenia ka'u lernala tatana ono ya a'ileheredi me'e menee. Kade i hou'u na'ileher wake'edi me'e, maa ya'u moriyana la aledi tatana ai me'e. Ende ors eni inhoi man derne panaeku eni lo'o ralau wewerre noro ya'u.”
Rohi Hagar noro Ismael ramhara nakar
8 Tatan onne eren lalapa la rakan na'irei huhu ne, Abraham hi'i yapi lalape.
9 Ler ida Sara po'on Abraham hono karuri Hagar ananne Ismael opetu nalnohib Isak. 10 An do'on ne akin apinha de ne'el hono, “Mohiyedi hophopon wahwahan maeke ma nano Mesir eni noro ananne! Yon huri ai ananne onne kokala haida-haida nano onum kanaru. Ya an'u Isak peni mehen kokale na'akeme.”
11 An derne nin wanakunu onne Abraham akin werek rehi ono Ismael ai anan haenihi. 12 Maa Makromod Lalap ne'el Abraham na'ahenia, “Abraham! Yon akim werek houm karuri onne noro ananne! Lernohi Sara nin panaeku mehe ono nano Isak peni o lo'o lernala upum anumhe man Ya'u nouwedi me'eni. 13 Maa Hagar anan onne, Ya amre'e amharu ono ai onne o anum mememen haenihi. Na'amoli ai upun anan ramwali hair lalapida.”
14 Rakan oreki Abraham nala oir loi sak ulik ida noro hanana'an namwali oir wa'aleher kalla wawan. Ai nala loile Hagar kawa'alne nanumene hopon nala'a. Horu hir laliwewer noho mamun ma naranne Bersyeba. 15 Lere oir rorodi onne horu, Hagar hoikaruwedi ananne au um'umu ida leherne. 16 Lolo akin na'aheni, “Ka'u kerhu po'on ya an'u maki.” Ende an laa naikoro koko'uwedi lo'o meter rahu ida nano tatane miminle. Naikoredi ne, ai nahere maheruheru.
17 Makromod Lalap derderne Ismael nin naherhere haenihi. Enla Nin hophopon a'am raram ida napolu nano a'am na'ahenia, “Hagar! Inhawa man hi'i o peni om suse? Yon mamka'uk, Makromod Lalap dernedi anum nin naherhere me'e. 18 Mamaka here! Laa ma'aruwedi o anum eni, ono Ya'u hi'i ai upun ananhe penia namwali hair lapida.”
19 Enime'ede Makromod Lalap na'amouwedi Hagar makan, de do'on oir makan ida. Kame'ede an laa nahur oir loile nin sak ulik nodi laa anan nomun.
20-21 Ismael noro nin mame ramkene holile noho poro'uk lolo Paran. Tatan onne eren lalapa nauroin nasala rama lewlewen. Inna Hagar nala maeke nano Mesir leke noro anan ho. Na'akeme onne namwali ono Makromod Lalap nodi nala Ismael.
Abraham hi'i dunu'ul kanali noro Abimelek
22 Lere onne rai Abimelek noro nin uluwakun ara Pikhol mai pakromo noro Abraham. Maie ne, rai na'aheni, “Abraham! Am do'on mauroinedi nahenia Makromod Lalap norle'ule'u norwaliwali o, ono ha wo'ira om hihi'ie, na'akeme namwali. 23 Enpenia ai mapanak pape kikan hopo Makromod Lalap kalarna ma'aheni orekiha kam koklira moro maya'u noro ya an'uhe ihin rarnhe. Kikan hopo ma na'aheni pape hi'i ha wawa'an yo oro ainu'u leke ruhun namnenehe naise ya'u hi'i wa'an pape lere holiholi ainu'u nohorai.”
24 Abraham ne'e na'aheni, “Wa'ane! Ya'u kikan hope.”
25 Maa onne horu, Abraham kalaka na'aheni, “Pap rai nin ri rahoredi ainu'u oir makan ida me'e.”
26 Abimelek na'aheni, “Hah! Ya'u ka auroin inhoi man hi'i ha onne. Kam konohi ya'u, menee. Eni nanumene ya'u derne panaeku eni.”
27 Ende woro'ohe hi'i dunu'ul kanali. Abraham nala pipduma ukun ida, noro sapi ukun ida nalle Abimelek. 28 Horu, Abraham heiredi pipduma waku wo'ikku, 29 la Abimelek na'ukani, “Hi'ihepe om hi'i ha onne?”
30 Abraham walhe, “Pap rai kokala pipduma waku wo'ikku eniyeni namwali tanada nahenia pape rai nauroinedi ya'u peni ma na'ir oir makan eni.” 31 Onne penia an waki onno onne naran Bersyeba napa'ahne, ‘oir makan kikikan hope’, ono woro'ohe kikan hopo lolo onne.