<<    <     Noho Nin Ma Namwali     22     >    >> 
Makromod Lalap ken Abraham leke nauroin ai akin naili'il Ai kokkoo, ee ka?
22
Mai lere li'ur Makromod Lalap ken Abraham leke nauroin an derne nakani Ai, ee ka? Makromod napolu, “Abraham!”
An walha, “Ya, Makrom'u!”
2 Makromod Lalap na'aheni, “O moro Isak, anum mahaku mararamyakeni, mala'a laa noho Moria. Laa enne, mala'a laa wo'or ida man Ya'u kukul ki o, mala o anum modi hi'i honoi kanani harharne Maya'u.”
3 Rakan oreki al'alam Abraham weke au rodi hi'i honoi kanani harharne lolo wo'or onne. Weke au horu, ai na'akene keledei nin pakpak ko'orn nanumene worro au onne rala loi keledei wawan. Horu ne, ai noro Isak noro nin hophopon woro'o ra'alono laa onno man Makromod Lalap kukukul eni. 4 Rala'a lere wokelu mene Abraham do'on onno onneni, maa ko'u makun. 5 Enime'ede ai na'aheni nin hophopon woro'o enihe na'ahenia, “Mim minedi noro keledei lolo eni. Yo oro ya an'u laa lolo enne hoikani Makromod Lalap mene am wali mai.”
6 Abraham nala au rodi harne honoi kanani loi Isak kawa'alle, la ai nasasala kuri noro ai wara rodi haharne. Hi ra'alonlono laa enne ne, 7 Isak na'ukani aman, “Pape!”
Abraham walha, “Inhawa pa'e?”
“Ik kodiyedi aiye noro au me'e, maa pipdumana rodi hohoi kakani ai ewie?”
8 An walha, “Pa'e, Makromod Lalap mehe na'akene pipdumana onne.”
Enime'ede woro'ohe rala'a mamani. 9 Hir rakanedi onno Makromod Lalap kononohi eni, Abraham lukur waku namwali panaur ida. Horu, nala au loi panaur wawan. Eni nanumene wuku anan nala loile au ma aile panaur wawan.
Abraham na'akene nesne anan Isak (NN. 22:9)
10 Onne horu ai nala kuri leke nesne ananne,11 maa Makromod Nin hophopon wakau nano a'am, “Abraham! Abraham!”
An walha, “Ya, Makrom'u!”
12 Lira onne na'aheni wali'ur, “Yom hi'i apipinha tatana onne! Yom hi'i haida-haida ai! Ya auroinedi o mamka'uk Maya'u me'e, ono ka mamhene mala o anum mahaku onne Maya'u.”
13 Enime'ede Abraham po'on waliwali an do'on pipduma dalu ida dudalle nahaihai aile au rokroko raram. Ai nala pipduma onne nodi hi'i honoi kanani Makromod Lalap. Pipduma onne nodi herre anan, harne namwali honoi kanani.
Pipduma dalu dudalle nahaihai aile au rokroko raram. (NN. 22:13)
14 Ende Abraham waki onno onne naran, ‘Makromod namkene nala inhawa ma kan nokor makun.’ Rakan lere eni ri na'aheni, “Lolo Makromod Nin wo'or wawan Ai namkene nala inhawa ma kan nokor makun.”
15 Makromod Nin hophopon a'am raram konohi Abraham wali'ur na'ahenia, 16 “Makromod mehe na'aheni, ‘O mamkene mala o anum mahaku Maya'u namwali honoi kanani de Yo odi Ya'u naran mehe kikan hopo nahenia 17 Ya amre'e amharu o penpenu kemkeme, la Ya'u hi'i o upum anumhe naisa kaliyoro riwriwan rahrahu man minle a'ame noro dosle ma aile herraram, la upum anumhe rehiyedi rir arwali enihe. 18 Enla lolo hi, noho wawan na'akeme lernala Ainu'u rere'e haharu, ono o peni lernohi Ainu'u honorok panaeku.’ ”
19 Onne horu, Abraham noro anan wali laa nin hophopon woro'o enihe mene ra'alono laa Bersyeba, la Abraham namkene lolo onne.
Nahor upun ananhe
20-23 Lere li'ur, Abraham derne nahenia mo'onwalla Nahor hono Milka moriyanedi tatana wo'aa me'e. Anan anulu naran Us, horu Bus, horu Kemuel (Aram aman). Ra'uwali wali'ur Kesed, Haso, Pildas, Yidlap, noro Betuel. Betuel onne Ribka aman. 24 Nahor hono ma namwali nin hophopon wahwahan naranne Reuma moriyana Teba, Gaham, Tahas, noro Maakha.