Sara maki la Abraham weli noho sidal ida hi'i nin makileke
23
1-2 Sara maki nin anna rahu werro'o wo'ikku. Lere onne, Abraham minle leke Kiryat-Arba (lere eni wekel Hebron) lolo nohorai Kana'an. Abraham sus mak oir mamani, ono hono nin makmaki eni.3 An kanhi hono horu, Abraham namriri hoikaruwedi maki kemen, la nala'a lan pakromo noro manin luhu Het na'aheni, 4 “Ya'u eni man mai nano noho namehin minle i wal'uhe rir leke raram. Ya apanak i weliyala noho sidal ida, leke ya'u karu i hou'u.”
5-6 Hir walha na'ahenia, “Eih! Pape ka namwali do'on awan mai eni me'e menee! Am horhawa Pape naise ainima man panulu ida, de Pape mehen nili onno man wa'an menmolollo num raram nodi aimehi. Mayai na'akeme ainim raram nodi ra'akene onno man wa'an rodi karu pape hono.”
7 Enime'ede Abraham namriri la nahirawa hi kalarna na'aheni, 8 “Yon hi'i i wal'uhe hurinohi ya'u karu i hou'u lolo eniyeni, ya apanak paphe rapanak Sohar anan Epron, 9 leke na'olu ku'il Makpela man minle nin kirne arkanne, ya'u weli. Ai napanak wella wo'ira, ya'u paire. Na'amoli welleni i paire penpenu kemkeme i wal'uhe kalarna leke ya'u hi'i noho sidal onne namwali ainim makileke onno.”
10 Ler onne Epron naikokoro wuku noro ri Het enihe, de an dederne Abraham nin wanakunu haenihi. Enine ai namriri lolo ri leleher onnenihe kalarna na'aheni, 11 “Makrom'u! Yon hi'i heheni. Ainu'u hair ne'en raram ramwali man mehe nodi makan do'on nahenia noho sidal onne noro nin ku'ile, ya alle ke'e de Makrom'u karu hono.”
12 Enime'ede Abraham nahirawa ri Het enihe kalarna wali'ur. 13 An walha Epron na'ahenia, “Wa'ane! Maa, makaniyala tarana! Ya'u raram nodi ya'u weli noho sidal onne noro idewe nin ku'il leke ya'u karu i hou'u lolo onne.”
14-15 Epron walha na'ahenia, “Wa'ane! Maa noho sidal onne nin wella kupan pere rahu wo'akka mehe. Wella onne kan min haida, aile ikroko mehe. Makrom'u lam karu houm lolo onne ke'e!”
16 Enime'ede Abraham ne'enohi pair noho wella onneni, de an aki kupan pere lawan molmolle Epron wewekelle lolo ri Het enihe kalarne. Aki horu, na'akeme do'odo'on an pair noho wella onne nale Epron.
17 Onne penia Abraham lernala Epron nin noho sidal ma aile Makpela lolo Mamre wali kimur. An manarnedi noho sidal onne noro nina ku'il noro idewe our au man aile noho onne raram na'akeme. 18 Ri Het rira ri leleher ma aile nika lapa makan na'akeme manaku nala nahenia noho sidal onne Abraham manarnedi me'e.