Ri mormori rira ailanna
6
1-2 Ri mormori ku onneni eren nammomori lolo noho wawan. Hirira tatana maekana man ma'aruru la herlei, de Makromod Lalap Nin mo'oniyanenihea po'one, lar ho noro maeke man hir suk. 3 Enpenia Makromod na'aheni, “Ainu'u Roh namhene hurinohi ri mormori mori ailanna nalo'ol heheni me'e. Hi onne penia ri mormori, de kar mori laa ewi-ewi. Nano lere eni me'ede, hir mori rakan rir anna rahu werro'o mehe.”4 Ku onne noro ku li'ur haenihi, ri mormori maukuku lanik aile noho wawan. Lere nonolu Makromod Lalap Nin mo'oniyana roro maeke noho wawan ho, de hir moriyana ri maukuku lanik onnenihe. Ri onnenihe ramwali ri man lewlewen lolo noho wawan man wekwekel nonolu eni.
5 Lere onne Makromod po'on ri mormori ailanna wake'edi me'e, la hi honorok akin paeku ha yakyaka mamani. 6 Ende An hehel ono umupala ri mormori huri min noho wawan, la Ai akin apinha wake'e. 7 Ende Ai na'aheni, “Ya a'akeperedi ri mormori man Ya'u umupala lolo noho eni wawan, noro idewe manu liwliwar noro ha mormori namehin na'akeme.”
8 Maa Nuh mehe de nahuwa'an Makromod akin.
Makromod Lalap hari kalla leke yon Nuh maki
9-10 Nuh nina wanakunu hi'i heheni:
Nuh anan mo'oni wokelu naran Sem, Yafet, noro Ham. Nuh eni akin namdudu la hi'i ha ma namlolo mamani lolo Makromod Lalap kalarna. Nano ri mormori na'akeme kulere onne, an mehe derne nakani Makromod Lalap.
11-12 Lere onne Makromod Lalap po'on ri mormori noho wawan na'akeme ailanna rehi. Hi rodi rurilai hi'i ha yakyak mamani, la mehe rano'onyakedi rir morimori me'e. 13 Ende Makromod Lalap kukunohi Nuh na'ahenia, “Laa ewi-ewi Ya'u po'on ri mormori na'akeme rodi rurilai hi'i ha man ailanna mamani, de Ya aledi kenekrohu me'e nahenia Ya a'akeperedi noho wawan noro ne'en raram na'akemeni. 14 Ende mayapi kapal lapida, modi au man kerhe noro ma narurib hi'ie. Hi'i kamar-kamar lolo kapal onne raramne, la nair ter modi pakedi kapal raram noro paharne. 15 Kapal onne om hi'i narunne limhiu rahu wokelu, paharin limhiu wellima, la kulunne limhiu welikelu. 16 Kapal wawanne kawaredi, maa hi'i kanawarne naloiyala limhiu ida nano kapal arkan. Mayapi kapal eni danaran wokelu la lolo herne wali hi'i nikida.
17 Horhorok! Ya ala okon mai namwali oir rulu lape pupin noho wawan, de ha man mormori mai noho wawan na'akeme maki mouwedi, ka na'urehiyala mahaku. Ha wo'ira na'akeme maki mouwedi lolo noho wawan, 18 maa Ya ala Ainu'u nou ki o na'ahenia, ‘Ya adiyaka o lolo kapal raram, moro o houm, anumhe roro honohe. 19 Nano ha man mormori warna-warna na'akeme modi dohodoho nornoro walla mai kapal raram leke tolle hi, de noro o mori wewerre.’ 20 Ende woro'o nano manu liwliwar warna-warna na'akeme, ha mormori warna-warna na'akeme, noro ha mormori ma na'ina'ik warna-warna na'akeme dohodoho mai ki o, leke modi dohodoho noro walla laa kapal raram. 21 Modi hanana'an warna-warna nammori ma'akene manaku lolo kapal raram leke mi mo'on, la ha mormori ra'an haenihi.”
22 Ende Nuh hi'i wewhe lernohi inhawa man Makromod Lalap komdedere eni.