Oir rulu lape
7
Hir hi'i kapal horu, Makromod ne'el Nuh, “Ya'u po'on lolo noho wawan na'akeme, o mehem hi'i ha ma namlolo, de moro nakar raram na'akeme laedi kapal raram here!2-3 Nano ha mormori man Ya'u huri mi mo'on noro man rodi hoikani Ya'u, modi wororo'o, pasan wo'ikku laa kapal raram haenihi, maa nano ha mormori man luli ra'an modi pasan ida mehe. Modi manu liwliwar, rara hola'an, pasan wo'ikku haenihi. Ha mormori eniyenihe ramwali wini hawonne, leke yon warna-warna na'akeme maki, maa moriyana la pe'er lolo noho wawan.
4 Horhoroke, alam wo'ikku ikar Ya ala okon lapa ma na'alehe renren hehenanumene lere weli'akka alam weli'akka, leke Ye esne mouwedi ha man mormori na'akeme man Ya'u hi'iyedi me'eni.”
5 Kame'ede Nuh hi'i lernohi Makromod Nina konomdere eni. 6 Lere oir rulu lapa mai lipan noho onne, Nuh nina anna rahu woneme. 7 Nuh noro hono, ananhe roro honohe, laa mouwedi kapal raram leke yon maki lolo oir rulu lap onne.
8-9 Enla ha mormori iri dalu man luli ra'an noro idewe ma kan luli ra'an, manu liwliwar rara hola'an, noro ha mormori namehin na'akeme mai lernohi Nuh laa kapal raram lernohi Makromod Lalap Nin konomdere.
Ha mormori laa kapal raram (NN. 7:5-9)
10 Rakan alam wo'ikku horu mene oir lape mai, de lipanedi noho wawan na'akeme.
11 Lere oir rulu lapa mai noho wawan Nuh nina anne rahu woneme. Rakan wollo woro'o, alam idaweli wo'ikku, oir rulu lap onne mai. A'am eni nina nike nahinariyedi, de okon lape halle mai yawa, la oir man min lolo noho wi'in keul mai wawan. 12 Okon onne mai lelere a'alam, kan ren rakan alam weli'akka.
13 Lere onne me'ede, Nuh noro hono, anan wokelu Sem, Yafet, noro Ham roro honohe laedi kapal raram me'e. 14 Hi rodi ha mormori warna-warna na'akeme: man merwui, man oromnoo, ma na'ina'ik, manu liwliwar noro ha mormori namehin man liwliwar, tutusiyana lalapa laa mouwedi kapal raram. 15-16 Lere onne ha mormori onnenihe na'akeme pasan dohodoho maiyedi Nuh leke laa wewerre kapal raram naise Makromod Lalap kukunohi eni. Hi na'akeme laa kapal raram horu, mene Makromod elekedi kapal nina nike.
17-19 Okon lape kan neke rakan alam weli'akka de oir lapa ha'a mamani hehenanumene kapal pakanedi. Oir ha'a mamani de pupinedi wo'or-wo'or man kukulu na'akeme, 20 la oir ha'a hehenanumene kulu narehiyedi wo'or-wo'or wuwan meter wo'ikku.
21-23 Ende ha man mormori lolo noho wawan na'akeme maki. Manu liwliwar na'akeme, ha mormori oromnoo, ha mormori merwui, ha mormori warna-warna namehin noro idewe ri mormori na'akeme maki mouwedi. Nuh noro nakar raram noro na'akeme man aile kapal raram mehe kar maki. 24 Oir lapa onne rakan alam rahu wellima mene kopur.