Noho na'ikeki napro'uk me'e
8
Enimaa Makromod Lalap kan hamlinu Nuh noro hono ananne noro ha mormori man aile kapal raram, de An hi'i anna huu leke hi'i oir namkisi. 2 An elekedi oir man minle noho wi'in eni la hi'i okon nekedi, 3 de oir eni kopkopur me'e. Hir minle kapal raram alam rahu wellima horu, 4 mene kapal eni kukuwedi wo'or kukulu ida naran Ararat. Lere onne, wollo wo'ikku alam idaweli wo'ikku. 5 Oir kopkopur mamani, la rakan wollo idaweli alam dedesne, wo'or-wo'or namehin enihe wuwan hariyedi.6 Lere alam weli'akka wali'ur, Nuh hari kapal nina hawollo ida, 7 leke huri manu arpau ida. Manu onne liwar lalaa mamai hehenanumene oir keper mouwedi me'e.
8 Enime'ede Nuh huri merpati ida wali'ur leke nauroin noho napro'uk me'e, ee kaunu. 9 Maa oir pupupin noho makun de merpati onne kan lernala onno, de wali wali'ur mai kapal. Nuh kani liman nasala merpati nodi laa kapal raram.
10 Nuh newek alam wo'ikku mene huri wali'ur merpati onne. 11 Rakan lere mamal merpati onne wali mai Nuh wali'ur nodnodi zaitun kawin ida man idedi nanumene roro'ohe, de Nuh nauroin oir lape namkisi me'e. 12 An newek alam wo'ikku huri wali'ur merpati onne, maa kan wali me'e.
13 Rakan wollo dedesne, alam ida, oir namkisiyedi me'e. Lere onne Nuh nina anna rahu woneme ida. Nuh hari kapal kanawarne leke po'on waliwali, la an po'on noho na'akeki napro'uk me'e. 14 Wollo woro'o eni, alam werro'o wo'ikku nine mene noho napro'uk horu.
15 Kame'ede Makromod Lalap kukunohi Nuh na'ahenia, 16 “Nuh! Moro houm, anumhe noro honohe mamharedi kapal eni here! 17 Mala kopuredi ha mormori na'akeme nano kapal here: ha mormori oromnoo, ha mormori merwui, ma na'ina'ik noro manu liwliwar leke eren nammomori la pe'er holiwewer noho eni wawan.”
18 Enla Nuh noro hono, ananhe roro honohe ramharedi kapal onne. 19 Ha mormori na'akeme dohodoho noro walla ramhara kapal: ha mormori oromnoo, ha mormori merwui, ma na'ina'ik noro manu liwliwar na'akeme ramhara kapal.
Nuh nala honoi kanani Makromod Lalap
20 Hir kopuredi nano kapal ne, Nuh nala waku nodi lukur honoi kanani onno. Nano ha mormori noro manu liwliwar ma kan luli rodi hoikani Makromod, ai nala heruwali nesne loile honoi kanani onno wawan leke kunu namwali tanada nahenia ai napanak trimkasi Makromod.
21 Lere Makromod naurounala honoi kanani onne mahun, Ai akin nahuwa'anedi, la noro akin wakunu na'aheni, “Nano lere eniyeni Ka'u akineri noho eni me'e, la Ka a'akeper ha man mormori na'akeme naise Ya'u hi'hi'i eniyeni, kade ri mormori na'akeme rahinorok panaeku ailanna nano tatana rakan lalapa. 22 Noho eni aile makun, lere pekir ariyono noro lere ra'ili radai, lere manhe noro noho ma'urinna, noho napro'uk noro okon mai, la lelere noro a'alam, na'akeme eniyeni namwali mamani.”