Makromod na'akerhe nou noro Nuh
9
Makromod Lalap nala rere'e haharu Nuh noro ananhe na'ahenia, “Moriyana dariyana leke holi noho wawan na'akeme. 2 Na'amoli ha mormori merwui tatana lalapa, manu liwliwar, noro i'in na'akeme ramka'uk mi, de modi molollo hi. 3 Nonolu Ya ala au kanaman dipin woin mi mo'on, maa lere eni Ya ala ha mormori na'akeme ihin mi mo'on haenihi. 4 Enimaa yono mo'on ha mormori man rarna ka namhara kemen makun. Mo'on mehe ha mormori man rarna namharedi me'e, ono mormorna melle rara onne.5-6 Yono mesne ri mormori. Lo'o ri mormori me ha mormori nesne ri, herre walha rir hini'i onne resnedi haenihi. Ya'u penia ma nala hunukum eni, ono Ya'u umupala ri mormori naise na'oi Maya'u. 7 Ende moriyana dariyana leke mim holi lolo noho wawan na'akeme!”
8 Makromod Lalap na'aheni wali'ur, 9 “Lere eni Ya'u hi'i nou ma namkene ki o moro upum anumhe, 10 noro idewe ha mormori na'akeme--ha mormori man oromnoo, man merwui, noro idewe manu liwliwar na'akeme man modi mamhara nano kapal eni haenihi. 11 Ainu'u nou onne hi'i heheni: Ka ala oir rulu lapa mai na'akeper noho wawan noro ne'en raram me'e. 12-13 Ya ala haimere loile a'am. Haimere onne namwali tanada leke yon mi moro ha man mormori lolo noho wawan na'akeme hamlinu Ainu'u nou eni. 14 Lere Yo odi kakam pupinala noho eni, lo'o haimere hari lolo kakam onne. 15 Haimere onne na'ori honorok Ya'u nahenia Ya aledi Ainu'u nou eni ki mi moro ha mormori na'akeme. Oir rulu lape ka na'akeper ha man mormori me'e. 16 Lere Ya'u do'on haimere hari lolo a'am eni, Ya'u horoknala nou ma namkeneni man Ya'u nouwedi ha man mormori lolo noho wawan na'akemeni. 17 Ende haimere onne namwali tanada Ainu'u nou man Ya aledi ha man mormori noho wawan na'akeme me'e.”
Nuh noro ananhe
18 Nuh ananhe ma namhara nano kapal naranhe, Sem, Yafet, noro Ham. (Ham onne ri Kana'an aman). 19 Ri mormori noho wawan na'akeme upun a'anhe melle Nuh noro anan mo'oni wokelu eniyeni.
20 Nuh onne man howok kirne. Ai penia ri dedesne man kaman anggur kirna. 21 Lerida ai nomun anggur manha wake'e, de ruriyedi nina nainaire la namkuru nadlewlewhe nina heuheu raram. 22 Ham laedi heuheu raram do'on aman namkuru nadlewlewhe ne, an laa paharne kukunohi mo'onwalla Sem noro Yafet. 23 Kame'ede woro'ohe rala ho'iho'ir ida, haiwaredi la rala'a kilili'ur laa heuheu raram, po'onedi herne, la ho'ir aman, leke yono po'on.
24 Nuh nina manmanhe muli ne, ai nauroinnale anan karuri Ham nin hini'i onneni, de 25 ai na'aheni: “Heih, Kana'an o, ya j o! Na'amoli o moro upum anumhe mamwali o wallumhe rir hophopon wahwahan.”
26 Ai na'aheni wali'ur, “Ka'uli kasa'a Makromod Lalap ono Ai penia ma narehi ma nalewen, la Ai namwali Sem nin Makromod, maa Kana'an eni namwali Sem nin hophopon wahwahan. 27 Na'amoli Makromod Lalap na'ikar na'uwali Yafet nina nohorai leke nammori.
Na'amoli Yafet upun ananhe holi namlina namkai noro Sem upun ananhe, maa Kana'an upun ananhe ramwali Yafet nina hophopon wahwahan.”