सब्द भंडार
अगमजानी - महापरभु चो मन-इछा के जानुन महापरभु बाटले लोगमन के बलतो बीता के अगमजानी बलसोत। सत अगमजानी के महापरभु ची बाछते रये आउर हुनके महापरभु आपलो आत्मा चो सकत ले भरपुर करते रये, जसन कि सामुएल, जसाया आउर बले कोनी-कोनी रला।
अबराहम - इसराएलिमन चो आउर महापरभु के पतेयातो लोगमन चो बुआ आय। महापरभु हुनके हागदिलो आउर हुनके गोटोक बड़े नाव, बड़े जात आउर हुन दुसर लोग काजे ‘बर चो मूर होसे’ बलुन बायदा करलो। अबराहम, उर राज चो रतो बीता रये, मानतर महापरभु चो हुकुम के मानुन आपलो राज के छांडुन महापरभु देतो बायदा करलो राज ने गेलो।
अबिसेक - राजा नोहले पुजारी नोहले अगमजानी बनातो काजे मुंडे पवितर तेल रिकाउन पन आउर हक देतोर अबिसेक आय। हुनमन के महापरभु चो सकत आउर पवितर आत्मा चो बर ले खास बुता काजे पवितर आउर बाछलो लोग मानते रला।
असेरा देव - कनान राज चो गोटोक देव चो नाव असेरा आय। हुता चो लोगमन नंगत फसल होतो काजे एचो सेवा-सासन करते रओत।
आदम - (लूका 2:38; रोमी 5:12-15; जहूदा 14 ) संवसार चो पईलात मनुक आदम आय। हुनके महापरभु माटी ले आपलेई रंग-रूप असन आउर सकल-सुरित ले बनाउन हुनचो नाक ने आपलो फुंडा फुकून जीव पड़ालो। आदम आउर हव्वा, महापरभु चो हुकुम के नी मानलो किरता संवसार ने पाप आउर मोरना ईली। एईमन ले संवसार चो जमाय लोग होला।
आमीन - (रोमी 1:25; 9:5; 1कुरिंथी 14:16; 2कुरिंथी 1:20) आमीन बललोने, “असने ची होओ”। कोनी पारथना करले हुनचो पारथना ने राजी होउन “आमीन” बलुआत।
इसराएल - अबराहम चो नाती जाकूब के महापरभु बाटले दिलो नाव आय। महापरभु दिलो इसराएल नाव ले ची हुन देस चो नाव पड़ली जेचो बायदा महापरभु, अबराहम ले करु रये। इसराएल बललोने महापरभु ले लड़तो बीता।
उपास - धरम बुतामन के पुरा करतो काजे काईची नी खातोर उपास आय बललोने, पाप बुतामन ले खिसियातो काजे, महापरभु चो बाट ने चमकट होतो काजे पारथना संगे उपास रयसोत। उपास धरतो बाटले, गोटोक मन देउन महापरभु चो मयमा करुक होयसे।
कनान देस - (मत्ती 15:22; पठालो 7:11; 13:9) नूह चो बेटा हाम ले कनान जनमलो, हुनी कनान चो नाव ले, कनान देस चो नाव पड़ली। ए हुनी देस आय जेके महापरभु, अबराहम के देतो बायदा करु रये।
किरिस्त - जूनानी बोली चो नाव आय, जेचो अरथ अबिसेेक करलो लोग, बललोने जुना-नियम ने इसराएल ने राजामन, पुजारीमन आउर अगमजानीमन के अबिसेेक करतो नीती रये। धारनिक हिसाब ले हुनमन चो मुंडे तेल रिकाउन हुनके पन आउर हक के देते रओत। महापरभु, लोगमन के पाप ले मुक्ति देतो काजे जीसु के बाछुन पठालो। एईकाजे हुन किरिस्त आय।
किरिस्ती बिसवास - जीसु किरिस्त, महापरभु चो बेटा आय, हुन लोगमन चो पाप-खेमा काजे जतरा होलो आउर तीसर दिने मोरलोमन ले जीव उठलो आउर हुन फेर एउन हुनके पतेयातो लोगमन के सरग नेयदे। एई गोट के पतियातोर, किरिस्ती बिसवास आय।
कुरिंथी सहर - जूनान देस चो बेर बुड़ती बाटे अखाया परघन चो रोमी राज ने कुरिंथी सहर रये। एथा गोटोक पानी जाहाजमन चो घाट बले रये। ए सहर ने कुड़ायेक लोग रला जोनमन खुबे सवकारमन बले रला। एता खुबे धंधा-पानी होते रये आउर एता लोगमन बेपार करतो काजे एते रओत। ए सहर, अडरा बुतामन काजे बदी पाउ रये। पउलुस दुसर हार सुनाउक गेलो बेरा अठारा मयना होओतले एता रलो आउर एता गोटोक मंडली बनालो एकई कुरिंथी चो मंडली बलसोत।
कुरिंथुस सहर - जूनान देस चो बेर बुड़ती बाटे अखाया परघन चो रोमी राज ने कुरिंथी सहर रये। एथा गोटोक पानी जाहाजमन चो घाट बले रये। ए सहर ने कुड़ायेक लोग रला जोनमन खुबे सवकारमन बले रला। एता खुबे धंधा-पानी होते रये आउर एता लोगमन बेपार करतो काजे एते रओत। ए सहर, अडरा बुतामन काजे बदी पाउ रये। पउलुस दुसर हार सुनाउक गेलो बेरा अठारा मयना होओतले एता रलो आउर एता गोटोक मंडली बनालो एकई कुरिंथी चो मंडली बलसोत।
कुरूस ने चेगातोर - रोम राज चो लोगमन ले आगे दुसर लोग बले करुस ने चेगातो डंड देते रओत। जुगे करुन जोन सरकार चो बिरुद जायसे हुनके रोमीमन करुस ने चेगाते रओत। हुनके रोमी पाईकमन कोड़ा मारुन सहर ने गुलाय बुलाउन भाति कुरूस ने चेगातो काजे नेते रओत। जेके करुस ने चेगातोर आय, हुनके गोटोक बड़े आड़की-बिड़की ठोकलो रूक ने हाथ-पांयमन के लोहो खुटी मारुन, लटकाउन देते रओत। करुस ने चेगालो लोग मरोतले पाईकमन राखा करते रओत। जीसु के रोमी राज आउर जहूदी धरम चो बिरुद करतो बदी देउन कुरूस ने चेगाला।
खतना - (उबज 17:9-14) महापरभु, अबराहम ले करलो बायदा हिसाब ले देहें ने करलो चीना खतना आय। ए जहूदी नीती के लेका पिला जनम ले आटवां दिने करसोत। अबराहम ले धरुन सपाय जहूदीमन ए नीती के मानसोत।
गलील - पलसतीन देस चो बेर उदिया चो उजा हाथ बाट चो जगा के गलील बलेसोत। गलील परघन, डोंगरी संद चो समूंद ले धरुन लबानोन डोंगरी अमरतले आउर बेर बुड़ती बाटले धरुन समूंद कटा अमरतले बसलीसे। नवा-नियम चो बेरा गलील रोमीमन चो गोटोक परघन रये। ए हेरोद अंतिपास चो राज ने रये। गलील ने जहूदी आउर बिजातीमन बले रला।
गुलगुता - गोटोक डोंगरी आय आउर एचो अरथ ‘टापरी चो जगा’ आय। हुन जरूसलेम लगे आसे आउर हुनचो रेटे बड़े सड़क बले आसे। हुनी गुलगुता डोंगरी ने जीसु किरिस्त के कुरूस ने चेगाला।
चेलामन - जीसु, मंजपुर ने रतोदांय बारा झन के बाछुन आपलो चेला बनाउन रये, जोनमन जीसु किरिस्त चो सरग गेलो पाछे नंगत खबर के गुलाय मंजपुर ने बिगराला। जीसु किरिस्त के पतियाउन हुनचो सांगलो बचन के मानतो लोग के बले चेलामन बलुआत।
छंडावा - संवसारी हिसाब ले कोनी कमेया काजे धन देउन हुनके बचातोर छंडावा आय। मानतर पवितर सास्तर चो हिसाब ने जीसु किरिस्त, कुरूस चो डंड ले आपलो लोउ बोहाउन लोगमन के सपाय पापमन ले छंडालो।
जरूसलेम - इसराएल देस चो सबुले बड़े सहर आय, ए सहर ने महापरभु काजे गोटोक बड़े मंदिर रये, एई सहर ने जीसु किरिस्त के कुरूस ने चेगाउन मारला। जहूदी लोग आउर किरिस्ती लोग ए सहर के खुबे पवितर मानुआत।
जहूदी - अबराहम जहूदीमन चो मूर पुरखा आय। हुनचो नाती जाकूब चो बारा झन बेटामन रला। हुनमन ले बारा बंस होली। जाकूब ले धरुन ए बारा बंस चो लोगमन के जहूदी बलसोत। एई जहूदी थर ने जीसु चो जनम होली। जहूदीमन, मोसा बाटले दिलो नियम-कानुनमन के पक्का मानसोत। पठालो बीता पउलुस बले बिन्यामीन बंस ले जनमलो जहूदी रये।
जहोवा - जुना नियम चो किताप ने महापरभु के इबरानी बोली ने जहोवा बलते रला, आउर ए नाव चो खुबे इजित-मान करते रला।
जहोसू - नून चो बेटा रलो। जहोसू बललोने ‘जहोवा बचाउआय’। मोसा मोरलो पाछे, जहोसू इसराएलिमन चो मुखिया बनुन हुनमन के कनान देस ने अमरालो। लेवी बंस के छांडुन इसराएलीमन चो गियारा बंस के जहोसू, कनान देस के बाटा करुन दिलो। जहोसू, सपाय इसराएलीमन के मुरत सेवा छांडुन महापरभु चो बाट ने गोटकी मन ले चलतो हुकुम दिलो।
जाकूब - पवितर सास्तर ने जाकूब नाव चो चारझन रला। गोटोक, अबराहाम चो नाती इसहाक चो बेटा, एई जाकूब चो नाव महापरभु इसराएल संगालो। दुसर, जब्दी चो बेटा, जूहन्ना चो भाई जोन जीसु किरिस्त चो चेला बले रलो। तीसर, हलफई चो बेटा जाकूब जोन जीसु किरिस्त चो चेला रये। चवथा, जीसु किरिस्त चो भाई चो नाव बले जाकूब रये, जोन जीसु चो मोरलोमन ले जीव उठलो पाछे जीसु के पतेयाउन हुनचो सेवा-बुता करलो।
जीव दुखतोर - ए महापरभु चो गोटोक गुन आय। जीसु किरिस्त चो जीवना ने बले आमी ए गुन के दखुंसे। आमके पाप ने पड़लोर दखुन आउर आमचो नानागती के दखुन महापरभु आमके जीव दुखेसे आउर साका होयसे।
जीव बचातो ठान - जुना नियम हिसाब ले कोकई हो मोरते मारलो डंड काजे हुनके बले मोरते मारते रओत। मानतर जहोवा, इसराएलिमन के हुकुम दिलो कि कोनी बले कोकई हो धोका ले मोरते मारुन “जीव बचातो ठान” ने अमरलोने हुनके कोनी नी मारोत।
जीसु - जूनानी बोली चो जीसु नाव, नवा-नियम बेरा चो इबरानी बोली चो जहोसू नाव असन आय। जीसु बललोने, ‘जहोवा आमके मुक्ति देउआय’। जीसु पवितर आत्मा ले मरियम बाटले जनमलो आउर लोगमन चो पाप खेमा काजे कुरूस काट ने जतरा होलो।
डेंग ठान - कनानी लोगमन डोंगरीमन ने बाल देव चो मंदिर बनाउन पुजा-पाठ करते रला, हुनके डेंग ठान बलसोत। उसनेची महापरभु चो आराधना करतो काजे इसराएलिमन जुगे करुन डोंगरीमन ने जाते रओत।
तम्बू - इसराएलीमन मिसर देस ले निकरुन रान बाटले जातो बेरा, महापरभु, मोसा के दखालो घटन हिसाब ले तम्बु बनाउन आपलो सेवा करतो हुकुम दिलो। हुनचो तीन बाकरा रली। बायदा चो डोली, हुनचो पवितर ले पवितर ठान ने रली, जोन सबुले भीतर चो बाकरा रली। जिदलदांय ले सुलेमान, जरूसलेम ने मंदिर बनालो, हुदलदांय ले जहूदीमन एई तम्बु ने महापरभु चो आराधना करते रला।
तीनपुर - महापरभु बनालो उपरपुर, मंजपुर आउर तलपुर के तीनपुर बलसोत बललोने सपाय तीज, जीव-जन्तुर, माने-मंजा, बेर-जोन, सरग-नरक के।
दया - कोकई बले जीव दुखुन साहरा करतोर दया आय। कोनी दया पावतो लाईक नीआत आउर कोनी बले हुनके आपलो भलई बुता ले कमाउक नी सके; महापरभु दया करुन लोगमन चो पाप के खेमा करेसे आउर हुनमन के जुग-जुग चो जीव देयसे।
दस हुकुममन - सिनाई डोंगरी ले महापरभु, मोसा बाटले इसराएलिमन के मानतो काजे दस हुकुममन दिलो।
दाउद - जिसय चो सबुले नानी बेटा दाउद आय। हुन धोरई रये मानतर महापरभु हुनके इसराएलिमन चो महाराजा बनालो। जीसु किरिस्त चो जनम दाउद चो थर ने होली।
दाउद चो बेटा - पवितर सास्तर ने जीसु किरिस्त के दाउद चो थर ने जनमलो किरता दाउद चो बेटा बलसोत।
देव-भूतमन - सयतान चो कमयामन आत। एमन मनुक भीतरे रउन अडरा-अडरा बुता करायसोत। एमन बरन-बरन चो रोग-बियाद के बले जोंवटायसोत। जीसु किरिस्त ची, मनुकमन ले देव-भूतमन के निकराउआय।
धरम-पंडितमन - महापरभु चो नियम-कानुन के धरम-पंडितमन लिखते रला। छपाई होतो दिनमन ले आगे, अंकसुची, चिटी, सरकारी किताप आउर पवितर सास्तरमन चो कितापमन, हुनमन आपलो हाथ ले नंगत ले लिखते रओत। एमन के पंडितमन बलते रओत। हुनमन दुसर के सिखातो बीतामन रला। एईकाजे जहूदीमन हुनमन के इजित-मान करते रला।
धरम-सियान - महापरभु चो मंडली ने कोनी-कोनी सियान लोगमन के मंडली चो दखा-रखा करतोर, सिखातोर, बाट दखातोर जुमे रयसे। हुनमन खुबे गियान आउर बर पावलो लोग आत। लोगमन, हुनमन चो नंगत चलनी-बुलनी आउर सोज बेबार किरता खुबे इजित-मान करसोत।
धारनिक - गोटोक दोसी मनुक के दोस नोहलोर मानतोर। आमी सबु लोग दोसी आउर पापी आंव। मानतर जीसु किरिस्त के पतेयाले महापरभु आमके धारनिक मानेसे। कसनबलले जीसु किरिस्त धारनिक रलो आउर आमचो पाप-दोस किरता कुरूस काट ने जतरा होलो।
धूप - रूक-राई चो चीक आउर जड़ी-बुटी ले बनालो गोटोक बास देतो तीज आय। एके इंगरा ने डसालोने पंडरी कुमला संगे बास देउआय। इजराएली पुजारीमन तम्बु (मंदिर) ने महापरभु चो सेवा करतो बेरा धूप गंधाते रओत।
नंगत खबर - जीसु किरिस्त, महापरभु चो बेटा, माने रूप धरुन संवसार ने जनम धरलो, लोगमन चो पाप-खेमा काजे जतरा होलो आउर तीसर दिने जीव उठलो। ए गोट के लोगमन पतियाला जाले मुक्ति पावदे ची। एकेई नंगत खबर बलसोत।
नरक कुंड - सयतान के डंड देतो काजे बनालो ठान के नरक कुंड बलसोत। ए संवसार ने रलोदांय जीसु किरिस्त के नी पतेयालो लोगमन के बले महापरभु, नरक-कुंड ने डंड देयदे। हुन थाने नी लिबतो आईग आउर भिंग-भिंगा अंधार ने जुग-जुग चो डंड पावदे।
नियम-कानुन - मोसा लिखलो जुना नियम चो पईल पांच किताप के नियम-कानुन चो किताप बलसोत, जोन नियम-कानुन के महापरभु, मोसा बाटले इजराएलीमन के मानतो काजे देउ रये। ए थाने दस हुकुममन, भेंट चेगातोर, जतरा, पवितर होतोर, चलनी-बुलनी, पुजारी-सेवा, आउर खुबे नियममन चो बारे ने लिखलोर आसे।
नूह - आपलो पीड़ीदांय, हुन खुबे धरमकारी रलो। हुनचो समया ने चालीस रात-मंजन महापरभु पानी बरसा करलो, जोन पूर-पानी ले सपाय मंजपुर बुड़ून नास होली। मानतर महापरभु दिलो हुकुम हिसाब ले, नूह गोटोक बड़े पानी जाहाज बनालो। हुनी जाहाज ने, नूह संगे आठ झन आउर पसु-जनावरमन आउर चड़ईमन बले बाचला।
पईल फर - जीसु किरिस्त मोरलोमन ले सबुले पईल जीव उठलो। एईकाजे मोरलोमन ले जीव उठतो लोगमन ने हुन पईल फर आय।
पठालो-लोग - (मत्ती 10:1-14) जीसु किरिस्त छुनलो चेलामन के पठालो-लोग बलसोत। जीसु मंजपुर ने रलोदांय, हुनचो चेलामन बले संगे रला आउर जीसु ले सिखला। हुनचो चेलामन, जीसु चो मोरतोर आउर जीव उठतो चो गवई आसोत। जीसु हुनमन के नंगत खबर सुनातो काजे बाचुन गुलाय राज ने पठालो।
पतालपुर - मंजपुर ले खाले चो भाग के तलपुर बलुआत। मोरलो लोगमन चो आत्मामन नियाव समया अमरतले पतालपुर ने रदे जेके तलपुर बले बलसोत।
पयसा अदली-बदली करतो लोग - जरूसलेम चो मंदिर ने खास पयसा के ची दान चेगाते रओत आउर दुसर छापा लगालोर पयसा चेगातोर नी बनते रये। एईकाजे मंदिर चो दुआरे लोगमन ले पयसा अदली-बदली करतो पेसा बीतामन बसु रओत।
परभु चो दिन - जीसु किरिस्त मोरलो पाछे जीव उठुन सरग ने गेलो, हुनचो फेर एतो दिन के परभु चो दिन बलसोत। हपता चो पईल दिन के बले किरिस्तीमन परभु चो दिन बलसोत।
परभु भोज - जीसु किरिस्त चो मोरना, हुनचो देहें आउर हुनचो बोहालो लउ के सूरता करतो काजे मंडली के दिलो गोटोक नीती ‘परभु भोज’ आय। जीसु आपने के मानतो लोग के, एके करतो हुकुम दिलो।
पवितर आत्मा - महापरभु गोटकी ची आय। हुन, बुआ, बेटा आउर पवितर आत्मा चो रूप ने रयसे। पवितर आत्मा लोगमन के आपलो पाप चो बारे ने समजायसे आउर जीसु किरिस्त के पतेयातो लोगमन के पवितर आत्मा बाट दखायसे आउर सकत देयसे।
पाप - महापरभु चो हुकुम के नी मानतोर आउर हुनके नी पतेयातोर पाप आय। अडरा चलनी-बुलनी ने रतोर बले पाप आय।
पाप खेमा - महापरभु चो बिरुद करलो पाप चो पलटा नी धरुन पाप चो डंड नी देतोर पाप-खेमा आय। जीसु किरिस्त आमचो पाप चो डंड के आपलो उपरे धरलो आउर हुनचो मोरना बाटले आमचो पाप-खेमा होली।
पुजारी - महापरभु, मोसा बाटले, तम्बु ने धरम बुता करतो काजे बाछलो लोगमन के पुजारी बलुआत। पाछे, जरूसलेम चो मंदिर ने पुजारीमन महापरभु चो सेवा करते रओत।
पेंदी नोहलो दराहां - (दरसन 20:1-3) जोन थाने इबलीस बललोने, सयतान के हजार बरक पुरत ले डंड देतो काजे बांदुन ढाकदे।
फंदी किरिस्त - एतो समया ने, कोनी असन एयदे जोन आपने के किरिस्त बलेदे आउर बड़े-बड़े अचरित बुतामन दखाउन लोगमन के भरमायदे आउर सत महापरभु ले लोगमन के लापी नेयदे, हुन फंदी किरिस्त आय।
फरीसीमन - नवा नियम बेरा, जहूदीमन चो मुखिया दलमन ने फरीसी दल गोटोक नाव कमालो दल रये। हुनमन मोरलो लोग जीव उठतो गोट के मानते रओत। फरीसीमन, रोम राज चो हक ने रउक मन नी करते रओत। मानतर हुनमन रोम राज चो बिरुद ने उबढंगरी बुता नी करते रओत।
फसह तिहार - इसराएलीमन, मिसर देस ले छंडावा होलो सूरता काजे फसह तिहार मानसोत। हुन दिने महापरभु, मिसरीमन चो सपाय पईलात बेटामन के मारुन इजराएलीमन के मोसा बाटले मिसर चो कमेया बुता आउर दुख-डंड ले छंडाउन कनान देस बाटे नीलो।
बड़े पुजारी - मंदिर चो पवितर ले पवितर ठाने बरककार ने, गोटोक हार जहूदीमन काजे महापरभु लगे बड़े पुजारी ची भेट चेगाते रये आउर लोगमन चो पाप खेमा काजे पारथना करते रये।
बपतिस्मा - गोटोक धारनिक नीती आय। जोनमन महापरभु चो पुरे आपलो सपाय पापमन के मानसोत आउर जीसु किरिस्त ची आमके मुक्ति देउआय बलुन पतियायसोत, हुनमन लोगमन पुरे आपलो बिसवास के दखातो काजे पानी ने बपतिस्मा धरसोत।
बरदान - कोकई होओ दुसर चो भलई करतो काजे महापरभु बाटले मिरलो खास दान के बरदान बलसोत। जसन कि सिखातोर, दान देतोर, भलई करतोर आउर बले काई-काई।
बायदा - दुयझन चो मंजी, काई देतो काजे नोहले काई करतो काजे दिलो बचन के बायदा बलुआत। महापरभु, अबराहाम के बर देतो, नवा देस देतो आउर समूंद कटा चो गनुक नी सकतो बारु असन थर होतो बायदा करु रये।
बायदा चो डोली - तम्बु चो ‘पवितर ले पवितर’ ठान ने, बायदा चो डोली रली। हुन थाने महापरभु, मोसा बाटले दिलो दस हुकुम चो पटीमन, हारुन चो जागलो बड़गी आउर मन्ना रली।
बाल देव - कनान आउर फीनिके राज चो लोग बाल देव चो सेवा करते रओत, जेके लोगमन रूक-राई, जीव-जन्तुर आउर लोगमन उपरे हक आसे बलुन मानते रओत।
बालजबूल - सयतान चो गोटोक आउर नाव बालजबूल आय, बाल देव चो नाव ले बालजबूल पड़ली। ए असुद आउर अडरा आत्मामन चो मुखिया आय।
बिजाती - आगे जुगे, जोन जहूदी नोआत हुनमन के बिजाती बलते रला। पाछे, महापरभु के नी मानुन, मुरीत सेवा आउर देव-भूत मानतो लोगमन के पवितर सास्तर ने, बिजाती बोलसोत।
बिलाम - बओर चो बेटा रलो जोन कोकई बले सरापले हुन सराप पावते रये आउर बर दिले बर पावते रये। एईकाजे मोआब देस चो राजा बालाक, लालच देउन इसरायलीमन के सराप देतो काजे हुनके हागदेउन रलो।
बिल्लईकल - ए गोटोक लोहा चो खुबे बड़े जकना असन आय, जोन बड़े पानी-जाहाज के पानी ने ठेबाउन रउआय।
बिसातो दिन - हपता चो सातवां दिन के सबत नोहले बिसातो दिन बलसोत। महापरभु छय दिन ले मंजपुर के बनाउन सातवां दिने बिसालो। महापरभु, इजराएलीमन के सातवां दिन के बिसातो दिन मानतो हुकुम दिलो।
बेतलहम - बेर उदिया उजा बाटे, जरूसलेम चो गोटोक नानी सहर रये। एताय दाउद राजा चो घर बले रये। एई बेतलेहम ने जीसु किरिस्त चो जनम होली।
बेबिचार - आपलो बायले नोहले आपलो मनुक के छांडुन दुसर संगे रतोर आउर कोकई होओ आईक लगातोर बेबिचार आय। पवितर सास्तर हिसाब ले, महापरभु चो हुकुम के नी मानुन मुरीत सेवा करतोर बले बेबिचार आय।
बेबिलोन - फरात नंदी चो रेटे बसलो गोटोक राज चो नाव आय। बेबिलोन चो राजा इसराएलिमन के कमेया बनाउन रलो। बेबिलोन बलले, महापरभु के बिरुद करतो लोग चो चीना आय।
मंडली - महापरभु चो आराधना करतो काजे रूंडा होलो बिसवासी लोग-कुड़ा के मंडली बलसोत।
मनुक चो बेटा - जीसु किरिस्त आपने के मनुक चो बेटा बलते रये। एईकाजे कि हुन पक्का मनुक रये आउर जुग-जुग चो राजा (दानी 7:13-14) रये।
मन्ना - जिदलदांय इजराएलीमन के महापरभु मिसर देस ले छंडालो आउर कनान देस ने अमरातो काजे रान बाटले सपाय लोगमन के नेते रये, हुदलदांय हुनमन के खातो काजे गोटोक बरन चो भात असन तीज बादरी ले घसराउन दिलो। हुन तीज पंडरा आउर ओंडार तेल चो पोपड़ी असन रये।
मयमा - महापरभु चो उजर के मयमा बलुआत। हुनचो बड़पन, हक, सकत आउर मान के बले मयमा बलुआत। लोगमन, हुनचो गुन गाउन आउर हुनचो बड़ाई करुन महापरभु के मयमा देयसोत।
महापरभु चो मेंडा पिला - जुना नियम ने लोगमन पाप-दोस किरता मेंडा पिला के जतरा करते रला आउर हुनचो जतरा-लउ ले आपन के सुद आउर पवितर मानते रला। महापरभु चो मेंडा पिला, जीसु किरिस्त आय, जोन सुद आउर पवितर आय। हुन लोगमन चो पाप-दोसमन काजे गोटकी हार कुरूस काट ने जतरा होलोसे। हुनके पतेयातो लोगमन के आउर काई जीव जतरा देउक नी लागे।
महापरभु चो राज - सरग महापरभु चो राज आय। हुता सरग दुतमन आउर महापरभु चो राज चो रयत जुग-जुग रयसोत। जीसु किरिस्त के पतेयातो लोगमन चो जीवना ने महापरभु राज करेसे। महापरभु चो राज ने भुक-पियास, दुख-डंड, रोग-बेमार आउर मोरना नीआय। मानतर सुख-अस्तिर, हरिक-उदीम आउर जुग-जुग चो जीव आसे।
मुक्ति - जुग-जुग चो मोरना, पाप चो डंड आउर पाप ले बाचुन रतोर मुक्ति आय। जीसु किरिस्त आमके पाप चो डंड ले बचातो काजे ए संवसार ने ईलो आउर कुरूस ने जतरा होउन आमके मुक्ति दिलो।
मोसा - महापरभु बाटले इसराएलीमन के मिसर देस ले छड़ाउन नेउ बीता मोसा रये। हुनी, पवितर सास्तर चो पईल पांच कितापमन के लिखलो।
लेवी - जाकूब चो तीसर बेटा चो नाव लेवी रये। हुन अमदेया अडरा बुतामन चो बिरुद करते रये। एचई ले लेवी बंस बलाय होली। मोसा आउर हारुन बले लेवी बंस चो रला। लेवीमन के ची आपलो मंदिर ने पुजारी सेवा करतो काजे महापरभु बाछुन रये।
सदूकिमन - नवा-नियम बेरा, जहूदी धरम ने सदूकी आउर फरीसी नाव चो दुय मुखिया दल रला। ए दलमन जीसु चो जनम ले आगे ले रओत। सदूकिमन आदो जहूदीमन ले जुगे सवकार रओत। आत्मा, सरगदुत आउर मोरलो पाछे फेर ले जीव उठतो गोट के सदूकिमन नी मानते रओत।
सयतान - हुन आगे गोटोक सरगदूत रलो, मानतर महापरभु चो बिरुद करलो किरता हुनके सरगदूत पन ले गुचाउन दिलो। सयतान, महापरभु आउर हुनचो लोग चो अमदेया बिरुद करुआय।
सरगदूत - लोगमन के महापरभु बाटले खबर अमरातो दूत आत। हुनमन सरलगा महापरभु चो मयमा आउर जय-जय करते रयसोत आउर हुनचो मन-इछा असन करते रओत।
सरगपुर - उपरपुर के सरग बलसोत आउर हुन कसन आसे हुनचो बारे ने कोनी बिचारुक नी सकोत। जहूदीमन, महापरभु के मान करतो काजे महापरभु नाव धरतो पलटा सरग नाव धरते रओत। जीसु किरिस्त के पतेयातो लोगमन महापरभु आउर हुनचो संगे सरग ने जुग-जुग रदे।
सामरी - गोटोक सहर चो नाव आय, हुन सहर ने रतो लोग के सामरेया बलते रओत, जोनमन जहूदीमन आउर बिजातीमन ले मिसड़ा जनमुन रला। एई किरता जहूदीमन हुनमन के हिनस्ता करसोत।
हकदार - आपलो आया-बुआ मोरलो पाछे हुनमन कमालो तीजमन चो हक हुनचेई बेटा-बेटीमन के मिरेसे। जुना नियम चो हिसाब ले महापरभु ले मिरतो हक इसराएलिमन चो रली। मानतर नवा नियम हिसाब ले जोन बले जीसु किरिस्त के पतियायसोत हुनमन के महापरभु चो बेटा-बेटी होतो हक मिरेसे।
हालेलुया - इबरानी बोली ने हालेलुया बललोने, महापरभु चो मयमा आउर जय-जय होओ।
हेरोद - पईल हेरोद के, हेरोद ‘महाराजा’ बलसोत। जीसु चो पिला बेरा, हुनके मोरते मारतो काजे हेरोद डगराते रलो आउर हुनी बेरा चो सपाय लेका पिलामन के मोरते मारतो हुकुम दिलो। (मत्ती 2) हुनी हेरोद, पिला जीसु चो खबर देतो काजे तारा गनतियारमन के उकसालो। हेरोद राजा चो बेटा चो नाव बले हेरोद रये, हुन गलीली ने राज करते रये। जीसु चो नियाव हुनचो पुरे होउ रये आउर बपतिस्मा देतो बीता जूहन्ना के बले हुनीची मोराउ रये। हेरोद अगरिपा, पईल हेरोद चो नाती रलो। हुन किरिस्ती मंडलीमन के डाटा-टेवा करलो आउर पठालो बीता जाकूब के मोरते मारालो।
हेरोदेयामन - हेरोद राजा आउर हुनचो बेटामन बाट चो लोग के हेरोदेयामन बलसोत। हुनमन रोमी राजपालमन संगे बुता करुआत।
होसाना - महापरभु चो लोग, गोटोक-दुसर के भेट होलोने ‘होसाना’ बलते रला, जेचो अरथ, ‘महापरभु चो जय-जय होओ’ आय।