जीसु चो बारा चेलामन
10
जीसु आपलो बारा चेलामन के हागदेउन, देव-भूतमन के निकरातो आउर लोगमन के जमाय बरन चो बेमार-निमल ले उजरातो चो हक दिलो।
2 बाराझन पठालो-लोगमन चो नाव ए आय:
पईल बीता समोन, जेके पतरस बले बलुआत,
आउर हुनचो भाई अंदरियास;
जबदी चो बेटा जाकूब, आउर हुनचो भाई जूहन्ना;
3 फिलिपुस,
आउर बरतुलमय,
थोमा,
पट्टी धरतो बीता मत्ती,
हलफई चो बेटा जाकूब,
आउर तदई,
4 कनानेया समोन,
आउर जहूदा इसकरियोती (जोन जीसु के धरा पड़ालो।)
बारा चेलामन सेवा करतोर
5 जीसु बाराझन चेलामन के ए हुकुम देउन पठालो: तुमी बिजातीमन चो घरे नी जाहा, आउर सामरीमन चो सहर ने नी ओला।
6 मानतर तुमी इसराएल घर चो हाजलो मेंडामन लगे जाहा।
7 आउर तुमी बाटे-घाटे हिंडतो बेरा, सरग राज लगे ईलीसे बलते डारा बुलाते जाहा।
8 बेमारमन के उजराहा, मोरलोमन के जियाहा, कोढ़ बेमारमन के छुकनाय करा, देव-भूतमन के निकराहा, तुमी फोकट ने पावलासाहास, एईकाजे फोकट ने दिया।
9 आपलो ओटी ने सोन-रूप आउर तामा-रुपया नी धरा।
10 बाट काजे झोरा नी धरा, दुसर जोड़ी कुड़ता, पनई आउर बड़गा बले नी धरा, कसनबलले भूतियार के हुनचो भूती मिरतोर ची आय।
11 “जोन कोनी गांव-सहर ने तुमी जाहासे, हुता पता करा, कोन तुमचो रतो लाईक आय आउर हुन गांव-सहर ले नी निकरोतले हुनचेई ने राहा।
12 जोन घरे तुमी जाहासे हुन घर के बर दिया।
13 हुन घर लाईक चो आसे जाले, तुमचो बर हुनचो उपरे रयदे; मानतर हुन घर लाईक नीआय जाले, हुन बर तुमचो लगे बोहड़ुन एयदे।
14 जोन बले तुमके नी माने आउर तुमचो गोट के नी सुने, हुन घर आउर सहर ले निकरतो बेरा आपलो पांय चो धुरला के फापड़ुन दिया।
15 मय तुमके सते बलेंसे, नियाव चो दिने सदोम आउर अमोरा देसमन चो गती हुन सहर चो गती ले आगर कटलातो लाईक होयदे।”
चेलामन उपरे एतो तकलीस
16 “दखा, डुरकीमन चो मंजिगता मेंडामन असन मय तुमके पठायंसे, एईकाजे साप असन बुद आउर परेंया असन सोज होआ।
17 मानतर मनुकमन ले बाचुन राहा, कसनबलले हुनमन तुमके कचरी ने सोपदे, आउर आपलो मंडली-घरमन ने तुमके कोड़ा झोकादे।
18 तुमके मोचो किरता राज करु बीतामन आउर राजामन पुरे उबा करदे, जेचोले तुमी हुनमन के आउर बिजातीमन के, मोचो बारे ने गवई देउक सकासे।
19 केबई बले हुनमन तुमके धरलोने काय बलुंदे बलते फिकिर नी करा, कसनबलले जोन गोट तुमके बलतोर होयदे, हुदलीदांय तुमचो सरग चो बुआ तुमके सांगुन देयदे।
20 कसनबलले बलु बीता तुमी नोआहास, मानतर तुमचो बुआ चो आत्मा तुमचो बाटले बलेदे।”
21 “भाई-भाई के आउर बुआ बेटा के, मोरते मारतो काजे सोपेदे, आउर पिलामन आया-बुआमन उपरे एदे आउर हुनमन के मोरते मरादे।
22 सपाय लोग मोचो नाव चो किरता तुमके बईर करदे, मानतर जोन सरासरीदांय ले धीरजा धरुन रयदे हुनचेई मुक्ति होयदे।
23 जेबे डाटा-टेवा गोटोक सहर ने तुमके करला जाले, तुमी दुसर सहर ने पराहा। मय तुमके सते बलेंसे, इसराएल चो जमाय सहरमन ने तुमी बुलुन नी सारु-सारु मय मनुक चो बेटा एयंदे।”
24 “चेला आपलो गुरु ले बड़े नोआय; आउर कमेया आपलो मालिक ले बड़े नोआय।
25 चेला गुरु ले, आउर कमेया मालिक ले जोंहरेया होतोर ची खुबे आय। घर चो मालिक के हुनमन सयतान (बेलजाबुल) बलला जाले, घर चो लोगमन के काय-काय नी बलदे!”
कोके डरतोर आय
26 एईकाजे हुनमन ले नी डरा; असन काई बले ढाकलोर नीआय जेके उगाड़ुक नी होयदे, आउर काई बले लुकलोर नीआय जेके दखुक नी होयदे।
27 जेके मय तुमके अंधार ने सांगेसे, हुनके तुमी उजर ने सांगा; जेके काने-कान सुनसाहास, हुनके तुमी छानी उपर ले चिचियाउन सांगा।
28 देहें के मारु बीतामन ले नी डरा, आत्मा के हुनमन छिंउक बले नी सकोत; मानतर हुनचो ले तुमी डरा, जोन आत्मा आउर देहें दुनो के नरक-कुंड ने पकाउक सके।
29 काय, पयसा ले दुयठन चेटिया नी बिकसोत? तेबले बले तुमचो सरग चो बुआ चो मन-नोहलो गोटोक चेटिया बले भुंय ने नी घसरे।
30 तुमचो मुंड चो चूंदी के बले गनलोर आसे।
31 एईकाजे नी डरा; तुमचो मोल खुबे चेटियामन ले आगर आय।
32 “जोन मोके मनुकमन चो पुरे मानेदे, मय बले हुनके सरग ने रउ मोचो बुआ चो पुरे मानेंदे।
33 मानतर जोन कोनी मनुकमन चो पुरे मोके ‘नी जाने’ बलेदे, हुनके मय बले सरग ने रउ मोचो बुआ चो पुरे ‘नी जाने’ बलेंदे।”
34 “ए नी समजा कि मय मंजपुर ने मिला-मिसा कराउक ईलेसे; मिला-मिसा कराउकलाय नाई, मानतर खांडा किंदराउक ईलेसे।
35 ‘बेटा के बुआ ले,
आउर बेटी के हुनचो आया ले,
आउर बुआरी के हुनचो सतरी ले भिने करुकलाय मय ईलेसे;
36 मनुक चो बईरवार हुनचो घरचोई लोग होदे’।” †
जीसु चो पाट-पाट होतो चो पुन
37 “जोन मनुक आपलो आया-बुआ के मोचो ले आगर मया करेसे, हुन मोचो चेला बनतो लाईक नोआय; आउर जोन आपलो बेटा-बेटी के मोचो ले आगर मया करेसे, हुन मोचो चेला बनतो लाईक नोआय;
38 जोन आपलो कुरूस के उठाउन मोचो पाटे नी एये हुन मोचो लाईक नोआय।
39 जोन आपलो जीव के बचायसे, हुन आपलो जीव के बचाउक नी सके; आउर जोन मोचो किरता आपलो जीव के देयसे, हुन आपलो जीव के पायदे*।
40 जोन तुमके मानेसे, हुन मोके मानेसे; आउर जोन मोके मानेसे, हुन मोके पठाउ के मानेसे।
41 जोन अगमजानी के, अगमजानी जानुन मानेदे, हुन अगमजानी चो पलटा पायदे; आउर जोन धरमाती के, धरमाती जानुन मानेदे, हुन धरमाती चो पलटा पायदे।
42 ए नानीमन ले कोकई बले मोचो चेला जानुन जोन कोनी गोटोक बटका करा पानी देयदे, मय तुमके सते बलेंसे, हुन पक्का आपलो पुन पायदे।”