जीसु के नासरत ने बईर करसोत
6
हुन थान ले निकरुन जीसु आपलो राज ने ईलो, आउर हुनचो चेलामन बले हुनचो संगे ईला।
2 बिसातो दिने हुन, जहूदीमन चो मंडली-घरे महापरभु चो गोट सांगुक मुरियालो, आउर खुबे लोग सुनुन भक्याउन गेला, आउर बलुक मुरियाला, “एके ए गोट कहां ले ईली? आउर इतरो गियान कहां ले सीखलो आउर कसन ने असन महासंदे चो काम हुनचो ले होयसे?
3 काय, ए हुनी बड़ई नोआंय, जोन मरियम चो बेटा आउर जाकूब, जोसेस, जहूदा आउर समोन चो भाई आय? काय, हुनचो बईनमन आमचो मंजिगते नी रयसोत?” एईकाजे हुनमन हुनचो बारे ने धोका खादला।
4 तेबे जीसु हुनमन के बललो, “अगमजानी के आपलो राज, आपलो कुटुम आउर आपलो घर के छांडुन बाहरे सपाय जगा ने हुनचो मान होयसे।”
5 हुता जीसु, खिंडिक बेमार लोगमन के हाथ संगाउन उजरालो, आउर लोगमन जीसु चो उपरे बिसवास नी करलो काजे हुन, हुता महासंदे चो काम नी करुक सकलो।
6 आउर जीसु हुनमन चो बिसवास नी करतो के भक्यालो आउर चारो बाट चो गांव ने महापरभु चो गोट सांगते बुललो।
जीसु बारा चेलामन के पठायसे
7 जीसु, हुन बारा चेलामन के आपलो लगे हागदेउन, हुनमन के दुय-दुयझन करुन पठाउक मुरियालो; आउर हुनमन के देव-भूतमन के निकरातो हक दिलो।
8 आउर हुनमन के हुकुम दिलो कि बाट काजे बड़गी के छांडुन काईके नी धरा, रोटी नोहले, झोरा नोहले ओटी ने पयसा।
इसराएल देस चो पयसा (6:8)
9 मानतर पनई पींदा आउर दुय-दुयठन कुड़ता नी पींदा।
10 आउर जीसु हुनमन के बललो, जोन घरे बले तुमी जाहासे, हुन थान ले बिदा होओतले हुताय राहा।
11 जोन जगा चो लोग तुमके नी मानदे, आउर तुमचो गोट के नी सुनदे, हुताले जातो के तुमचो तली-पांय चो धुरला के फापड़ुन दियास कि हुन, लोगमन चो उपरे महापरभु चो रीस चो गवई होओ।
12 जीसु चो चेलामन जाउन मन बोहड़ाहा बलुन सांगते गेला।
13 आउर खुबे देव-भूतमन के निकराला, आउर खुबे बेमार बीतामन के तेल लगड़ुन हुनमन के उजराला।
बपतिस्मा देतो बीता जूहन्ना चो मोरना
14 हेरोद राजा जीसु चो बारे ने सुनलो, कसनबलले हुनचो नाव गुलाय बिगरुन रये, आउर लोगमन बलला कि जूहन्ना बपतिस्मा देतो बीता मोरलो थान ले फेर जीवलोसे; एईकाजे हुनचो ले असन सकत चो काम होयसे।
15 आउर कोनी बलसोत, ए एलिया आय, मानतर कोनी आउर बलसोत, ए अगमजानी आय, नोहले आगे जुगे चो अगमजानीमन थान ले कोचई गोटोक चो असन आय।
16 हेरोद राजा जीसु चो बारे ने सुनुन बललो, जोन जूहन्ना चो मुंड के मय कटाउ रले, हुनी जीवलोसे।
17 कसनबलले हेरोद राजा, आपलो भाई फिलिपुस चो बायले हेरोदिया के राकुन रलो। हेरोदिया किरता पाईकमन के पठाउन जूहन्ना के जयल घरे ढकाउन देउ रये।
18 कसनबलले जूहन्ना हेरोद राजा के बललो कि तुचो भाई चो बायले के राकतोर तुके नंगत नोआय।
19 आउर हेरोदिया, जूहन्ना के रीस धरु रली आउर हुनके मोराउक खोजते रली। मानतर असन नी होउक सकली।
20 कसनबलले हेरोद जूहन्ना के धरमकारी आउर पवितर मनुक जानुन हुनके डरते रये आउर हुनके, हेरोदिया ले बचाउन संगाते रये। राजा जूहन्ना चो गोट के सुनुन खुबे डरते रये; मानतर हुनचो गोट के हरिक ले सुनते रये।
21 हेरोदिया काजे पक्का मोहका ईली जिदलदांय राजा हेरोद चो जनम दिन अमरली आउर राजा आपलो मंतरीमन, पलटन मुखियामन आउर गलील परघन चो बड़े-बड़े लोगमन काजे भोज दिलो।
22 आउर हेरोदिया चो बेटी माहाल भीतरे ईली, आउर नाचुन हेरोद के आउर हुनचो सगा लोगमन के हरिक करली। तेबे राजा हुन लेकी के बललो, “तुके जोन बले भायसे मोके मांग, मय तुके देयंदे।
23 आउर राजा किरिया खाउन बललो कि तुय काई चे बले मांग, भले मोचो आधा राज बले होओ, मय तुके देयंदे।”
24 आउर हुन लेकी बाहरे जाउन आपलो आया के पूछली: “मय काय मांगु आंय?” तेबे हुन बलली: “बपतिस्मा देतो बीता जूहन्ना चो मुंड।”
25 लेकी तूरते भीतरे राजा लगे ईली, आउर बिनाली कि, “मय मन करेंसे कि तुय एबे बपतिस्मा देतो बीता जूहन्ना चो मुंड के गोटोक परात ने देस।”
26 तेबे राजा खुबे मुरुसनाय होलो, मानतर आपलो किरिया काजे आउर आपलो संगे बसलो सगामन काजे चाबी होलो।
27 आउर तूरते राजा गोटोक पाईक के हुकुम देउन पठालो कि जूहन्ना चो मुंड के काटुन आन। हुन जयल घरे जाउन जूहन्ना चो मुंड के काटलो,
28 आउर गोटोक परात ने मुंड के आनलो, आउर लेकी के दिलो आउर लेकी आपलो आया के दिली।
29 असन सुनुन जूहन्ना चो चेलामन ईला, आउर हुनचो धड़ के नेउन मोठेयाला।
जीसु पांच हजार मनुकमन के खुआयसे
30 पठालो-लोगमन जीसु लगे फिरुन ईला, आउर जितरो बले हुनमन करला, आउर सिखाला, सपाय गोट के जीसु के सांगला।
31 जीसु हुनमन के बललो, जो, आमी कोनी अलगे रान जगा ने जाउन डंडिक सुस्तावां, कसनबलले हुन लगे खुबे लोग इहार-जाहार होते रओत, आउर हुनमन के खातो मोहका बले नी मिरते रये।
32 एईकाजे हुनमन डोंगा ने चेगुन अलगे चिमचामनाय जगा ने गेला।
33 आउर खुबे लोगमन हुनमन के जातो के दखुन चिताला, आउर सपाय सहरमन ले लोगमन हिंडते-पराते हुनमन चो ले आगे हुता अमरला।
34 आउर जीसु डोंगा ले उतरते खन बड़े भीड़ के दखलो, आउर हुनमन चो उपरे खुबे जीव दुखलो, कसनबलले हुनमन, हुन मेंडामन असन रला, जेचो कोनी चराउ बीता नीआत, आउर जीसु हुनमन के खुबे गोटमन सिखाउक मुरियालो।
35 जिदलदांय बेर बसली, तेबे चेलामन जीसु लगे एउन बलला, ए छीड़ा जगा आय, आउर खुबे बेर होली,
36 हुनमन के जाउक देस, तेबे हुनमन आली-पाली चो गांव-पारामन ने जाउन आपलाहान काजे खातो बिती घेनदे।
37 जीसु चेलामन के बललो कि तुमी ची लोगमन के खातो काजे दियास: हुनमन जीसु के बलला, काय, आमी एमन के दस कोड़ी दीनार चो रोटी घेनुन खुआउ आंव?
38 जीसु हुनमन के बललो, जाउन दखा, तुमचो लगे कितरो रोटीमन आसे? हुनमन दखुन भाति बलला, पांचठन रोटी आउर दुयठन मछरी बले आसे।
39 तेबे जीसु चेलामन के हुकुम दिलो कि सपाय लोगमन के काचा रोंडा ने पाती-पाती ने बसाउन दियास।
40 लोगमन सव-सव आउर पचास-पचास चो पाती-पाती ने बसला।
41 आउर जीसु हुन पांचठन रोटी के आउर दुयठन मछरी के धरलो, आउर सरग बाटे दखुन महापरभु के बिनालो आउर रोटीमन के गोंदा-गोंदा करुन चेलामन के देते गेलो कि हुनमन लोगमन के देते जाओत, आउर हुन दुयठन मछरीमन के बले हुन सपाय लोगमन के बाटुक दिलो।
42 आउर सपाय खाउन हरिक होला।
43 आउर हुनचो चेलामन उरलो रोटी आउर मछरी के बाराठन फाडरी ने भोरला।
44 जोनमन रोटी खादला, हुनमन ले अबगो मनुकमन पांच हजार रला।
जीसु पानी उपरे हिंडेसे
45 तेबे जीसु तूरते आपलो चेलामन के बेरपेला डोंगा ने चेगालो कि हुनमन, जीसु ले आगे हुन पाट बेतसयदा सहर ने जाओत, जिदलदांय ले हुन लोगमन के बिदा करो।
46 लोगमन के बिदा करुन जीसु डोंगरी ने पारथना करुक गेलो।
47 जिदलदांय अंधार होली, हुदलदांय चेलामन चो डोंगा समूंद चो मंजिगते रली, आउर जीसु एकला भुंये रलो।
48 आउर जिदलदांय जीसु दखलो कि चेलामन घाटते-घाटते थाकलासे, कसनबलले लेहरा हुनमन चो पुरे ले एते रये। जीसु राती पईल कुकड़ा बासा-बासी बेरा समूंद चो पानी उपरे हिंडते हुनमन लगे ईलो आउर चेलामन ले पुरे जाउक खोजते रये।
49 मानतर हुनमन जीसु के पानी उपरे हिंडतो के दखुन भूत आय बलुन एकदांय चिचियाला।
50 कसनबलले सपाय हुनके दखुन खुबे डरुन रओत, मानतर जीसु तूरते हुनमन के गोटेयालो, आउर बललो, ढाढ़ुस करा, मय आंय, नी डरा।
51 तेबे जीसु हुनमन लगे डोंगा ने ईलो, आउर लेहरा थामली, आउर चेलामन एकदांय भक्याला।
52 हुनमन चो मन कटुर रलो किरता, जीसु लोगमन के रोटी खुआलो अचरित बुता चो बारे ने हुनमन नी समजला।
गनेसरत ने जीसु बेमार लोगमन के उजरायसे
53 जीसु आउर चेलामन समूंद के नाहकुन गनेसरत ने अमरला आउर डोंगा के घाटे छांडला।
54 आउर जिदलदांय हुनमन डोंगा ले उतरला, तूरते लोगमन हुनके चिताला।
55 आली-पाली चो गांव ने जीसु ईलो खबर सुनुन, लोगमन बेमार पड़लो लोगमन के डंडियामन ने बोउन जोन-जोन थाने हुनचो खबर सुनला हुता-हुता धरुन बुलला।
56 आउर जीसु, जोन गांव नोहले सहर ने जाते रलो, तेबे लोगमन बेमार लोगमन के हाट-पसरा ने संगाउन जीसु के बिनाते रओत कि हुन, बेमार लोगमन के आपलो फटई चो आंचरा के छिंउक देओ, आउर जितरो लोग हुनके छींवला सपाय चेकरला।