बारा चेलामन के पठातोर
9
जीसु आपलो बारा चेलामन के लगे हागदेउन, हुनमन के देव-भूतमन के निकरातो आउर बेमारमन ले उजरातो सकत आउर हक दिलो
2 आउर जीसु हुनमन के महापरभु चो राज चो गोट सांगतो काजे आउर बेमार लोगमन के उजरातो काजे पठालो।
3 जीसु हुनमन के बललो, “बाट काजे आपलाहान संगे काईची नी निया बललोने बड़गा, झोरा, खादी-पीदी, पयसा आउर दुय जोड़ी कुड़ता।
4 जोन घरे तुमी ओलुआहास, हुन सहर के छांडोतले तुमी हुनी ची घरे राहा।
5 जोनमन तुमके नी मानदे, तुमी हुन सहर ले जातोदांय आपलाहान पांयमन चो धुरला के फापड़ुन दियास कि हुनमन काजे उलटा गवई होओ।”
6 चेलामन निकरुन गांव-गांवमन ने नंगत खबर सांगते आउर बेमार लोगमन के उजराते सपाय बाटे बुलते रओत।
7 राज करतो बीता हेरोद अंदिपास, ए जमाय गोट के सुनलो आउर खुबे अकचक्यालो, कसनबलले लोगमन बलते रओत कि जूहन्ना बपतिस्मा देतो बीता मोरलो थान ले जीव होलोसे,
8 आउर कोनी बलते रओत कि एलिया अगमजानी दखा दिलोसे, आउर कोनी बलसोत कि आगे बेरा चो कोनी अगमजानी मोरलो थान ले जीव पड़लोसे।
9 हेरोद अंदिपास बललो: “जूहन्ना चो मुंड के तो मय कटाउ रले, मानतर ए मनुक कोन आय, जेचो खुबे गोट के मय सुनेंसे?” हेरोद अंदिपास, जीसु के दखुकलाय मन करते रये।
पांच हजार लोगमन के खुआतोर
10 पठालो-लोग (चेलामन) बोहड़ुन ईला आउर जोन बले हुनमन करला, जमाय गोट के जीसु के सांगला। तेबे जीसु हुनमन के अलगे करुन आपलो संगे बेतसयदा गांव ने नीलो।
11 मानतर लोगमन के जीसु चो खबर मिरली आउर हुनचो पाट-पाट गेला; जीसु हुनमन के हरिक ले भेट होलो, आउर महापरभु चो राज चो गोट सांगलो, आउर चेकरतो काजे मन करतो बीतामन के उजरालो।
12 जिदलदांय सांज होउक मुरियाली, तेबे बारा चेलामन जीसु लगे एउन बलला: “लोगमन के जाउक देस, कसनबलले हुनमन आली-पाली चो गांव-पारामन ने जाउन खातो आउर रतो उआट करोत, कसनबलले आमी एथा चिमचामनाय जगा ने आसुं।”
13 मानतर जीसु हुनमन के बललो: “तुमी ची लोगमन के खाउक दियास।” हुनमन बलला: “पांचठन रोटीमन आउर दुयठन मछरी के छांडुन आमचो लगे आउर काईची नीआय, मानतर हव, आमी जाउन ए जमाय लोगमन काजे खातो तीज घेनलोने होउक सके।”
14 लोग-कुड़ा तो पांचेक हजार मनुकमन रओत। तेबे जीसु चेलामन के बललो: “लोगमन के पचास-पचास चो धाड़ी-धाड़ी ने बसाहा।”
15 हुनमन उसने करला, आउर जमाय लोगमन भुंये बसला।
16 तेबे जीसु हुन पांचठन रोटी आउर दुयठन मछरी के धरलो, आउर सरग बाटे दखुन महापरभु के धन-धन करलो आउर हुनके गोंदा-गोंदा करुन लोगमन के देतो काजे चेलामन के दिलो।
17 जमाय लोगमन पेट भोरते खाउन हरिक होला, आउर उरलो गोंदामन ले बारा फाडरीमन भोरली।
लूका 9:10-17
पतरस, जीसु के किरिस्त मानतोर
18 जीसु एकला पारथना करतो बेरा, चेलामन हुनचो लगे गेला, तेबे जीसु हुनमन के ए गोट पूछलो: “लोगमन मोके कोन आय बलसोत?”
19 हुनमन बलला: “कोनी-कोनी बलसोत कि जूहन्ना बपतिस्मा देतो बीता; आउर कोनी-कोनी बलसोत कि एलिया अगमजानी; आउर कोनी-कोनी बलसोत कि जुना अगमजानीमन ले कोनी फेर जीव उठलोसे।”
20 जीसु हुनमन के पूछलो: “मानतर तुमी मोके कोन आय बलसास?” पतरस बललो: “तुय महापरभु चो *किरिस्त आहास।”
21 तेबे जीसु हुनमन के नंगत चेत कराउन हुकुम दिलो, ए गोट के कोकई नी सांगा।
22 जीसु आउर बललो: “*मय मनुक चो बेटा के खुबे दुख-डंड पावतोर जरुर आय, आउर धरम-सियानमन, पुजारीमन चो मुखियामन आउर धरम-पंडितमन मोके काई नी समजुन मोरते मारदे, आउर मय तीसर दिने फेर जीउन उठेंदे।”
लूका 9:18-22
जीसु चो पाट-पाट रेंगतो चो अरथ
23 जीसु जमाय के बललो: “कोनी मोचो चेला होउक मन करेसे जाले, हुन आपलो मन-इछा के छांडुन भाति रोजे दिने आपलो कुरूस के बोउन मोचो संगे एओ।
24 कसनबलले जोन कोनी आपलो जीव के बचाउक मन करेदे हुन, हुनके हजायदे; मानतर जोन कोनी मोचो काजे आपलो जीव के हजायदे हुनी, हुनके बचायदे।
25 मनुक जमाय संवसार के पाउन आपलो जीव के हजालोने, हुनके काय नफा होयदे?
26 जोन कोनी मोचो ले आउर मोचो गोटमन ले लाज होदे; मय मनुक चो बेटा बले, हुनचो ले लाज होयंदे, जिदलदांय मय आपलो बुआ आउर पवितर सरगदूतमन चो मयमा संगे एयंदे।
27 मय तुमके सते सांगेंसे, एथा रतो लोगमन ले कोनी-कोनी महापरभु चो राज के नी दखोतले नी मोरदे।”
जीसु चो रूप बदलतोर
28 आठ दिन चो पाछे, पतरस, जूहन्ना आउर जाकूब के जीसु, संगे नेउन पारथना करतो काजे डोंगरी ने गेलो।
29 जिदलदांय हुन पारथना करते ची रलो हुनचो थमना चो रंग बदलली; आउर हुनचो फटई बले झकमक होउन बरूक मुरियाली,
जीसु चो रूप बदलतोर (9:29)
30 आउर दखा, मोसा आउर एलिया दुयझन मनुकमन हुनचो संगे गोटेयाते रओत।
31 हुनमन सरग चो मयमा-उजर ने दखा दिला; आउर महापरभु चो मन असन जीसु चो मोरना जरूसलेम ने होतो गोट के गोटेयाते रओत।
32 पतरस आउर दुसर चेलामन खुबे झूमते रओत; आउर जिदलदांय नंगत ले चेतला, तेबे जीसु चो मयमा-उजर आउर हुन दुयझन मनुकमन के जीसु चो संगे उबा होलोर दखला।
33 जिदलदांय मोसा आउर एलिया चो जातो बेरा होली, तेबे पतरस जीसु के बललो: “गुरुजी, आमके एता रतोर नंगत आय, एईकाजे आमी तीनठन मांडो बनावां, गोटोक तुचो काजे, गोटोक मोसा काजे आउर गोटोक एलिया काजे।” पतरस खुदे नी जानते रलो कि हुन काय बलेसे।
34 जसन पतरस गोटेयाते ची रलो, गोटोक बादरी एउन हुनमन के ढाकली, आउर बादरी हुनमन के ढाकतो के दखुन हुनमन डरुन गेला।
35 आउर हुन बादरी ले गोटोक राग निकरली: “ए मोचो बेटा आय, जेके मय बाछलेसे, हुनचो गोट के सुना।”
36 आउर असन गोट होलो पाछे, पतरस, जूहन्ना आउर जाकूब, जीसु के एकलाय दखला। हुदलदांय हुनमन दखलो-सुनलो गोट के मने संगाला आउर हुनमन कोकई नी सांगला।
लूका 9:28-36
भूत धरलो लेका के उजरातोर
37 दुसर दिने जिदलदांय जीसु आउर हुनचो तीनझन चेलामन डोंगरी ले उतरुन ईला, खुबे लोग-कुड़ा हुनमन के भेटला।
38 आउर लोग-कुड़ा ले गोटोक मनुक असन बलुन चिचियालो: “ए गुरुजी, मय तुके गुहारेंसे, मोचो गोटकी ची बेटा आय, हुनचो उपरे दया कर।
39 गोटोक भूत हुनके धरुआय आउर हुन तूरते किरकिरुआय, आउर भूत हुनके कचाड़ुन चेत नोहलोर करलोने हुनचो टोंड ले फेफल निकरुआय; आउर भूत हुनके रमंदुन निमल करुन भाति खुबे तकलीस ने छांडुआय।
40 मय तुचो चेलामन के भूत निकराउक गुहारले, मानतर हुनमन निकराउक नी सकला।”
41 जीसु हुनमन के बललो: “तुमी जिदाहा आउर नी पतेयातो लोगमन आहास! मय किदलदांय ले तुमके सहुक सकेंदे? तुचो बेटा के एथा आन।”
42 जिदलदांय हुन जीसु लगे एते रलो, तेबे देव-भूत हुनके जोर ले भुंये कचाड़ुन अलटुन दिली। मानतर जीसु देव-भूत के दागा दिलो आउर लेका के उजराउन हुनचो बुआ के दिलो।
43 तेबे जमाय लोग महापरभु चो बड़े बल-बपू के दखुन अचरित होला।
जसन लोगमन हुन सपाय काम जेके जीसु करलोसे हुनचो काजे अकचक्याते रओत, तेबे जीसु आपलो चेलामन के बललो:
लूका 9:37-43
44 “ए गोटमन के खुबे धियान देउन सुना, कसनबलले मोके बललोने, मनुक चो बेटा के मनुकमन चो हाथे धराय होतोर ची आय।”
45 मानतर हुनमन ए गोट चो अरथ के नी समजला, आउर ए अरथ हुनमन ले लुकुन रली; कसनबलले हुनमन एके जानुक नी सकला आउर हुनमन ए गोट चो अरथ जीसु के पूछतो काजे डरते रला।
सबुले बड़े कोन?
46 जीसु चो चेलामन चो मंजिगता ने गोट निसकली कि हुनमन थान ले सबुले बड़े कोन आय।
47 मानतर जीसु हुनमन चो मन चो गोट के जानुन गोटोक पिला के धरुन आपलो लगे उबा करलो,
48 आउर हुनमन के बललो: “जोन कोनी बले ए पिला के मोचो नाव ने इजित-मान करेसे, हुन मोके मानेसे; आउर जोन कोनी मोके मानेसे, हुन, मोके पठाउ के मानेसे; कसनबलले जोन तुमचो मंजिगता सपाय ले नानी आय, हुनी बड़े आय।”
49 जूहन्ना जीसु के बललो: “गुरुजी, गोटोक मनुक के तुचो नाव ले देव-भूतमन के निकरातोके आमी दखलुसे; आमी हुनके मना करलु, कसनबलले हुन आमचो संग चो नोआय।”
50 मानतर जीसु हुनके बललो: “हुनके मना नी करा; कसनबलले जोन तुमचो बिरुद ने नोआय, हुन तुमचो बाटे आसे।”
51 जिदलदांय जीसु चो सरग जातो दिन लगे अमरली, तेबे हुन, जरूसलेम ने जातो काजे पक्का मन करलो।
52 जीसु सामरीमन चो गोटोक गांव ने जाउन आपलो रतो काजे ठान तियार करुकलाय लोगमन के पुरे पठालो।
53 मानतर सामरीमन हुनके ठेबुक नी दिला, कसनबलले हुन जरूसलेम सहरे जातो बीता रये।
54 एके दखुन हुनचो चेलामन जाकूब आउर जूहन्ना, जीसु के पूछला: “ए परभु, काय तुय मन करसीस कि आमी हुकुम देउं सरग ले आईग घसराउन हुनमन के लाकड़ी उलटाउन देउं?”
55 मानतर जीसु हुनमन के दागा दिलो (आउर बललो, तुमी नी जानास कि तुमी कसन बरन चो जीव चो आहास। कसनबलले मय मनुक चो बेटा, लोगमन चो जीव धरतो काजे नाई, मानतर बचाउक ईलेसे;)*
56 तेबे जीसु आउर हुनचो संगे रलो लोगमन दुसर गांव ने गेला।
जीसु चो चेला बनतो चो गोट
57 एबे हुनमन बाटे हिंडते ची रला, तेबे कोनी हुनके बललो: “कहांय बले तुय जासे, मय तुचो संगे एयंदे।”
58 जीसु हुनके बललो: “कोलेयामन काजे फोंगाड़ आउर बादरी चो चड़ईमन काजे गूड़ा आसे; मानतर मय मनुक चो बेटा के, मुंड संगातो काजे बले ठान नीआय।”
59 जीसु कोनी दुसर के बललो: “मोचो संगे आव।” हुन बललो: “ए परभु, मोके आगे जाउन मोचो बुआ के माटी देउक देस।”
60 जीसु हुनके बललो: “मोरलो लोगमन के आपलो मोरलोमन के माटी देउक देस; मानतर तुय जाउन महापरभु चो राज चो गोट के सांग।”
61 कोनी आउर गोटोक मनुक जीसु के बललो: “ए परभु, मय तुचो संगे एयंदे, मानतर मय जाउन आपलो कुटुम चो लोगमन ले बिदा धरुन एयंदे।”
62 जीसु हुनके बललो: “जोन कोनी बले आपलो हाथे नांगर धरुन भाति पाटकुती उलटुन दखेसे जाले, हुन महापरभु राज चो लाईक नोआय।”